Abanyarwanda baba muri Sénégal bizihije umunsi wo Kwibohora

Yanditswe na Ishimwe Israel
Kuya 12 Nyakanga 2016 saa 07:33
Yasuwe : XX
91 55

Ambasade y’u Rwanda muri Sénégal ifatanyije n’ihuriro ry’Abanyarwanda bagize Diaspora Nyarwanda muri icyo gihugu ndetse n’inshuti z’u Rwanda bizihije umunsi wo kwibohora.

Ibirori byo kwizihiza umunsi wo Kwibohora ku nshuro ya 22 byabereye mu nzu ndangamurage ya Léopold Sédar Senghor, byitabiriwe n’abantu 400 barimo abambasaderi, abanyamuryango bahagarariye inyungu z’ibihugu byabo, abayobozi bakuru muri Leta ya Sénégal, imiryango mpuzamahanga, ndetse na sosiyete sivile.

Leta ya Sénégal yari ihagarariwe na Viviane Laure Elisabeth Bampassy, Minisitiri w’abakozi ba Leta n’Umurimo.

Ibirori byo kwizihiza uyu munsi byaranzwe no gusangiza abitabiriye uyu muhango amateka y’urugamba rwo kwibohora, imbyino gakondo z’ Itorero Abatangana ndetse n’indirimbo z’umuhanzi ufite ubwenegihugu bw’u Rwanda na Sénégal Habib Thiam.

Mu ijambo rye, Ambasaderi w’u Rwanda muri Sénégal, Dr. Mathias Harebamungu, yashimiye uwari uhagarariye Sénégal muri uyu muhango ndetse n’abandi bayobozi bose bifatanyije n’Abanyarwanda mu birori byo kwizihiza imyaka 22 ishize u Rwanda rwibohoye.

Yagarutse ku butwari bwaranze RPF bitanze muri byose ngo babohore igihugu. Dr. Mathias yagaragaje ko u Rwanda ari igihugu kimaze kwiyubaka ku buryo bufatika.

Yagize ati "U Rwanda ni igihugu gitera imbere umunsi ku munsi, kandi kiyubatse ku buryo bugaragara hashingiwe ku ndangagaciro z’ubunyarwanda zo kwihesha agaciro ndetse no kwigira."

Ambasaderi Harebamungu yakomeje agaragaza ko nyuma yo guhagarikwa kwa Jenoside, urugamba rwo kubohora igihugu rwarakomeje mu gihugu cyari cyivuye mu bihe bibi ndetse cyarasenywe bikabije.

Yashimiye byimazeyo ubutwari bwa Perezida Kagame, wafashe iya mbere mu kuyobora Abanyarwanda mu rugamba rwo kwiteza imbere.

Yashoje ashimira inshuti z’Abanyarwanda baba muri Sénégal ndetse n’abandi bose bagize uruhare mu gushyira imbaraga mu bikorwa byose byo kwiyubaka kw’Abanyarwanda.

Ibirori byo kwizihiza umunsi wo Kwibohora byasojwe abanyarwanda baba muri Sénégal ndetse n’inshuti zabo bacinya akadiho mu ndirimbo ‘Intsinzi’.

Abanyarwanda bagize Diaspora Nyarwanda muri Sénégal bifatanyije mu birori byo kwizihiza umunsi wo kwibohora
Ambasaderi w’u Rwanda muri Sénégal, Dr. Mathias Harebamungu ageza ijambo ku bitabiriye ibi birori
Abanyarwanda baba muri Sénégal n'inshuti zabo bizihije umunsi wo Kwibohora
Itorero Abatangana ryaserutse mu mbyino gakondo z'umuco nyarwanda
Umuhanzi Habib Thiam ufite ubwenegihugu bw’u Rwanda na Sénégal yasusurukije abitabiriye ibi birori

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE