Abanyarwanda baba muri Tchad bibutse Abatutsi bishwe muri Jenoside

Yanditswe na Ferdinand Maniraguha
Kuya 21 Kamena 2016 saa 11:32
Yasuwe : XX
91 55

Mu rwego rwo kwibuka inzirakarengane zishwe muri Jenoside yakorewe Abatutsi, ku nshuro ya mbere Abanyarwanda baba muri Tchad hamwe n’inshuti zabo bahuriye mu muhango wo kwibuka.

Uyu muhango wabereye muri Hotel Hilton iherereye mu mujyi wa N’Djamena, tariki ya 18 Kamena 2016, witabiriwe n’Abanyarwanda bakorera imirimo itandukanye muri Tchad, n’inshuti zabo n’uhagarariye Afurika y’Epfo muri Tchad, Ambasaderi Naidoo Dayanand.

Zaina Nyiramatama uhagarariye umuryango w’Ubumwe bw’Afurika muri Tchad yatangarije IGIHE ko ari ku nshuro ya mbere umuhango wo kwibuka Abatutsi bishwe muri jenoside ubaye muri iki gihugu.

Ati “Twumvise dufite ishema ryo kwibuka abacu bishwe muri Jenoside, kubibuka ni inshingano zacu nk’Abanyarwanda.”

Akomeza avuga ko baboneyeho n’umwanya wo gusobanurira abanyamahanga uko jenoside yakorewe Abatutsi yateguwe, bityo abayihakana n’abayipfobya bakwiye kwimwa ijambo, ahubwo abatuye Isi bagafatanyiriza hamwe kurwanya ingengabitekerezo yayo kugirango itazagira ahandi yongera kuba ku Isi.

Felix Muhigana, ukorera Ishami ry’Umuryango w’Abibumbye ryita ku mpunzi (UNHCR) muri Tchad, yasobanuye uko Jenoside yakorewe Abatutsi yateguwe kuva ku gihe cy’abakoloni, ndetse n’uburyo yagendaga ishyirwa mu bikorwa kugeza mu 1994, ubwo hicwaga abasaga miliyoni.

Abitabiriye uyu muhango baboneyeho n’umwanya wo kurebera hamwe filime yitwa “tuer les tous” hamwe nindi yitwa “Du chaos au miracle” Ya Sonia Roland.

Bamwe mu banyamahanga bavuze ko u Rwanda rukwiye kubera amahanga icyitegererezo mu bumwe n’ubwiyunge, iterambere ndetse n’ imiyoborere myiza, bitewe n’uburyo rwabashije kwiyubaka nyuma ya jenoside yakorewe Abatutsi.

Abanyarwanda n'inshuti z'u Rwanda baba muri Tchad baje kwifatanaya kwibuka
Abaje kwibuka basabwe kurwanya ingengabitekerezo ya Jenoside

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE