Abanyarwanda batuye mu Buhinde bizihije Umunsi wo Kwibohora

Yanditswe na Kanamugire Emmanuel
Kuya 6 Nyakanga 2016 saa 05:50
Yasuwe : XX
0

Abanyarwanda n’inshuti z’u Rwanda baba mu mujyi wa Pune mu Buhinde bifatanyije mu muhango wo kwizihiza Umunsi wo Kwibohora ku nshuro ya 22.

Umujyana wa kabiri muri Ambasade y’u Rwanda mu Buhinde,Mucyo Rutishisha yagaragarije abitabiriye uyu muhango aho u Rwanda rwavuye n’aho rugeze ubu anibutsa ko urugendo rwo kwibohora rugikomeje.

Yagize ati “Kwibohora birakomeje kugira ngo tugere aho twifuza kugera mu nzira y’iterambere rirambye”.

Yagarutse ku mubano ukomeye u Rwanda rufitanye n’u Buhinde haba mu mibanire y’ibihugu byombi no mu bijyanye n’ishoramari.Yanashishikarije abanyamahanga bitabiriye uwo muhango gushora imari yabo mu Rwanda kuko ari igihugu gitekanye cyorohereza ishoramari kandi gitanga icyizere cy’ahazaza heza.

Umuyobozi w’abanyeshuri b’Abanyarwanda mu mujyi wa Pune, Gafurama James yavuze ko Umunsi wo kwibohora ari igihe cyiza cyo kwibuka abitangiye kubohora igihugu, kwishimira ibyagezweho no kwirinda icyabihungabanya ndetse no gusigasira ubumwe n’ubwiyunge by’abanyarwanda.

Muri uyu muhango kandi Clarence Fernandez,Umuyobozi wa Rwanda Renaissance,yagaragaje isura nziza u Rwanda rufite mu ruhando mpuzamahanga yongeraho ko ari igihugu kirangwa n’umutekano kurusha ibindi muri Afurika rubikesha ubuyobozi bwiza.

Uyu muhango wateguwe n’urubyiruko rw’Abanyarwanda biga muri Kaminuza zitandukanye zo mu mujyi wa Pune ku bufatanye na Ambasade y’u Rwanda mu Buhinde.

Witabiriwe n’abanyacyubahiro barimo Mucyo Rutishisha, umujyanama wa Kabiri muri Ambasade y’u Rwanda mu Buhinde,Capt. Sibomana Samson, Clarence Fernandez, umuyobozi wa Rwanda Renaissance, Dr. Sirish, Umuyobozi wa Kaminuza ya Symbiosis, Dr. JidapaThavarit, Umuyobozi w’umuryango w’Abanyeshuri bo muri Thailand.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza