Abanyarwanda batuye muri Angola basabwe gukenyera bakiyubakira igihugu

Yanditswe na Philbert Hagengimana
Kuya 15 Ukuboza 2016 saa 09:05
Yasuwe :
0 0

Abanyarwanda baba muri Angola bishyiriyeho Komite nyobozi, Ambasaderi w’u Rwanda muri icyo gihugu, Alfred Kalisa, abasaba gukenyera bagakomeza na bo bagatanga umusanzu ufatika mu kwiyubakira igihugu.

Iyo Komite nyobozi yatowe mu nama y’Inteko rusange y’umuryango w’Abanyarwanda bagera kuri 50 baba muri Angola, yateranye kuwa 10 Ukuboza 2016, iyobowe na Ambasaderi Alfred Kalisa.

Mw’ ijambo yagejeje ku bari bateraniye aho, Ambasaderi Kalisa yasobanuye ko Abanyarwanda bose baba mu kindi gihugu, bishyira hamwe kugirango buzuzanye, bahuze ibitekerezo kandi bafatanye no guteza imbere igihugu cyababyaye bataretse n’ icyo babamo.

Mu zindi mpanuro yakomeje abaha, yagarutse ku kuba Diaspora ari umusingi w’iterambere ry’u Rwanda anabasaba kubyaza umusaruro amahirwe bafite aho batuye muri Angola, bityo bagateza imbere imiryango yabo n’igihugu muri rusange.

Yanijeje komite nyobozi ya Diaspora ko azakomeza kuyiba hafi, haba mu buryo bw’Ubujyanama cyangwa ubundi bwatuma irushaho kugera ku ntego zayo.

Ubwo amatora nyirizina yabaga, yasojwe Kalisa Didier yegukanye intsinzi ku mwanya wa Perezida, Bizimungu Jean Claude atorerwa kuba Visi Perezida, Nshizirungu Charles we atorerwa kuba Umunyamabanga, mu gihe Ndayisenga Jean Bosco yatorewe umwanya w’Umubitsi.

Hanatowe abajyanama batatu ari bo Karamuka Jean Paul, Mugabe Rubona Robert na Benoit Mustari, gusa habaho ikibazo cy’iyubahirizewa ry’ihame ry’uburinganire n’ubwuzuzanye hagati y’abagabo n’abagore, kuko nta mugore wabashije kugira umwanya yegukana mu yatorewe yose.

Nyuma yo gutorerwa kuba Umuyobozi wa Diaspora Nyarwanda muri Angola, Didier Kalisa, yavuze ko hamwe n’ubufatanye bwa Ambasade ndetse n’ubw’abagize ihuriro ry’abanyarwanda, bizafasha komite kugera ku ntego yo kwiteza imbere ndetse n’igihugu muri rusange.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244