Abanyarwanda batuye muri California bibutse Jenoside yakorewe Abatutsi mu 1994

Yanditswe na IGIHE
Kuya 21 Mata 2017 saa 08:47
Yasuwe :
0 0

Abanyeshuri biga muri California Baptist University mu Mujyi wa Riverside, muri Leta ya California, muri Leta Zunze Ubumwe za Amerika, abarimu babo, abanyarwanda n’abaturage kavukire bo muri ako gace; bahuriye mu muhango wo kwibuka abishwe muri Jenoside yakorewe Abatutsi mu 1994.

Ni umuhango wabaye tariki ya 13 Mata 2017, mu Mujyi wa Riverside, ubanzirizwa n’urugendo rwo kwibuka ndetse hanacanwa urumuri rw’icyizere. Habayeho kandi gufata umunota wo kwibuka no guha agaciro abambuwe ubuzima muri Jenoside yakorewe Abatutsi.

Muri uwo muhango hanatanzwe ubuhamya n’amagambo anyuranye yagiye agaruka ku buryo jenoside yateguwe, ikanashyirwa mu bikorwa, uko yahagaritswe ndetse n’aho u Rwanda rugeze rwiyubaka.

Abanyeshuri b’Abanyarwanda baba muri uwo mujyi, bagaragarije abari bitabiriye uwo muhango amateka y’u Rwanda yatumye Jenoside yakorewe Abatutsi iba, uko yateguwe n’uko yahagaritswe.

Mu kwereka abatazi u Rwanda uko abanyarwandakazi b’ubu bihangira imimo bagatuma igihugu cyabo kirushaho gutera imbere, herekanywe film yitwa “Mama Rwanda”, igaragaza uko abagore babiri bafatanya imirimo yabo yo mu rugo n’imishya bihangiye mu kwiteza imbere.

Uhagarariye Abanyarwanda batuye mu Majyepfo ya leta ya California, Dr. Octavien Ngarambe, yasobanuriye abari bitabiriye uwo muhango impamvu zatumye Jenoside yakorewe Abatutsi iba mu Rwanda ndetse abasaba guhangana n’abagifite ingengabitekerezo yayo.

Ati "Tugomba gufatanya tukarwanya ingengabitekerezo ya jenoside kuko hari abakiriho bagipfobya Jenoside yakorewe Abatutsi kandi ntibavugishe ukuri amateka yabaye.”

Umunyamerika akaba n’Umuyobozi Ushinzwe Abanyeshuri b’Abanyamahanga muri California Baptist University, Bryan Davis, yabwiye abari bateraniye aho ko isi yose igomba kurwanya ku buryo bwimazeyo ingengabitekerezo ya Jenoside kandi igahana mu mategeko abayipfobya.

Yavuze ko yatangajwe ndetse akanashimishwa n’uko yabonye u Rwanda rwarahindutse, rukabasha kwiyubaka nyuma y’amahano rwahuye nayo, rugatera imbere cyane kandi mu gihe gito.

Abari bitabiriye umuhango wo kwibuka Jenoside yakorewe Abatutsi basobanuriwe uko yateguwe, banerekwa ishusho y'u Rwanda nyuma yayo
Uyu muhango wari witabiriwe n'abanyarwanda n'inshuti zabo zituye mu Majyepfo ya Leta ya California
Uyu muhango kandi wanitabiriwe n'abanyeshuri b'Abanyarwanda biga muri California Baptist University

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244