Abanyarwanda bifatanyije n’abatuye i Johannesburg mu bikorwa by’isuku no gutera ibiti

Yanditswe na Mukaneza M.Ange
Kuya 17 Gashyantare 2018 saa 01:53
Yasuwe :
0 0

Abanyarwanda batuye mu mujyi wa Johannesburg muri Afurika y’Epfo, kuri uyu wa Gatandatu bifatanyije n’abaturage baho mu bikorwa by’isuku no gutera ibiti, hagamijwe kubungabunga ibidukikije.

Ibi bikorwa byiswe ‘A Re Sebetseng’ bisobanuye ngo ‘Mureke dukore’ bibaye ku nshuro ya kabiri bikaba bimara ukwezi kose, byatangijwe n’Umuyobozi w’umujyi wa Johannesburg, Herman Mashaba, afatiye urugero ku muganda ngarukakwezi umaze imyaka myinshi ukorwa mu Rwanda.

Abinyujije ku rubuga rwe rwa Twitter, Mashaba washimiye Ambasaderi w’u Rwanda muri Afurika y’Epfo, Vincent Karega n’Abanyarwanda bitabiriye ibi bikorwa. Yagarutse ku nkomoko yabyo anavuga ko ikigamijwe ari ukongera kubaka Johannesburg, ikaba umujyi urangwa n’isuku n’ibidukikije bimeze neza.

Ati “ Ni iby’agaciro kwifatanya na ambasaderi w’u Rwanda, Vincent Karega. Ni Kigali yadufashije gutegura gahunda ya #AReSebetseng. N’ibyagaciro kuba turi kumwe na bo uyu munsi.”

Amb. Karega na we yagaragaje ko ari iby’agaciro kuba Abanyarwanda bifatanyije n’abatuye mu gukora isuku muri uyu mujyi ndetse avuga ko ari uburyo bwo kwamamaza umuganda mu bindi bihugu.

Karega kandi yavuze ko iki gikorwa kitagaragaza isuku gusa, ahubwo ari n’ikimenyetso cy’ubufatanye hagati y’abaturage b’ibihugu byombi ndetse binagaragaza imikoranire myiza n’umuyobozi bw’Umujyi wa Johannesburg.

Uretse Abanyarwanda, ibi bikorwa by’isuku byabereye mu gace ka Diepsloot byanitabiriwe n’abaturage bo mu bindi bihugu birimo Mali ndetse na ambasaderi w’iki gihugu muri Afurika y’Epfo, Mahamane Aoudou Cisse.

Abitabiriye umuganda bibanze ku bikorwa byo gusukura Umujyi wa Johannesburg
Amb. Karega na we yagaragaje ko ari iby’agaciro kuba Abanyarwanda bifatanyije n’abatuye mu gukora isuku muri uyu mujyi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza