Kwamamaza

Ambasade y’u Rwanda mu Buholandi yizihije imyaka 10 imaze ihakorera(Amafoto)

Yanditswe kuya 5-11-2016 saa 20:26' na Karirima A. Ngarambe


Kuva mu 2006, u Rwanda rufite Ambasade mu Buholandi imaze kugira uruhare runini mu gushimangira umubano w’ibihugu byombi no kumenyekanisha u Rwanda mu bihugu by’amahanga.

Mu muhango wo kwizihiza isabukuru y’imyaka 10 ishize u Rwanda rufite Ambasade muri iki gihugu, abayobozi batandukanye barimo abo muri Guverinoma y’u Buholandi, abahagarariye ibihugu byabo n’imiryango Mpuzamahanga, inshuti z’u Rwanda n’Abanyarwanda batuye muri iki gihugu; bahuye barebera hamwe urugendo rwatewe muri iyi myaka.

Ambasaderi Jean Pierre Karabaranga uhagarariye u Rwanda muri icyo gihugu yabwiye IGIHE nyuma y’ifungurwa rya Ambasade hashoboye kubaho ingendo zitandukanye ku bayobozi b’ibihugu byombi. Ariko by’umwihariko habayeho urugendo rukuru rwa Perezida Paul Kagame rwaje gushimangira imibanire hagati y’ibihugu byombi.

Abayobozi b’Abaholandi nabo bagiye basura u Rwanda mu bihe bitandukanye mu ngendo zigamije ubufatanye hagati y’ibihugu byombi.

Ambasaderi Karabaranga yavuze ko kwizihiza iyi sabukuru wari umwanya wo gusobanurira abantu bose aho u Rwanda rugeze mu iterambere.

Ati « Wari umwanya wo kubwira n’abandi bantu batarasobanukirwa aho u Rwanda rugeze n’umwanya wo kwerekana isura nshya y’igihugu cyacu , kongera guhuza inshuti z’u Rwanda tukaganira, bakava hano nabo bajya kuba ba ambasaderi bacu, Ni n’umwanya wo kuganira n’imiryango mpuzamahanga […] guhura n’abashoramari kugira ngo bakomeze baze cyangwa n’abataraza bazaze mu Rwanda. »

« Uyu munsi ni umunsi w’ibyishimo kandi wo kumurika ibikorwa na gahunda z’imishinga iri imbere. Twishimye cyane kuko abantu bawitabirye ku bwinshi byerekana agaciro baha igihugu cyacu. Abataragera mu Rwanda benshi bafashe umwanzuro wo kuzarusura. Twizera ko indi myaka 10 itaha izazana byinshi byiza kurushaho. »

Uyu muhango waranzwe n’ubusabane hagati y’inshuti z’u Rwanda ku rwego rwa Dipolomasi n’abafatanyabikorwa ndetse n’abashoramari.

U Buholandi busanzwe butera inkunga u Rwanda mu nzego zitandukanye zirimo ubutabera nk’aho mu 2014 ibihugu byombi byasinyanye amasezerano y’ubufatanye.

Muri uwo mwaka, bwari bwahaye Leta y’u Rwanda inkunga ya miliyoni 20 z’amayero yo kubaka ubushobozi bw’inzego z’ubutabera, ubwiyunge n’urwego rw’umutekano.

Bwanatanze kandi inkunga ya miliyoni 5 z’Amayero yo gutera inkunga imishinga yo gusakaza amashanyarazi, mu cyiswe “Energy Access and Roll out Program (EARP3)”. Ni amasezerano yashyizweho umukono kuwa 1 Ugushyingo 2014.

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved