Amb. Nduhungirehe yaganiriye n’abanyarwanda ku byarushaho guteza imbere diaspora

Yanditswe na Uwishyaka Jean Louis
Kuya 4 Ukwakira 2016 saa 10:48
Yasuwe :
0 0

Ambasaderi w’u Rwanda mu Bubiligi, Olivier Nduhungirehe, yatangiye ingendo mu turere dutandukanye tw’u Bubiligi aganira n’Abanyarwanda bahatuye ku iterambere bamaze kugeraho n’imbogamizi bahura nazo.

Izi ngendo Ambasaderi Nduhungirehe yazitangiye kuri uyu wa 1 Ukwakira 2016, i Mons, mu Ntara ya Hainaut.

Mu kiganiro na IGIHE, Ambasaderi Nduhungirehe yavuze ko icyo izi ngendo zigamije ari ukuganira n’Abanyarwanda akumva ibyo bamaze kugeraho, impungenge n’imbogamizi baba bafite zibabuza kugera ku byo bifuza.

Ati "Ubutumwa bwanjye nka Ambasaderi ni ukugira ngo turebe niba twumva kimwe icyo Diaspora Nyarwanda bisobanura, abayigize abo ari bo.Nababwiye ko mbere na mbere duhuje igihugu, duhuje ururimi, amateka n’umuco, icyo kikaba ikintu kigomba kuduhuza hatarimo imbogamizi cyangwa se andi macakubiri aterwa n’ibintu bitandukanye. Nabakanguriye rero gukomeza ubwo bumwe bw’Abanyarwanda bwatuma bagira icyo bageraho cyiza. "

Mu Bubiligi habarizwa Abanyarwanda barenga ibihumbi 35, umubare Ambasaderi Nduhungirehe avuga ko ari munini, ukwiye kujyana n’ibikorwa byisumbuyeho.

Ati "Ni Diaspora nini, bivuze ko tugomba kugira ubushake n’ibikorwa byisumbuye mu nzego nyinshi, ari ibijyanye n’umuco, kwigisha abana ururimi, amateka mu matorero, tutibagiwe ibikorwa bishamikiye ku mateka y’u Rwanda nk’umuganda n’ibindi. "

Yatanze urugero ku muganda avuga ko usanga ari ikintu gituma abanyarwanda mu turere batuyemo bagirana ubufatanye n’ubuyobozi bw’imijyi barimo mu ngeri zitandukanye.

Yanashimye ibikorwa bitandukanye byagizwemo uruhare n’Abanyarwanda birimo nko gutangira ubwisungane mu kwivuza Abanyarwanda batishoboye n’ibindi.

Ambasaderi Nduhungirehe avuga ko muri izi ngendo azaganira n’Abanyarwanda ku ngingo zitandukanye zirimo kwita ku bukungu, gukora imishinga ibyara inyungu, gushyiraho amatsinda y’ishoramari, sosiyete y’ubucuruzi n’ibindi bikorwa bihuriweho n’abishyize hamwe bikabyazwa umusaruro rusange.

Ibi biganiro byatangiriye mu Mujyi wa Mons, byaranzwe no kuganira ku buryo abana bavukiye muri iki gihugu bajya bigishwa ururimi rw’ikinyarwanda, cyane bitangiriye mu miryango ndetse no kujya babohereza kenshi mu Rwanda kugira ngo bakivuge ndetse banasure igihugu cyabo.

Ambasaderi Nduhungirehe yasabye abanyarwanda baba muri iki gihugu kujya bagana Ambasade yabo kugira ngo bahabwe serivisi baba bakeneye, abasaba kwima amatwi ababa bashaka kubacengezamo amatwara y’urwango ndetse no kubangisha ubuyobozi bwabo.

Ambasaderi Nduhungirehe ati "Nababwiye ko hariho amashyaka ya Politiki hano akora poropaganda y’ikinyoma babeshya abanyarwanda kugira ngo bategera inzego z’ubuyobozi bwabo bwa Ambasade cyangwa ngo bajye iwabo mu Rwanda. Ibi rero nubwo twabiganiriyeho ariko tuzagenda tubigarukaho mu zindi ngendo nsigaje gukora kugira ngo bifatirwe umwanzuro. Nyuma y’izi ngendo kandi nzahura n’ubuyobozi bwa DRB-Rugali ku rwego rw’igihugu mu Bubiligi tubishakire umuti."

Nyuma yo gusura umujyi wa Mons, Ambasaderi Nduhungirehe azakurikizaho gusura abanyarwanda batuye mu mujyi wa Namur, tariki ya 15 ukwakira 2016.

Ambasaderi Nduhungirehe yibukije ababyeyi kujya bigisha abana babo Ikinyarwanda
Basabwe kwima amatwi abashaka kubayobya no kubangisha ubuyobozi bwabo
Byari ibyishimo ku banyarwanda bo mu mujyi wa Mons bari basuwe na Ambasaderi Nduhungirehe
Abana basabiwe kujya bazanwa mu Rwanda kenshi kugira ngo barusure banamenye ikinyarwanda

Kanda hano urebe Video y’ikiganiro IGIHE yagiranye na Ambasaderi w’u Rwanda mu Bubiligi, Olivier Nduhungirehe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244