Amsterdam: Abanyarwanda baratiye amahanga ihame ry’uburinganire rimaze gushinga imizi

Yanditswe na Ishimwe Israel
Kuya 9 Ugushyingo 2016 saa 02:59
Yasuwe :
0 0

Abanyarwanda baba muri Diaspora yo mu Buholandi bitabiriye igikorwa cya “Africa Day 2016”, gihuza abantu baturutse mu bihugu byo muri Afurika n’i Burayi ndetse no mu miryango Mpuzamahanga Nterankunga, bagaragariza amahanga ko u Rwanda rumaze gutera intambwe ntageraranywa mu gushyigikira ihame ry’uburinganire.

Iki gikorwa ngarukamwaka gitegurwa n’Ikigega Max van der Stoel, cyabereye muri Kaminuza ya Royal Tropical muri Amsterdam tariki ya 5 Ugushyingo 2016 cyibanze cyane ku mikoranire hagati ya Afurika n’Umuryango w’Ubumwe bw’u Burayi (EU).

Mu birori byo kwizihiza uyu munsi ku nshuro ya gatatu kuva washyirwaho muri 2013, haganiriwe kandi ku ndangagaciro mpuzamahanga, zishingiye kuri demokarasi, iterambere ndetse n’ibiganiro bihuriweho na sosiyete sivile, ndetse na diaspora z’ibi bihugu.

Ibi biganiro byari byitabiriwe n’abayobozi batandukanye, barimo n’abayobora Ambasade y’u Rwanda na Diaspora Nyarwanda mu Buholandi.

Abanyarwanda batanze ikiganiro cyari gifite insanganyamatsiko igaragaza “Urugendo rw’uburinganire bw’abagore n’abagabo mu Rwanda”.

Mu kiganiro IGIHE yagiranye na bamwe mu batanze ibiganiro baturutse mu Ishyirahamwe rya Diaspora Nyarwanda mu Buholandi baratiye abandi aho iterambere ry’uburinganire mu Rwanda rigeze.

Joséphine Abahujinkindi yatangaje ko yitabiriye ibi biganiro agamije kwerekana ko u Rwanda ruhagaze neza ku bijyanye n’uburinganire n’iterambere ry’abagore.

Mu ngingo yagarutseho yagaragaje uruhare rw’abagore bo mu Rwanda muri politiki no mu nzego zindi z’ubuyobozi, mu guteza imbere ubukungu bw’igihugu no kurwanya ubukene.

Ibi kandi byashimangiwe na Emma Gakuba watangaje ko ibi biganiro byabafashije mu kumenyekanisha intera ikomeye u Rwanda rumaze kugeraho mu rwego rw’uburinganire bw’abagore n’abagabo mu gihugu.

Yavuze ko ibigereranyo bigaragaza uburyo abagore n’abakobwa bafite umwanya mu nzego zose z’iterambere ry’igihugu bikaba bibateye ishema n’umwete wo gushishikarira gufatanya na basaza babo mu kubaka igihugu no kurwanya ivangura iryo ari ryo ryose.

Kuri ubu u Rwanda ruza ku mwanya wa mbere ku Isi mu bihugu bifite umubare munini w’abagore mu Nteko Ishinga Amategeko bagera kuri 64%, abaminisitiri b’abagore ni 40%, abacamanza b’abagore ni 50% n’ahandi henshi babarizwa mu nzego zitandukanye.

Abari bitabiriye ibiganiro banyuzwe n’ubuhamya bwatanzwe bugaragaza uburyo ubuyobozi bw’u Rwanda bwateje imbere ihame ry’imiyoborere myiza na gahunda za Leta zigashyirwa mu bikorwa mu gihugu hose no mu nzego zose ndetse na politiki y’uburinganire bw’abagore n’abagabo no kwigira kw’abagore ikarushaho kwimakazwa.

U Rwanda rwabonye ko umugore uhawe ububasha akora ikinyuranyo kandi Abanyarwandakazi bagira uruhare mu bukungu bw’igihugu binyuze mu mirenge SACCO, aho baka inguzanyo mu rwego rwo kwiteza imbere.

Abari muri iki kiganiro batangariye ibyagezweho mu Rwanda mu gihe cy’imyaka 22 gusa ishize igihugu kivuye mu mateka atoroshye harimo Jenoside yakorewe Abatutsi muri 1994.

Emma Gakuba, Umunyarwandakazi uba mu Buholandi watanze ikiganiro ku ihame ry'uburinganire
Josephine Abahujinkindi yatangaje ko ihame ry'uburinganire hagati y'umugabo n'umugore ryashinze imizi
Mukamana sophie wayoboye ibiganiro

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza