Canada: Abanyarwanda batuye mu mujyi wa Edmonton bizihije umunsi wo Kwibohora

Yanditswe na Ishimwe Israel
Kuya 11 Nyakanga 2016 saa 12:09
Yasuwe : XX
91 55

Abanyarwanda batuye mu Mujyi wa Edmonton muri Canada bazindukiye mu birori byo kwizihiza imyaka 22 u Rwanda rumaze rwibohoye kuwa Gatandatu taliki ya 9 Nyakanga 2016.

Ibirori byabimburiwe n’umukino wahuje Together F.C na Victory F.C, amakipe agizwe n’urubyiruko rw’Abanyarwanda rutuye mu Mujyi wa Edmonton.

Ibiganiro byinshi byahatangiwe byashimangiye Ukwibohora nyako ndetse n’icyo bisobanuye ku Munyarwanda.

Umuyobozi wa Diaspora y’u Rwanda muri Edmonton, Jean Baptiste Kijuli ubwo yagezaga ijambo nyamukuru ku bitabiriye ibi birori yagarutse ku butwari bw’ingabo zahoze ari iza FPR Inkotanyi zari zirangajwe imbere na Nyakubahwa Paul Kagame zashoboye guhagarika Jenoside yakorewe Abatutsi.Yavuze ko nta muntu uzasubiza inyuma iterambere u Rwanda rumaze kugeraho.

Ati "Abifuzaga ko u Rwanda rusibangana ku ikarita y’isi baratsinzwe. Kandi n’undi wese wifuza kuzasubiza inyuma intambwe ishimishije u Rwanda rumaze kugeraho, azatsindwa nta kabuza".

Yakomeje asaba abanyarwanda batuye Edmonton guhora bihesha agaciro aho bari hose bagahesha n’igihugu cy’amavuko.

Umukino wabimburiye ibi birori wahuje ikipe ya Together F.C na Victory F.C warangiye Together F.C itsinze Victory FC ibitego 3 kuri 2. Mu mwaka wa 2015, ku munsi wo Kwibohora, Victory F.C yari yatsinze Together F.C.

Jean Baptiste Kijuli ubwo yashyikirizaga igikombe ikipe ya Together F.C yabashimiye uburyo bitwaye mu kibuga.

Yashimiye urubyiruko rwitabiriye Umunsi wo Kwibohora ndetse abasaba kuzahora bazirikana uwo munsi ushimangira amateka mashya ndetse no gutsindwa kw’ingabo zicaga abanyarwanda mu mwaka 1994.

Ikipe ya Together F.C na Victory F.C mu ifoto rusange
Perezida wa Diaspora muri Edmonton, John Kijuli ashyikiriza igikombe kapiteni wa Together F.C
Abakapiteni bafata ifoto y’urwibutso nyuma y’umukino wabanjirije ibirori by’umunsi wo kwibohora muri Edmonton

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE