Ibyo twagezeho mu myaka 22 tubikesha ubuyobozi bufite icyerekezo- Amb. Kimonyo

Yanditswe na Kanamugire Emmanuel
Kuya 9 Nyakanga 2016 saa 06:11
Yasuwe : XX
91 55

Abanyarwanda basaga 500 n’inshuti z’u Rwanda, bahuriye i Nairobi muri Kenya, mu birori byo kwizihiza ku nshuro ya 22 umunsi mukuru wo kwibohora k’u Rwanda.

Ibyo birori byabaye ku wa Gatanu tariki ya 8 Kamena 2016, aho Ambasaderi w’u Rwanda muri Kenya, James Kimonyo, yashimiye Abanyarwanda n’inshuti zabo baje kwifatanya mu kwizihiza uwo munsi.

Yagize ati “Amezi atatu arashize duhaye icyubahiro inzirakarengane zazize Jenoside yakorewe Abatutsi , ubu ni igihe cyo gushimira umuhate no kutihugiraho byaranze abagore n’abagabo ba FPR Inkotanyi bahagaritse ubwo bwicanyi, bagatangiza amateka y’urugendo rushya rugamije kubaka u Rwanda rushya rubereye bose.”

Kugera kuri iyo ntsinzi ngo byatewe no kubahiriza ihame ngenderwaho rigeza ku kwibohora, ari ryo kwiyemeza kubiharanira, ndetse rimwe na rimwe bisaba ibitambo.

Guhurira muri ibyo birori byari bigamije gushima ku buryo budasanzwe, ubutwari bwaranze izo ngabo, zaharaniye kugeza igihugu ku bwisanzure no kugihesha agaciro.

Kimonyo yibukije ko amateka mabi u Rwanda rwanyuzemo yatewe n’abakoloni ndetse n’abayobozi babi u Rwanda rwagize muri repubulika ya mbere n’iya kabiri batubahirizaga uburenganzira bwa muntu, bategura ubwicanyi bwambuye ubuzima bamwe mu Banyarwanda.

Guharanira ko ibyo bitakongera i Rwanda, ni kimwe mu byateye ingabo za FPR Inkotanyi gutangiza urugamba rwo kubohora igihugu.

Muri ibyo birori herekanywe film yafashwe mu 1991 mu gihe bari ku rugamba, ubwo Perezida Paul Kagame wari uyoboye ingabo za FPR Inkotanyi yazisabaga kurangwa n’ibikorwa bitandukanye n’iby’ubutegetsi barwanyaga.

Icyo gihe yabahaye urugero ko nta kuntu warwanya umujura nawe ngo birangire ubaye we kuko ntacyo waba uharanira.

Kimonyo yerekanye ko u Rwanda rumaze kugera kuri byinshi bitewe no kugira abayobozi beza bafite icyerekezo ndetse n’ubunararibonye mu kuyobora.

Depite Aden Duale, uhagarariye umujyi wa Garissa wari umushyitsi mukuru muri ibyo birori yashimye Abanyarwanda n’ubuyobozi bwabo bwaranzwe no kwigira mu myaka 22 ishize.

Yavuze ko u Rwanda rwongeye kubaka amateka yarwo ruvuye mu muyonga, ruteza imbere abarwo, rugera aho ruba igihugu kireberwaho n’ibindi byinshi muri Afurika.

Yagize ati “Niyo mpamvu u Rwanda ruzakira inama ya 27 y’Umuryango wa Afurika Yunze Ubumwe(AU) mu minsi mike.”

Uwo muhango witabiriwe n’abayobozi batandukanye barimo abayobozi ba Kenya, abahagarariye ibihugu byabo muri icyo gihugu,abadipolomate n’Abanyarwanda baba muri Kenya.

Ibirori byaranzwe n’ubutumwa bwakirizwaga imbyino gakondo zo muri Kenya, umuhanzi Kidumu Kibido ndetse n’itsinda rya Sauti Sol ryaririmbye indirimbo ryahimbye irata impano n’ibigwi bya Perezida Paul Kagame mu kuyobora u Rwanda.

Ambasaderi Kimonyo ageza ubutumwa ku bitabiriye umuhango wo kwizihiza umunsi wo kwibohora
Inzego zitandukanye zifatanyije n'Abanyarwanda mu kwizihiza umunsi wo kwibohora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE