Abanyarwanda baba mu Bwongereza bizihije umunsi wo kwibohora

Yanditswe na Kanamugire Emmanuel
Kuya 20 Nyakanga 2016 saa 09:54
Yasuwe :
0 0

U Rwanda rufite icyerecyezo cyo gukomeza gutera imbere mu nzego zitandukanye haba mu bukungu, uburezi, uburinganire, ubuzima, ibikorwaremezo n’ibindi bitandukanye.

Mu muhango wo kwizihiza umunsi wo kwibohora ku nshuro ya 22, bikozwe n’Abanyarwanda baba mu Bwongereza, Ambasaderi w’u Rwanda muri iki gihugu, Yamina Karitanyi , yavuze ko umunsi wo kwibohora atari umwanya wo kwishima gusa, ko ahubwo ari n’umwanya wo gusubiza amaso inyuma hatekerezwa ku nzira igihugu cyanyuzemo, ndetse n’icyo bisaba kugira ngo gikomeze kugera ku cyerekezo cyihaye.

Uyu muhango wateguwe na Ambasade y’u Rwanda mu Bwongereza, witabiriwe n’Abanyarwanda ndetse n’inshuti zabo, harimo abakuru n’urubyiruko baba abaturutse kure n’abaturutse hafi hatekerezwa ku byo u Rwanda rwagezeho mu myaka 22 ishize.

Mu ijambo yagejeje ku bawitabiriye bagera kuri 400, Amb. Karitanyi, yasabye abantu bose kugira ibintu ibyabo no kugira uruhare mu hazaza h’igihugu, ndetse ko bakwiye kukorera ibyiza u Rwanda bashobora kugeraho yaba umuntu ku giti cye cyangwa bashyize hamwe.

Ambasaderi Karitanyi yakomeje avuga ko Abanyarwanda aho bari hose ku isi bafite byinshi byo kwishimira birimo gahunda za guverinoma y’u Rwanda zidaheza, iterambere mu buringanire, imiyoborere na politiki byiza, umutekano, uburezi kuri bose, ubuvuzi n’impinduka mu bukungu, byose byubakiye ku kwishakamo ibisubizo na ‘Ndi Umunyarwanda’ Abanyarwanda basangiye.

Yagize ati “Nubwo u Rwanda rwageze kuri byinshi kugeza ubu, ruracyafite inzira ndende, ndetse ubu nicyo gihe cyo kubigiramo uruhare, nk’uko hari ugusaranganya inshingano mu buryo bungana zo kongera kubaka u Rwanda mu Banyarwanda ku isi hose.”

Abitabiriye uyu muhango basusurukijwe n’imbyino za gakondo z’itorero Abeza rituruka muri Nottingham, ubusizi n’indirimo zirimo izaririmbwe n’abahanzi Nyarwanda barimo Jean Paul Samputu,Kitoko ndetse n’umuhanzi Jennifer Kamikazi.

Abitabiriye uyu muhango bagezwaho ijambo na Ambasaderi Karitanyi
Basusurukijwe n'imbyino gakondo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza