New York: Hibutswe Jenoside yakorewe Abatutsi, u Rwanda rushimirwa ubumwe n’ubwiyunge rwahisemo

Yanditswe na IGIHE
Kuya 30 Mata 2019 saa 09:42
Yasuwe :
0 0

Abanyarwanda n’inshuti z’u Rwanda batuye mu mujyi wa Buffalo i New York muri Leta Zunze Ubumwe za Amerika, bibutse ku nshuro ya 25 Jenoside yakorewe Abatutsi, Abanyarwanda bashimirwa ko bahisemo inzira yo kwiyunga.

Ni igikorwa cyabereye muri Kaminuza ya Buffalo State cyitabirwa n’abantu biganjemo Abanyarwanda, Abanyafurika n’abandi bakomoka mu bihugu bitandukanye batuye i Buffalo no mu mijyi ihegereye.

Mu bitabiriye uyu muhango kandi barimo Umuyobozi w’iyo Kaminuza, Dr Kate Conway-Turner.

Prof Aimable Twagilimana, umwarimu muri iyo Kaminuza yagarutse ku buryo uburezi bukwiye gukoreshwa mu kurwanya abahakana n’abapfobya Jenoside yakorewe Abatutsi.

Yifashishije videwo yitwa “words that kill” (bisobanura ngo amagambo yica), agaragaza uburyo abanyapolitiki n’itangazamakuru bya mbere y’1994 byashishikarije abaturage urwango no kurimbura Abatutsi.

Umuyobozi wa Kaminuza ya Buffalo State Dr Kate Conway-Turner yavuze ko yakozwe ku mutima n’ibyo yiboneye ubwe ubwo yasuraga urwibutso rwa Jenoside rwa Kigali ruri ku Gisozi umwaka ushize, agaragaza ko kwibuka ari ngombwa.
Yagize ati “Ndashimira mu buryo bukomeye uburyo Abanyarwanda bagaragaza kubabarira no kwiyunga ngo bubake igihugu cyabo nyuma ya Jenoside yakorewe Abatutsi.”

Inshuti y’u Rwanda Prof Drew Kahn, umwarimu muri Buffalo State University akaba n’Umuyobozi w’Umuryango “Anne Frank Project” ujyana buri mwaka mu Rwanda Abanyeshuri ngo basobanukirwe kurushaho Jenoside yakorewe Abatutsi, yavuze ko abatuye umujyi wa Buffalo bagenda barushaho kumenya u Rwanda no kurukunda.

Yavuze ko abo banyeshuri iyo bagarutse mu gihugu cyabo basangiza abarimu bo mu mashuri abanza n’ayisumbuye amasomo baba barakuye mu Rwanda.

Abanyeshuri babiri basuye u Rwanda bafashijwe n’Umuryango “Anne Frank Project”, bavuze ko bababajwe n’ibyo babonye ubwo basuraga urwibutso rwa Gisozi na Nyamata, baboneraho gukangurira abari aho kujya batahura imvugo n’ibikorwa bipfobya bikanahakana Jenoside yakorewe Abatutsi bakabirwanya.

Chantal Mudahogora wacitse ku icumu rya Jenoside yakorewe Abatutsi, yavuze ibihe bikomeye yaciyemo n’uburyo yatakaje benshi bo mu muryango we, ashimira ubwitange bw’ingabo zari iza FPR Inkotanyi zamurokoye, anashimira Abanyarwanda na Leta y’u Rwanda aho bageze bubaka igihugu kuko Jenoside ikirangira yabonaga ko u Rwanda rutazazanzamuka.

Uwari uhagarariye itsinda ryateguye icyo gikorwa cyo Kwibuka, Pascal Karangwa yashimiye abitanze bose ngo gitungane n’abari bacyitabiriye kandi yizeza inshuti z’u Rwanda zari aho ubufatanye igihe cyose bazabisabwa.

Uwo muhango wo kwibuka Jenoside yakorewe Abatutsi wabereye mu mujyi wa Buffalo witabiriwe n’abagera kuri 200.

Umuyobozi wa Kaminuza ya Buffalo State, mu mwambaro wa Kinyarwanda ageza ijambo ku bitabiriye igikorwa cyo kwibuka i Buffalo, muri Leta ya New York.
Professor Aimable Twagirimana ni we wayoboye ibiganiro
Madamu Chantal Mudahogora ni we watanze ubuhamya bw'uko yarokotse Jenoside yakorewe Abatutsi
Pascal Karangwa nk’uwari uhagarariye itsinda ryateguye icyo gikorwa, arashimira abafashije mu itegurwa ryacyo n’abacyitabiriye
amwe mu bari bitabiriye kwibuka abazize Jenoside yakorewe Abatutsi mu Rwanda mu w’1994 i Buffalo, New York

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza