Kwamamaza

Sénégal: Abanyarwanda basabwe gusakaza umuco wo gukora umuganda

Yanditswe kuya 13-07-2016 saa 17:09' na Karirima A. Ngarambe


Ambasade y’u Rwanda muri Sénégal, ifatanyije na Minisiteri y’Ibidukikije n’Iterambere rirambye muri iki gihugu, bakoze umuganda udasanzwe mu kwizihiza umunsi mpuzamahanga w’ibidukikije, wabereye muri Parike ya Hann muri Komini ya Hann Bel-Air mu mujyi wa Dakar.

Uyu muganda witabiriwe n’ibigo binyuranye bya Leta, Imiryango yigenga iharanira kurengera ibidukikije, abahagarariye ibihugu byabo, Abanyarwanda n’Abanya-Sénégal b’ingeri zose, ukaba waratangijwe na Minisitiri Abdoulaye Balde afatanije na Ambasaderi w’u Rwanda muri Sénégal, Dr. Mathias Harebamungu.

Wamaze amasaha agera kuri atatu basukura bimwe mu bice bigize Pariki ya Hann.

Itsinda ry’abahanzi b’Abanya-Sénégal rizwi ku izina rya ‘Les Frères Guissé’ babinyujije mu ikinamico, berekanye akamaro k’ibidukikije ku buzima bwa muntu.

Umuyobozi w’iri tsinda, Cheikh Tidiane Guissé yashimye Abanyarwanda kuba baragaragaje ubudashya n’ubudashyikirwa mu kugira isuku, kurinda inyamaswa no kubungabunga ibidukikije.

Yasabye ko u Rwanda rwazababera umushyitsi mukuru mu gikorwa ngarukamwaka kizwi nka Festver; kigamije gukangurira abantu kurengera ibidukikije kifashishije ubuhanzi n’ubugeni.

Umuyobozi wa Komini ya Hann Bel-air, Babacar Mbengue yashimangiye mu ijambo rye ko hari byinshi Afurika igomba kwigira ku Rwanda birimo isuku, umutekano ndetse no kubungabunga ibidukikije.

Minisitiri Balde yashimiye, Ambasaderi Dr. Harebamungu ndetse n’Abanyarwanda bitabiriye uyu muhango ari benshi bakanagaraza ubunararibonye mu gikorwa cy’umuganda. Yabasabye ko bamufasha kwamamaza umuganda mu bice bitandukanye bya Sénégal.

Yavuze ko umuganda wabo werekanye imbaraga u Rwanda rushyira mu kubungabunga ibidukikije maze asaba abari aho gukomeza gufatanya bakarwanya burundu abashimusi b’inyamaswa n’abangiza ibidukikije.

Ambasaderi Dr. Mathias Harebamungu yasobanuriye abitabiriye umuganda amavu n’amavuko yawo mu Rwanda, agaragaza n’uruhare wagize mu bumwe n’iterambere ry’Abanyarwanda.

Amb. Harebamungu yashimiye byimazeyo Leta ya Sénégal kuba yaratumiye Abanyarwanda mu gikorwa cy’umuganda ndetse ashimira n’abakitabiriye. Yahamagariye abari aho, cyane cyane urubyiruko, kuba intangarugero aho bakomoka mu kurengera ibidukikije ndetse abizeza ko Abanyarwanda batuye muri Sénégal bazakomeza kubaba hafi mu rugamba rwo kubungabunga ibidukikije.

Mu gusoza uyu muhango, Minisitiri Balde yashyikirije Ambasaderi w’u Rwanda igikombe nk’ishimwe ry’ubudashyikirwa bw’u Rwanda no gushimangira umubano uri hagati y’ibihugu byombi.

Umunsi mpuzamahanga wo kubungaunga ibidukikije wizihizwa ku ya 5 Kamena buri mwaka. Washyizweho n’umuryango w’Abibumbye muri 1972, ugamije gushishikariza isi yose kurengera ibidukikije no guhangana n’imihindagurikire y’ibihe.

Minisitiri w’Ibidukikije, Abdoulaye Balde na Ambasaderi Harebamungu bayoboye abandi mu muganda rusange wo gusukura pariki ya Hann
Umuganda ufite gakondo mu Rwanda ukomeje kubera amahanga icyitegererezo
Umuganda witabiriwe n'abantu b'ingeri zitandukanye
Ambasaderi w’u Rwanda muri Sénégal, Dr. Mathias Harebamungu ageza ijambo ku bitabiriye umuganda
Abanyarwanda bavuzwe imyato ku ruhare bagize mu kubungabunga ibidukikije
Dr Mathias Harebamungu yijeje abanyaSénégal ubufatanye mu kubungabunga ibidukikije
Minisitiri w’Ibidukikije, Abdoulaye Balde ashyikiriza Ambasaderi Harebamungu igikombe cy’ishimwe

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: info@igihe.com, marketing@igihe.com

Website Developped by

Uru Rubuga Ruheruka Gushyirwaho Amakuru Thursday 13 Ukwakira 2016
Copyright © 2009 -2014 - IGIHE Ltd - All Rights Reserved