Kwamamaza

U Bufaransa: Umunyarwanda yiyemeje gutanga umusanzu mu iterambere ry’ubuvuzi mu Rwanda

Yanditswe kuya 1-11-2016 saa 17:26' na Karirima A. Ngarambe


Mu rwego rwo guteza imbere ubuvuzi mu Rwanda, Dr Nsengiyumva Charles, umwe mu Banyarwanda b’inzobere muri uyu mwuga, uyobora Umuryango wa AME-International utanga serivisi zitandukanye z’ubuvuzi yatangaje ko azakomeza gutanga ubumenyi bwisumbuye ku bakora muri uru rwego.

AME-International ni umuryango ukora ubutabazi, ugatanga amahugurwa no kongera ubumenyi mu bikorwa bijyanye no kuvura indwara z’abagore (gynécologie), kanseri y’ibere (sénologie), ibyo gutera ikinya (anesthésie), no kubaga (chirurgie).

Mu mishinga yawo, uyu muryango washyizeho gahunda zifatika z’ubufatanye bwihuse mu buvuzi bw’ibice bitandukanye kandi ku buryo bwihariye, zigamije kongera imbaraga no gutanga ubumenyi mu bihugu biri mu nzira y’amajyambere, gushyiraho amatsinda arimo abafite ubunararibonye mu buvuzi baturuka muri za Kaminuza i Strasbourg, ndetse no guha Afurika amahugurwa ku rwego rwiza mu buryo buhoraho.

Umuyobozi wa AME-International, Dr Nsengiyumva Charles avuga ko bamaze imyaka itanu batanga ubufasha muri serivisi zitandukanye zirimo izijyanye no gutanga amahugurwa yo kuvura indwara ya Fistule (kujojoba), mu buryo bugezweho.

Dr Nsengiyumva na bagenzi be kandi bafashije umwe mu baganga bazobereye mu kubaga kujya i Strasbourg mu Bufaransa mu mahugurwa y’amezi atatu, ahava atangiye kubaga za fistules wenyine.

Buri mwaka, iri tsinda riyobowe na Dr Nsengiyumva Charles riza rimwe gukorana n’abaganga b’Abanyarwanda.

Dr Nsengiyumva yatangaje ko bateganya no kujya gukorera mu bitaro bya Nyamata mu Karere ka Bugesera. Amasomo batanga akurikirwa n’ubumenyi ngiro aho bafasha abaganga n’abaforomo bahuguwe gutangira kuvura abarwayi mu gihe gito.

Umuyobozi w’Ihuriro ry’Abanyarwanda baba mu Mahanga, Alice Cyusa, yatangarije IGIHE ko yishimiye cyane igitekerezo cya Dr Nsengiyumva cyo kwagura urubuga rw’ubuvuzi mu Rwanda yongerera abaganga ubumenyi.

Yagize ati “Ibikorwa nk’ibi bya Dr Nsengiyumva bigomba guhabwa agaciro. Ndashishikariza kandi abandi banyamwuga n’abafite ubumenyi bwihariye, gukomeza gutanga inkunga yabo, basangiza ubumenyi bwabo bagenzi babo bari mu Rwanda, muri gahunda yo guhanahana no kungurana ubumenyi. Ubu hakenewe cyane abaganga bavura abagore ndetse n’inzobere mu kubaga.

AME International itera inkunga imishinga itandukanye igamije kongerera ubumenyi abaganga mu bihugu bya Afurika birimo Sénégal, Togo, Côte d’Ivoire n’ibindi.

Umuryango AME - International ufite icyicaro mu Bufaransa, washinzwe mu 1998, uyoborwa na Dr Nsengiyumva Charles, afatanyije n’abandi baganga bo mu mavuriro y’i Strasbourg barimo Dr Jacques Raiga, ariwe Visi Perezida muri uyu muryango, Prof. Pierre Diemunsch , Umubitsi na Dr Pascal Wittersheim, Umunyamabanga Mukuru.

Umuyobozi w’Umuryango AME – International, Dr Nsengiyumva Charles, atangaza ko bafite imishinga myinshi yo guteza imbere ubuvuzi mu Rwanda binyuze mu guhugura abaganga
Bamwe mu baganga bari mu biganiro
Dr Nsengiyumva Charles(uwa kabiri uhereye ibumoso mu bahagaze) hamwe n'itsinda ry'abaganga

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved