U Buhinde: Abanyarwanda b’i New Delhi bakoze igikorwa cy’ubutabazi

Yanditswe na Uwishyaka Jean Louis
Kuya 6 Ugushyingo 2016 saa 11:24
Yasuwe :
0 0

Ambasaderi w’u Rwanda mu Buhinde na madamu we, bifatanyije n’abandi Banyarwanda bo mu Mujyi wa New Delhi mu gikorwa cyo gutanga amaraso mu bitaro bizwi bya Medanta, mu rwego rwo gufasha abayakenera.

Icyo gikorwa cy’ubutabazi cyabaye ku wa Gatanu tariki 4 Ugushyingo 2016, cyitabiriwe kandi n’abandi bayobozi b’u Rwanda mu Buhinde n’abanyeshuri b’Abanyarwanda biga mu Mujyi wa New Delhi.

Mu ijambo rya Ambasaderi Ernest Rwamucyo uhagarariye u Rwanda mu Buhinde, yavuze ko ari igikorwa cyo kurengera ubuzima bw’abantu ndetse bigashimangira umuco w’abanyarwanda wo gukiza ubuzima.

Ambasaderi Rwamucyo yagize ati “Iki ni igikorwa cyo kurengera ubuzima, ndetse ni umuco karande mwiza w’Abanyarwanda wo gukiza ubuzima, cyane ko n’Abanyarwanda baza kuhivuriza nabo bajya bahabwa amaraso.”

Ambasaderi Rwamucyo kandi yavuze ko iki gikorwa cy’ubutabazi ari ikimenyetso kigaragaza ko u Rwanda n’Abanyarwanda baha agaciro ubuzima bw’ikiremwamuntu, kandi kigashimangira n’umubano mwiza uri hagati y’u Rwanda n’u Buhinde.

Ibitaro bya Medanta byabereyemo iki gikorwa, ni hamwe Abanyarwanda bakunze kujya kwivuriza indwara zikomeye zirimo umwijima, kanseri zitandukanye, impyiko, imitsi itandukanye y’umubiri, amagufa n’izindi.

Icyo gikorwa kandi cyashimwe n’ubuyobozi bw’Ibitaro bya Medanta.

Ambasaderi Rwamucyo avuga ko bakoze iki gikorwa mu rwego rwo gufasha abanyarwanda ndetse n'abandi bakenera amaraso
Joseph Kabakeza, Umunyamabanga wa mbere wa Ambasade y'u Rwanda mu Buhinde nawe yitabiriye iki gikorwa
Mucyo Rutishisha, Umunyamabanga wa kabiri wa Ambasade y'u Rwanda nawe yatanze amaraso muri icyo gikorwa cy'ubutabazi
Iki gikorwa cyitabiriwe n'abayobozi n'abanyeshuri biga i New Delhi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza