U Buholandi: Ambasade y’u Rwanda na Kaminuza ya ISS bibutse jenoside yakorewe Abatutsi

Yanditswe na Kanamugire Emmanuel
Kuya 25 Kamena 2016 saa 09:05
Yasuwe :
0 0

Ambasade y’u Rwanda mu Buholandi yifatanyije na Kaminuza ya ISS mu muhango wo kwibuka Jenoside yakorewe Abatutsi mu Rwanda.

Umuhango wabaye tariki ya 23 Kamena wari witabiriwe n’Ambasaderi Jean Pierre Karabaranga, uhagarariye u Rwanda mu Buholandi, Professeur De Inge Hutter, Umuyobozi wa Kaminuza ya ISS, “Erasmus Rotterdam University”.

Hari kandi abanyeshuri barimo n’abaturutse mu Rwanda baje kuhakomereza amasomo kuri buruse bahabwa na guverinoma y’u rwanda, hari kandi abarimu na bamwe mu banyarwanda batuye mu Buholandi n’inshuti zabo

Abanyeshuri biga muri iyi Kaminuza ya ISS bifatanyije n’Ambasade kugira ngo bakomeze bereke abarokotse jenoside yakorewe Abatutsi ko atari bonyine, bereke n’Isi ko ibyabaye ari agahomamunwa bitagomba kongera kubaho n’ahandi.

Professeur De Inge Hutter, uyobora iyi Kamunuza mu ijambo rye yavuze ko ibi ari uguhozaho, no kwibukiranya amateka mu rwego rwo kongera kwirinda ikibi, yizeza n’ubufatanye mu gukomeza kwibuka hagati ya Kaminuza ya ISS na Ambasade y’u Rwanda mu Buholandi.

Umubiligi utuye mu Buholandi, Guy Beaujot, akaba inshuti y’u Rwanda yari yitabiriye uyu muhango yavuze ko yizeye ko Jenoside itazongera kubaho.

Ati “Aya mahano yabaye mu Rwanda twizere ko atozongera ukundi, kandi duhaguruke twese tunenge turwanya abafite kandi bakomeje ibitekerezo byo kubiba urwango mu bantu bitwaje kugoreka amateka babigendereye kubera inyungu zabo.”

Akomeza avuga ko kwibuka jenoside yakorewe Abatutsi bibabaza bamwe muri abo, nka Bart Stapert, ukora ibishoboka byose ngo abaregwa ibyaha bya jenoside yakorewe Abatutsi bari ku butaka bw’u Buholandi batoherezwa kuburanira mu Rwanda aho bakoreye ibyaha.

Perezida wa Ibuka mu Buholandi, Christian Mundele, mu ijambo rye yagaragaje ko hakwiye gushyirwa imbaraga mu kurwanya no gukurikirana abicanyi basize bakoze jenoside mu Rwanda.

Ati “Aba bantu bafite ababari inyuma babakomeyeho, babashyigikiye haba mu banyamakuru, abanyamategeko n’abandi. Ndahamagarira rwose mwe Abanyeshuri muri za Kaminuza kumva neza amateka y’u Rwanda mugakorana ubushakashatsi nyabwo buzafasha abandi mu bihe bizaza mwerekane ukuri.”

Amb. Karabaranga yibukije ko ikibazo cy’iyicwa rya hato na hato kiri mu bizwi kandi Leta irimo ibikurikirana mu buryo bwimbitse, anasobanura birambuye uko abapfobya Jenoside yakorewe Abatutsi bitwara uko bakora n’uburyo babikora mu kuyobya benshi baba badasobanukiwe.

Amb. Karabaranga yashimiye Perezida Paul Kagame n’ingabo za FPR Inkotanyi bakoze ibikorwa bidasanzwe bigahagarika jenoside igihe amahanga yose yareberaga ibyaberaga mu Rwanda umunsi ku wundi. Ati “Ni ubutwari tuzahora tubashimira ubuziraherezo.”

Amb. Karabaranga kandi yashimiye Ubuyobozi bwa Kaminuza ya ISS ku bufatanye bagirana na Ambasade y’u Rwanda mu Buholandi mu gutegura igikorwa cyo kwibuka buri mwaka jenoside yakorewe Abatutsi.

Mundele Christian, Perezida wa Ibuka mu Buholandi avuga ijambo
Madamu Yeti Franzani yamaze imyaka ibiri mu Rwanda afasha muri gahunda z'uburezi
Komite y'abanyeshuri b'abanyafurika n'Abanyarwanda bafatanyije na Ambasade gutegura uyu muhango
Amb. karabaranga na Professeur De Inge Hutter bagiye gucana Urumuri

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza