U Busuwisi: Ambasade y’u Rwanda yigishije urubyiruko kuri Jenoside yakorewe Abatutsi

Yanditswe na Evariste Nsengimana
Kuya 30 Mata 2018 saa 06:51
Yasuwe :
0 0

Mu rwego rwo kwirinda no gukumira ko jenoside yakongera kubaho ukundi, itsinda ry’abanyeshuri batoranyijwe i Genève mu Busuwisi bari hagati y’imyaka 18 na 20 n’abarimu babo bahawe ikiganiro kivuga ku gukumira no kurwanya jenoside, hibandwa cyane cyane ku mateka ya Jenoside yakorewe Abatutsi mu Rwanda mu 1994.

Icyo kiganiro cyatanzwe, kiri muri porogaramu y’ibiganiro ngarukamwaka yo kwigisha no gukangurira urubyiruko gukumira no kurwanya jenoside, yatangijwe na Ambasade y’u Rwanda mu Busuwisi, ikaba kimwe mu biranga umuhango wo kwibuka mu icyo gihugu.

Ambasade isobanura ko icyo ikiganiro gitangwa ku bufatanye na Porogaramu y’ Ishami ry’Umuryango w’Abibumbye ry’Amahugurwa n’Ubushakashatsi (UNITAR) yigisha urubyiruko ibijyanye n’amahoro; Umuryango wigisha urubyiruko ibijyanye n’ubutwererane Mpuzamahanga (EDUKI) n’andi mashuri y’i Genève arimo Ishuri mpuzamahanga rya Genève; Kaminuza ya Webster na Graduate Institute of International and Development Studies.

Ambasaderi w’u Rwanda mu Busuwisi, Dr. François Xavier Ngarambe, yatanze ibiganiro ku mateka y’u Rwanda mbere y’ubukoloni, mu gihe cyabwo na nyuma yabwo; ikivuga ku nkomoko ya Jenoside, yibanda ku ngengabitekerezo nsumbanya-moko na politiki y’ivangura n’amacakubiri mu Banyarwanda byimakajwe n’abakoloni bafatanije na Repubulika ya mbere n’iya kabiri, byaje kugeza kuri Jenoside yakorewe Abatutsi.

Amb. Ngarambe yanagarutse ku ngaruka za Jenoside zirimo ubupfubyi, gupfakara, ibikomere ku mitima no ku mibiri by’abayirokotse, ingengabitekerezo, kuyipfobya, kuyihakana n’ibindi, ababwira ko akamaro ko kwibuka abayizize ari ukubaha agaciro no kubungabunga amateka.

Abo banyeshuri banagaragarijwe isura nyayo y’u Rwanda nyuma y’imyaka 24 Jenoside yakorewe Abatutsi ibaye, igaragarira cyane ku mibanire mishya y’abanyarwanda; kuri Politiki itavangura; ku bukungu; mu butaberra; amahoro umutekano; imiyoborere myiza; mu buzima; uburezi no korohereza ishoramari mu Rwanda.

Hatanzwe ibitekerezo n’ibibazo ku mpamvu Umuryango w’Abibumbye watereranye u Rwanda; inkomoko y’amacakubiri mu banyarwanda; ibyakozwe kugira ngo ubwiyunge butere intambwe ishimishije; amasomo ibindi bihugu byakwigira ku Rwanda ku bijyanye n’amahoro; umutekano, amajyambere n’ibindi nyuma ya Jenoside.

Ambasaderi w’u Rwanda mu Busuwisi, Dr. François Xavier Ngarambe yahaye urubyiruko ikiganiro kuri Jenoside yakorewe Abatutsi
Itsinda ry’abanyeshuri batoranyijwe i Genève bari hagati y’imyaka 18 na 20 n’abarimu babo bahawe ikiganiro ku gukumira no kurwanya jenoside
Ambasade y'u Rwanda mu Busuwisi yaganirije abanyeshuri n'abarimu kuri Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza