Hifashishijwe ibihangano gakondo mu kuratira Abasuwisi ibyiza by’u Rwanda

Yanditswe na Ishimwe Israel
Kuya 18 Nyakanga 2016 saa 06:26
Yasuwe :
0 0

Ishyirahamwe The East African Community Association-Geneva ryo mu Busuwisi rifatanyije n’umuryango Zaugg Michael riherutse gutegura igikorwa cyo guhuza no gutaramana n’Abanyarwanda n’inshuti zabo aho bamurikiye abatuye n’abakorera muri iki gihugu no mu nkengero zacyo bimwe mu bihangano gakondo bigaragaza amateka y’u Rwanda.

Ernest Rutabayiru umwe mu bategura iki gikorwa akanayobora umuryango wa EAC yatangarije IGIHE ko mu imurikagurisha bakoze bifashishije ibihangano by’umuhanzi Pascal Bushayija bagaragaza ibyiza by’u Rwanda.

Ati “ Twerekanye ibyiza by’iwacu, aho ibihangano bya Bushayija byadufashije cyane kugenda dusobanura icyo buri gihangano kivuga, bigatuma tugirana n’ibiganiro byimbitse kandi birambuye ku mateka y’u Rwanda, ari nako dushishikariza abitabiriye iri murika kumenya u Rwanda no kuba barusura.”

Rutabayiru yakomeje agira ati “Ishyirahamwe East African Community Geneva n’abafatanyabikorwa bacu, twihaye umurongo wo guhozaho mu kwerekana ibyiza byo ku mugabane wa Afurika harimo n’u Rwanda.”

Muri iri murikagurisha hamuritswe ibihangano 40 byakozwe n’umunyabugeni Bushayija, buri cyose gifite igisobanuro mu mateka y’u Rwanda.

Ambasaderi w’u Rwanda mu Busuwisi, François Xavier Ngarambe wasuye iri murikagurisha yashimiye abariteguye , anavuga ko ari igikorwa gifasha Abanyarwanda kurushaho gusakaza umuco gakondo.

Ati “Ibintu ni byiza guhamagararira abahanzi kuza kwerekana umuco w’iwacu kuko werekana indangagaciro z’igihugu cyacu nziza Abasuwisi n’abandi bakamenya abo turibo n’amateka yacu.”

Iri murikagurisha ryitabiriwe n’abanyafurika benshi bahuriye mu ishyirahamwe rya EAC ryasojwe n’umugoroba w’ubusabane aho umuhanzi wo muri Tanzaniya Ommy Dimpoz na DJ Princess Flor , Umunyarwandakazi utuye mu Bubiligi basusurukije abaryitabiriye.

Iri murikagurisha nyuma ya Genève ryakomereje mu karere ko mu Busuwisi kitwa Fribourg, aho biteganyijwe ko rizarangira tariki 31 Nyakanga 2016.

Hamuritswe ibihangano by'ubugeni bigera kuri 40
Ambasaderi w’u Rwanda mu Busuwisi, François Xavier Ngarambe(hagati) areba ibihangano gakondo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza