Amb Rutabana yerekanye ko u Rwanda rwakwigira byinshi kuri Israel bihuje amateka

Yanditswe na Ishimwe Israel
Kuya 25 Kamena 2016 saa 08:55
Yasuwe :
0 0

Ambasaderi w’ u Rwanda muri Israel, Joseph Rutabana yatangaje ko hari uburyo bw’ iterambere u Rwanda rwakigira ku gihugu cya Israel bihuje amateka ya Jenoside.

Ibi yabivuze mu gihe Minisitiri w’ intebe wa Israel, Benjamin Netanyahu ategerejwe i Kigali taliki ya 6 Nyakanga 2016 .

Jerusalem post dukesha iyi nkuru itangaza Benjamin Netanyahu azagirira uruzinduko mu bihugu bine byo ku mugabane wa Afurika birimo Uganda , u Burundi , Ethiopia ndetse n’ u Rwanda.

U Rwanda rwashyizwe ku rutonde rw’ ibihugu Netanyahu azasura hagendewe ku mubano mwiza mu bya politiki rufitanye n’ igihugu cya Israel.

Joseph Rutabana, Ambasaderi w’ u Rwanda muri Israel ashimangira ko u Rwanda nk’ igihugu gihuje amateka mabi ya Jenoside n’ igihugu cya Israel hari byinshi ruzungukira ku gihugu cya Israel cyabashije kwiteza imbere nyuma y’akaga ka Jenoside cyanyuzemo.

Ati: “ Turabizi ko Abisiraheli bagizweho ingaruka na Jenoside yabakorewe. Natwe nk’ Abanyarwanda mu myaka 22 ishize twarashavuye.Twese duhuje amakuba ariko hari ibyo twakigira kuri Israel.”

Yakomeje agira ati: “Ibyo igihugu cya Israel cyagezeho nyuma y’ imyaka 70 biratangaje. Tugomba kubigiraho uburyo babigezeho.’’

Joseph Rutabana ashimangira ko mu ruzinduko Benjamin Netanyahu azagirira mu Rwanda azabona amahirwe u Rwanda ruha abashoramari bo mu gihugu cya Israel.

Ibi abishingira ku kuba u Rwanda rufite umutekano ndetse rukaba rutibasirwa n’ ibikorwa by’ iterabwoba by’abahezanguni b’imitwe igendera ku matwara akaze ya Islam.

Rutabana avuga ko u Rwanda ruzigira ku gihugu cya Israel ku ikoreshwa ry’ ikoranabuhanga mu iterambere ry’ igihugu.

Ati“Tuzigira ku ikoreshwa ry’ ikoranuhanga tumenye ngo bikorwa bite cyane cyane mu buhinzi. Igihugu cya Israel gikoresha ikoranabuhanga mu kuhira imyaka. Turashaka guteza imbere ubuhinzi ndetse tukazamura n’ ubukungu bwacu”

U Rwanda kandi rwiteze kwigira ku gihugu cya Israel uko habikwa amazi y’ imvura hifashishijwe ikoranabuhanga; ruzanungukira kuri iki gihugu uburyo bwo guhunika umusaruro ukomoka ku buhinzi bw’ imboga , indabo ndetse n’ imbuto ku buryo bw’ikoranabuhanga.

U Rwanda na Israel bifitanye umubano mu bya politiki guhera mu mwaka 1962 nyuma yo kubona ubwigenge.

Ambasaderi w'u Rwanda muri Israel, Rutabana Joseph atangaza ko u Rwanda rwakigira byinshi kuri Israel

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza