Virginia: Abanyarwanda bahuriye mu birori byo kwizihiza intsinzi ya Perezida Kagame

Yanditswe na IGIHE
Kuya 1 Ukwakira 2017 saa 01:19
Yasuwe :
1 0

Abanyarwanda batuye mu Mujyi wa Richmond muri Leta ya Virginia muri Amerika, bizihije intsinzi ya Perezida Paul Kagame, watsindiye kongera kuyobora u Rwanda muri manda nshya.

Ibyo birori byabaye ku itariki ya 30 Nzeri 2017, byitabiriwe n’Abanyarwanda barimo abanyamuryango ba RRC(Richmond Rwandan Community) n’inshuti zabo.

Umuyobozi w’uwo muryango, Jason Nshimye, yashimiye abantu uburyo bitabiriye amatora kandi anasobanura ko ikivi batangiye kigomba ubufatanye n’ubwitange.

Yashimiye byimazeyo Perezida Paul Kagame wayoboye urugamba rwo kubohora igihugu, kandi akaba akirangaje imbere abanyarwanda muri gahunda yo kucyubaka no kubungababunga amahoro ya buri wese.

Yagize ati “Uyu munsi twahuye kuko twahisemo amahoro, ubumwe n’ubwiyunge, no gushyira inyungu z’umunyarwanda imbere y’ibindi byose. Turacyafite ibikomere twatewe n’amateka mabi ariko ubwitange n’ubushishozi bugaragara mu bayobozi twatoye buduha icyizere ko abazadukomokaho batazigera bagira ipfunwe ry’aho bakomotse”.

Yongeyeho ko ibyiza bitizana ahubwo biharanirwa, ko kandi imbaraga zahagaritse jenoside ziyongereye inshuro zirenga ijana gutyo akaba nta munyarwanda ugomba kugira icyo atinya.

Umujyanama wa mbere muri Ambasade y’u Rwanda muri Leta Zunze Ubumwe za Amerika, Frank Kayijuka, yashimiye abatuye muri aka gace uko babaye indashyikirwa mu kwitabira amatora y’umukuru w’igihugu yabaye muri Kanama, akomeza agira ati “Uyu munsi aho umunyarwanda ari hose afite byinshi yakwishimira birimo politiki nziza idasiga umuturage n’umwe inyuma, uburinganire, umutekano, uburezi kuri buri wese, ubushobozi bwo kwivuza, gucunga neza umutungo na gahunda ya Ndi umunyarwanda”.

Abibumbiye mu muryango ‘Richmond Rwandan Community’ bijeje igihugu ko bazakomeza ubumwe no gukora ikintu cyose kizakenerwa mu kubaka u Rwanda no kuba inyuma ya Perezida Paul Kagame mu gusoza inshingano igihugu cyamutoroye.

Mu bandi bitabiriye ibi birori harimo inshuti z’u Rwanda zikomoka mu Burundi, Repubulika Iharanira Demokarasi ya Congo, Kenya n’ahandi.

Byari ibyishimo ku bitabiriye ibi birori
Umujyanama wa mbere muri Ambasade y’u Rwanda muri Leta Zunze Ubumwe za Amerika, Frank Kayijuka(wa gatatu uhereye ibumoso) yasabye abari aho gukomeza ibikorwa byubaka igihugu
Abitabiriye ibi birori n'inshuti z'u Rwanda mu ifoto y'urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza