00:00:00
IGIHE NETWORK

Inzozi za Nzeyimana ufite ubuhanga bwihariye mu kubyaza umugano ibikoresho byo mu rugo

Mico Oscar Nzeyimana, ni umusore w’imyaka 24 utuye mu Karere ka Rubavu, mu Ntara y’Iburengerazuba.

Afite ubuhanga bwihariye mu gukora ibikoresho bitandukanye byo mu rugo nk’intebe, ibitanda, utugabanyarumuri tw’amatara (Abat jours), amasakoshi n’ibindi abikuye mu gihingwa cy’umugano.

Inkuru ye mu kwihangira imirimo ihera mu 2015 ubwo yari asoje amashuri yisumbuye mu by’ubukererarugendo n’amahoteli, akaza kubona ko kugera ku mafaranga bizamugora kuko yabonaga kubona akazi bitazamworohera, mu gihe yakebukaga akabona abarangije kaminuza b’abashomeri kandi barize nk’ibyo yize.

Yigiriye inama yo gushaka icyo akora ngo akore ku mafaranga, agira amahirwe aza guhura n’abashinwa bamuha ubumenyi bw’uburyo igihingwa cy’umugano cyabyazwa umusaruro.

Icyakora mbere yo guhura n’abashinwa, yari yabanje kubona ikiraka muri hoteli, atungurwa no kubona uburyo abanyamahanga batishimira kwakirizwa ibisa n’ibyo baba basize iwabo.

Mu kiganiro yagiranye na IGIHE, Nzeyimana yagize ati “Nakiraga abantu muri hoteli, abakiliya baza nkababaza icyabashimishije cyangwa icyo batunenga. Abenshi muri bo bajyaga bambwira bati tavuye iwacu mu Burayi cyangwa Aziya, none twasanze igitanda twaryamyeho muri hoteli yanyu cyavuye iwacu, ibyo mukoresha byinshi tuba twabibonye iwacu, ntabwo rero bidufasha kunezerwa cyane iyo dusanze ibyo mutwakirije ari ibyi’iwacu, byaba byiza tugiye tubona ibindi tutari tuzi.”

Amahugurwa y’abashinwa yayamazemo amezi atandatu, arangije kubona uburyo umugano ubyazwa umusaruro, yiyemeza kuvanaho cya kinegu abanyamahanga bajyaga bamubwira agikora muri hoteli.

Mu 2017 nibwo Nzeyimana yatangije ibihumbi 15, ashinga sosiyete ayita Mon Bamboo Company.

Yagize ati “Natangije ibihumbi 15. Buriya umugano ugura amafaranga 500, ushobora kuwugura ugakoramo utugabanyarumuri tw’amatara kamwe kakagura bitanu kandi umugano ushobora gukuramo utuntu dutanu. Njye rero natangiye nkora intebe, njya kuzigurisha muri Congo barazikunda, ziranyungura ndaza njya kurangura indi migano ndakomeza ndakora”.

Uyu musore avuga ko umugano ufite ubushobozi bwo kubyazwamo 98% by’ibikoresho umuntu akenera mu rugo.

Sosiyete ye ikorera mu murenge wa Gisenyi, akagali ka Mbugangali ikoresha abantu umunani bahoraho biganjemo urubyiruko.

Uretse abakora buri munsi, hari n’abahinzi b’imigano mu Turere twa Musanze, Nyabihu na Rubavu agurira imigano yifashisha mu kazi ke.

Mu mwaka wa 2018, Nzeyimana yitabiriye amarushwa y’urubyiruko rwihangiye umurimo azwi nka Youth Connect. Umushinga we ni umwe mu yatsinze ku rwego rw’Intara y’Iburengerazuba, wongera no kuza mu mishinga itanu ya mbere ku rwego rw’igihugu.

Amafaranga yakuye muri ayo marushanwa, yayashoye muri sosiyete ye ngo ikomeze kwaguka, aho kujya kuyishimishamo cyangwa kuyaguramo ibindi nk’inzu.

Yagize ati “Ntiwabona ahantu naguze inzu cyangwa ibindi byo kwinezeza, rwiyemezamirimo ntabika ahubwo arashora. Ndi kugura ibikoresho bishya ngo nagure imikorere yanjye.”

Mu ngorane ahura nazo ni uko nta bafatanyabikorwa cyangwa abaterankunga abona ku buryo agira ubushobozi buhagije bwo gukora byinshi bingana n’ibyo abakiliye bifuza.

Ikindi ngo akunze kugira ikibazo cy’abakozi bafite ubumenyi buhagije mu kubyaza umusaruro umugano.

Avuga ko abonye amahirwe yo kwigisha urubyiruko cyane cyane urudafite akazi cyangwa uruba ku muhanda byamushimisha cyane.

Ati “Mpora numva bavuga ngo Iwawa hari urubyiruko rwigishwa imyuga, bashobora kuba bigishwa kubaza cyangwa gusudira ariko abantu bamaze kujya hanze barize ibintu nk’ibyo ni benshi. Ndashaka gusaba uburenganzira nkajya kwigisha urwo rubyiruko ruri Iwawa rwajya hanze rukihangira umwuga kuko ibi nkora birakenewe ku isoko ry’umurimo”.

Mu myaka ibiri amaze abyaza umusaruro igihingwa cy’umugano, Nzeyimana yemeza ko bya bihumbi 15 yatangije, ubu byikubye kuko sosiyete ye nibura ifite agaciro ka miliyoni 50 Frw.

Afite ubuhanga bwihariye mu gukora ibikoresho bitandukanye byo mu rugo nk’intebe, ibitanda
Nzeyimana yifuza kwigisha bagenzi be b'urubyiruko uko babyaza umugano umusaruro
Nzeyimana akora ibikoresho birimo intebe abikuye mu migano
Intebe n'amezi byifashishwa abantu bafata ifunguro nabyo bishobora gukorwa mu migano
Mu migano Nzeyimana abasha gukuramo ibitanda

Ibitekerezo

  • Felicitations rwose!!!! Dore umuhanga ureke Abadogiteri batazi no gukora cure dents!!!

  • Uwamukenera 0788888450 yamubona

  • Courage Mico, mugutez’URWANDA(Abaturage) rwacu imbere kdi nawe utiyibagiwe baguhe rugari Ni wawa ugereyo kdi nanjye nzaza unyigishe.


Tanga igitekerezo


BIGEJEJEYO