00:00:00
IGIHE NETWORK

Murenzi wahanze iziko n’ifuru bikoresha gaz, afite inzozi zo kubaka uruganda

Murenzi Nurudine wahanze iziko rya kijyambere rikoresha gaz, rifite n’ifuru yifashishwa mu kotsa ibintu binyuranye nk’imigati, inkoko n’ibindi, ahamya ko amaze kugera ku mushinga ugomba kuruhura abakoreshaga ikiguzi gihanitse bategura amafunguro.

Murenzi w’imyaka 24 wize Civil Engineering mu Ishuri rikuru ry’Imyuga n’Ubumenyingiro rya Kigali ( IPRC) yakoze iri ziko nk’uburyo bwo gutura abaturage umutwaro bari bamaranye imyaka wo gushaka inkwi rimwe na rimwe badafite n’aho bazivana, bikaba binahura na politiki leta ishyize imbere yo gukoresha ingufu zitangiza ibidukikije.

Mu kiganiro na IGIHE yahamije ko yasanze amashyiga ari ku isoko ubu yaba akoresha gaz cyangwa amashanyarazi, igiciro cyayo gihanitse, aca undi muvuno atekereza uko yakora ayahendukira benshi.

Yagize ati “Nari nsanzwe nkora amashyiga manini ya gaz akoreshwa mu bucuruzi. Natekereje ku yo Abanyarwanda bo mu ngo bakifashisha ariko akanabafasha gutegura nk’umugati cyangwa inkoko mu ifuru by’umwihariko ku bategetswe amafunguro yihariye na muganga.”

Yongeyeho ati “Nabonaga hari ikibazo cy’ihindagurika ry’ibihe kandi mbona gihangayikishije Isi ndetse n’imishinga yo kugabanya inkwi zikoreshwa mu guteka. Nabonye nkoze imbabura nziza yagabanyiriza umuturage igiciro, ikanamufasha mu buzima buzira imyuka ihumanye.”

Amashyiga yahanze ateganya kuyakora akayaha ibice by’inyuma bikomeye kandi akayafunga mu buryo bwihariye, buzatuma ashobora gukoreshwa mu buryo burambye, mu mudendezo usesuye.

Murenzi w’imyaka 24 yize Civil Engineering mu Ishuri rikuru ry’Imyuga n’Ubumenyingiro rya Kigali ( IPRC)

Murenzi yaharuriwe inzira na Expo ya Made in Rwanda

Mu 2016 nibwo IPRC Kigali yateguye amarushanwa yo guhanga udushya yitabirwa n’imishinga y’ikoranabuhanga 89. Murenzi yahembwe muri ba rwiyemezamirimo beza, abikesha iziko rikoresha amakoro (Makoro Cooking) yahanze, intambwe avuga ko yamuremyemo imbaraga.

Yakomeje agira ati “2016 yampaye imbaraga zo gukora cyane. Nahuye n’abantu bambaza ibyo nakoze, biranshimisha. Nabonye ko nagira uruhare mu iterambere ry’igihugu cyanjye mu guhanga imirimo itanga akazi. Byampaye icyizere ko nakora uruganda rutunganya ibikoresho byaba ibikoze mu byuma cyangwa imbaho, byakemura ibibazo biri mu Rwanda no mu Karere.”

Icyitegererezo cye mu nzozi zo kubaka uruganda, agikomora kuri Samsung, uruganda rurangiranwa rwo muri Korea y’Epfo rukora ibikoresho by’ikoranabuhanga guhera mu 1938. Rwinjije miliyari $174 mu 2016, mu gihe imibare yo mu 2014 igaragaza ko rwari rufite abakozi 489,000.

Murenzi akomeza agira ati “Nagize inyota yo guhanga akazi. Ubu nshobora kwishyura abakozi batanu bitewe n’imishinga ndi gukoraho. Gusa mfite inzozi zo kwagura. Dukwiye kurenga umupaka wo kwiga dushaka akazi ahubwo tukanareba uko tugahanga.”

Avuga ko kuva yiga mu wa Gatanu w’amashuri abanza yakemuraga ikibazo ahuye nacyo nk’umuntu ukunda kwishakamo ibisubizo. Ni uko impano yo kwikorera yagendaga imukuriramo, akura yumva ko agomba kuzatanga akazi ahokujya kugasaba, agahora yumva ko agomba “gushyira ku isoko ikintu gifatika.”

Murenzi ukorera mu Kigo cya IPRC kimufasha gusuzuma imishinga ye n’ireme ryayo n’uburyo izahangana ku isoko ndetse ahorana icyizere ko uko azagenda atera imbere, azagenda arushaho gushaka aho kwagurira ibikorwa bye.

Yavuze ko ahura n’imbogamizi zo kubona ibikoresho by’ibanze birimo amabati akoresha ya Imana Steel, imashini zo gutunganya ibyo ari gukoraho n’ibindi.

Nta mabuye y’agaciro dufite, ubukungu bwacu ni mu mutwe

Murenzi yakomoje ku kibazo cy’urubyiruko rwa Afurika rufite imyumvire ko imibereho myiza ruzayibona ari uko rugiye guhaha i Burayi, hari abarohama mu Nyanja bajya mu bihugu bitandukanye gushaka amaramuko, nyamara nabo ibyo bafite barabigezeho mu myaka myinshi, banifashishije imitungo kamere bavanye muri Afurika.

Yagize ati “Mbabazwa n’uko hari ibyo twakabaye dushoboye ariko tudakora. Ibitekerezo by’imishinga birahari ariko abenshi biguma mu mitwe yabo. Tugomba gutumbera ikintu kandi tugakora cyane tukereka abanyamahanga ko nubwo tudafite (u Rwanda) ubutaka bukungahaye ariko dufite imitwe ikungahaye.”

Yasobanuye ko ayoborwa n’icyerekezo cy’Isi aho umuherwe ari ufite inganda zikomeye mu gihe mbere yari utunze ibikingi by’ubutaka.

Murenzi yavuze uko yanze kujya muri Amerika kuko afite inzozi ze atarakabya. Ati “Mfite mukuru wanjye uba muri Amerika. Buri gihe aba ambwira ati waje hano ariko nkamubwira nti aho ngaho bamaze kubaka iterambere ryabo mu myaka yashize. Mfite inzozi zo kubaka ibintu bifatika.”

Intego afite ni ukugaragaza ibikorwa bye binyuze mu mamurikagurisha atandukanye. Murenzi yanatangiye Ikompanyi ye yitwa “Here and Now Group”, ateganya ko izavamo uruganda ruzajya rukora ibikoresho by’ingeri zose.

Murenzi afite Ikompanyi yitwa Here and Now Grp afite inzozi zo kwagura ikaba uruganda rukomeye
Murenzi akorera imishinga ye aho yatijwe na IPRC Kigali
Murenzi Nurudine na mugenzi we Mukeshimana Innocent batunganya ishyiga rikoresha gaz
Murenzi Nurudine yahanze iziko n’ifuru bikoresha gaz mu mushinga uzaruhura abakoreshaga ikiguzi gihanitse bategura amafunguro
Nurudine yize amasomo ye afite intego yo kuzatanga akazi ku bandi
Imashini igezweho yifashishwa mu gusiga amarangi yifashishije umwuka
Imashini ikoreshwa mu guhina ibyuma mbere yo gutangira gukoreshwa
Iyi furu ishobora gutekwamo amafunguro atandukanye arimo n'inkoko
Mu gusuzuma iyi furu yatetswemo Pain coupé ndetse mu minota 20 yari yahiye; mu gihe inkoko yahiye mu gihe kiri hagati y'iminota 25 na 30

Amafoto na Video: Nizigiyimana Hassan U.


Ibitekerezo

  • Muduhe number ze

  • ko ntakiguzi mwashyizeho

  • ko ntakiguzi mwashyizeho

  • Ni uko ni uko Murenzi we. Ibitekerezo nk’ibi bigenda byoroshya ubuzima bwacu, bikanatangiza business ziha akazi abandi.

  • Nugu copia ibyahanzwe nabandi warangizango wavumbuye,.kora urivuye mwubumba cgw mugitaka ritameneka ubundi ubone kuvuga.

  • Ayo mashyiga nayo mafuru nashyireho ibiguzi byayo tubone aho bitandukaniye nibisanzwe bikoreshwa

  • Komerezaho mwana w’u Rwanda, iteze imbere n’igihugu cyawe.

  • Byiza cyane, none se iri shyiga rigura angahe?

  • Muri amerika nta kihaba ntibakabashuke,kereka niba ari ugukubura imihanda no koza abasaza naho ubundi nkubwije ukuri ko inzozi zawe nk izi utazigeraho muri amerika,kuko nkuko ubivuze hari inganda zimaze imyaka magana rero zubatse izina kuburyo ubu ntawundi ukira,abakene barakena cyane n abakire bagakira cyane,hari n abaguma aho bari nta terambere,uwo muvandimwe wawe nawe azagaruka agusaba akazi ndakubwiye.ikindi minisiteri y umuco nihaguruke ibuze urwo ruganda kwiyita iryo zina"Imana"nta soni?ni gute abanyamahanga mwemera ko basuzugura Imana muri iki gihugu cyayo koko?hari umunyarwanda watinyuka kwita iryo zina ubucuruzi bwe?za nsengero zuzuye aha zirihe?ko zitahagurutse ngo zisabe ko uwo muntu ahindura iryo zina ry uruganda rwe?zarangiza zigasakuza ngo bazifunze yewe nubundi ndabona zitari tayari niba zitabona iri shyano nta soni koko?ubwo hari uwarwita Yezu steel mukemera?kuki se hari uwibeshya agakinisha izina ry Imana aka kageni?niyo ryaba risobanura ikindi kintu mu gihugu cye ibyo ni ibye,ntagomba kwemererwa iryo zina muri iki gihugu kuko ni izina ba sogokuruza bitaga umuremyi wa twese mu isi n ijuru kandi natwe ni uko tumwita,rero rwose mukemure ikibazo ntimwigire ntibindeba,kuko namwe mushinze uruganda mukarwita budha mu gihugu cyabo bakumanika kandi ari ikigirwamana,ibaze noneho Imana y u Rwanda yaremye isi n ijuru kuyubahuka utyo pe?

  • Iryi ziko ritugereho. Turarikeneye! Congratulations Murenzi! Urundi rubyiruko rukurebereho.

  • uyu ntacyo akora kidasanzwe gera mugakinjiro urebe ibyo abantu batize bakora
    reba biriya bikoresho byose afite ntacyo abikoresha iki??? gukora imbabura tu!!!!!1

  • uyu ntacyo akora kidasanzwe gera mugakinjiro urebe ibyo abantu batize bakora
    reba biriya bikoresho byose afite ntacyo abikoresha iki??? gukora imbabura tu!!!!!1

  • Andika hano
    Muduhe number ze
    murakoze

  • Andika hanoNi byiza! ikibazo nuko ntabiciro nta na contact yashyizeho mbega wowe! ubwo se abantu urumva bazagukura hehe?

  • Andika hanoNbyiza cyane! ikibazo nuko atashyizeho ibiciro na contact ze! none se arabona tuzamuvana hehe? mbega wowe!

  • Nimero ya Murenzi nurudine ngiyi 0781285108


Tanga igitekerezo


BIGEJEJEYO