00:00:00
IGIHE NETWORK

Ubuhamya bwa Umulisa wishyuriye amashuri barumuna be abikesha impano yo gushushanya

Umulisa Espérance ni umunyabugeni ushushanya agakora n’imitako y’ubwoko butandukanye akoresheje irangi, akavuga ko umwuga we umaze kumuteza imbere ndetse wamubashishije kwishyurira amashuri barumuna be nyuma yo kubura ababyeyi.

Uyu mukobwa w’imyaka 34, atuye mu Kagari ka Nengo, Umurenge wa Gisenyi mu Karere ka Rubavu;yinjiye mu bikorwa by’ubugeni mu mwaka wa 2004.

Ubusanzwe yize ibijyanye n’indimi n’ubuvanganzo mu mashuri yisumbuye ntiyashobora gukomeza muri kaminuza kuko yahise apfusha umubyeyi yari asigaranye (nyina) biba ngombwa ko ari we usigara yita kuri barumuna be.

Umulisa avuga ko amafaranga akura mu mwuga akora yamufashije kwita ku bavandimwe be umunani, abishyurira amafaranga y’ishuri bamwe muri bo bakaba bamaze kurangiza kaminuza.

Uko yatangiye gushushanya

Umulisa avuga ko ubusanzwe yiyumvagamo impano yo gushushanya ariko yabyinjiyemo neza mu 2004 nyuma yo guhura n’umunyabugeni wabigize umwuga akajya amwerekera.

Muri uwo mwaka yatangiriye ku kwandika ku bitambararo, imipira n’ibindi byamuhaye amafaranga yo kwita ku bavandimwe be nk’uko yabitangarije IGIHE.

Yagize ati “Ubwo uwo mugabo yanyerekeraga narabimenye numva ndabikunze ngambirira kuzabigira umwuga. Naje kubona ibiraka by’akarere byo kujya mbandikira ku byapa no ku bitambaro byamamaza byagiye bimpa amafaranga nifashishije mu kwita kuri barumuna banjye.”

Akomeza avuga ko inyungu akura mu kazi akora ka buri munsi yagiye anayifashisha mu kuvugurura inzu basigiwe n’ababyeyi.

Umulisa avuga ko nyuma yo kubona ko akazi akora kamwubahisha yafashe umwanzuro wo gukora ibihangano biteza imbere umuco nyarwanda agamije gusigasira amateka no kumenyekanisha u Rwanda.

Kugeza ubu ngo ibihangano bye byatangiye gukundwa ariko aracyafite imbogamizi zo kubona abaguzi, na bake bamugana biganjemo abanyamahanga.

Ati ”Imbogamizi zikomeye ni ukubona abakiliya bagura ibihangano byanjye kuko usanga bikundwa n’abanyamahanga cyane, abanyarwanda baracyafite ikibazo cyo kudakunda iby’iwabo. Urebye kuba ibyanjye bitaramenyekana cyane mbifata nk’imbogamizi ikomeye.”

Nubwo bimeze bityo ariko atanga inama avuga ko nta murimo n’umwe ukwiye gusuzugurwa kuko byamufashije kudasabiriza icyo ari cyo cyose ndetse arinda abavandimwe be kwandagara.

Ati “Natangiye gukora mfite imyaka 20 byarantunze bituma ntasabiriza n’abavandimwe banjye ntibandagara. Numva umuntu ufite mu mutwe agomba gukora akazi kose nta gutoranya.”

Akomeza asaba urubyiruko kumvira impano zabo aho kwirirwa biruka mu byo badashoboye bakiha intego mu byo bakora n’igihe cyo kuba bayigezeho.

Umulisa avuga ko amaze kwiteza imbere abikesha umwuga wo gushushanya
Umulisa amaze imyaka 14 mu mwuga wo gushushanya; yarihiye amashuri abavandimwe be
Uyu munyabugeni agira inama urubyiruko yo kudasuzugura akazi ako ari ko kose
Urubyiruko ngo rukwiye kwita ku mpano rwiyumvamo aho gukurikirana ibyo rudashoboye
Umulisa yahisemo gukora ibihangano biteza imbere umuco nyarwanda bikanamenyekanisha igihugu
Ibihangano bye birakundwa ariko ntarabona abaguzi benshi

Ibitekerezo

  • Komereza aho urashoboyee

  • Komereza aho urashoboyee

  • yooo mbega byiza impano kabisa ureke babandi bo kuzunguza amabuno gusa

  • Ibinibintu byiza cyane kubona abakobwa cg abagore bitabira ubugeni courage Umulisa. Ujye unigisha nabandi kbsa byiza cyane.

  • Ese uyumwana ufite impano, ntaho yaba agurishiriza ibihangano bye i Kigali. Murakoze kudufasha, kandi nawe niba abishobora yatumenyesha telefone abantu bashobora kumuhamagaraho. Keep working hard girl, you are talented.

  • urantangaje gusa courage sister.

  • Umulisa, ibihangano byawe ni byiza pee! Kuba uri rubavu, nahantu touristique. Egera za hotels na guest houses baguhe ahantu ubitereka (expo) mu buryo bamukera rugendo babibona bakabigura. Courage kandi bikomeze biguteze imbere.

  • Courage mukobwa , ibintu ukora birasobanutse

  • Ni byiza rwose!

  • Andika hano muduhe phone ni byiza kabisa tugure

  • Muraho nijye Umulisa Esperance my number 250788506046

  • Muraho ni Umulisa Esperance. My number 250788506046. Murakoze cyanee

  • No job is too big or too small for you! congs for yr creativity mind our sister. As I was looking for s.o to draw a business flyer for me , i hope you can do it.

  • Naduhe contact numbers ze

  • am happy for u sis Umulisa keep it up dear

  • courage, ufite ibihangano byiza kandi urashoboye. ariko uduhe na ka nomero kawe di!

  • Uyu mukobwa arashoboye pe dukwiriye natwe kumwigiraho

  • Muraho nakunze uburyo ubikoramo kandi birakeye kabisa..nanjye ndifuz kuzakurikiz inam wagiriye urubyiruko nkatwe.

  • Ibi ibintu biracyeye .courage mwana Wacu muri umukobwa w intwari abandi Bose bareberaho.courageukomeze kwaguka mu izina RYA Yesu

  • Abantu nkawe mbaha icyubahiro.... Uri urugerero rwiza pe... Imana iguhe umugisha


Tanga igitekerezo


BIGEJEJEYO