00:00:00
IGIHE NETWORK

Uko Bizimana yarangije Kaminuza agashinga uruganda rwarwanyije imirire mibi n’ubukene iwabo

Ahagana mu 2012 nibwo Bizimana Jean Bosco yasoje amasomo muri Kaminuza Yigenga ya Kibungo (UNIK). Akirangiza nta kindi cyahise kimuza mu mutwe uretse gushaka uko yakoresha neza ubumenyi yahakuye agakemura ikibazo cy’imirire mibi cyarangwaga mu Murenge wabo wa Kazo ho mu Karere ka Ngoma.

Byaramuhiriye uruganda ararutangira ngo n’ubwo bitari byoroshye, arwita Panovita bisobanuye ‘ umugati w’ubuzima’.

Mu kiganiro yagiranye na IGIHE, yavuze ko buhoro buhoro yagiye atera imbere kugera ubwo uruganda rwe rutangiye kumenyekana atanga akazi ku bakozi benshi anatangira no gukorana n’amakoperative y’abahinzi.

Yagize ati “Kuva natangira nageze kuri byinshi birimo no gukorana neza n’abahinzi 2100 baturuka muri koperative 11 zihinga ibigori, amasaka, soya ,imboga hamwe n’ibindi. Ibindi nagezeho nuko nabashije kwigurira ikibanza nkubaka uruganda rwiza tukava mu kazu gato twakoreragamo.”

Iyo ukora ibintu byiza ntabwo isoko ari ikibazo mu Rwanda

Bizimana Jean Bosco avuga ko kuva yatangira gukora atarigera na rimwe abura isoko ry’ibicuruzwa bye kuko abanyarwanda babyakiriye neza cyane.

Yatangiye atunganya umusaruro ungana na toni eshatu ku munsi ariko kuri ubu nyuma yo guhabwa imashini n’ Umuryango w’abanyamerika ugamije iterambere (USAID) asigaye atunganya umusaruro ungana na toni icumi ku munsi.

Akomeza agira ati “ Dufite amasoko mu bigo nderabuzima, mu nkambi ya Mahama, Iwawa, Mu ma Compassion atandukanye ndetse n’ahandi hantu henshi hatandukanye, isoko ryo si ikibazo mu Rwanda mu gihe ukora ibintu byiza.”

Abahinzi ntibakijarajara bajya gushaka ubagurira umusaruro

Nizeyimana Alex , umwe mu bahinzi bakorana na Bizimana avuga ko mbere bataratangira gukorana, bakundaga kwishyira hamwe bakajyana umusaruro wabo i Kigali, bagerayo bakabagurira ku mafaranga make ngo kuko nta rindi soko bari bafite bakemera.

Ati “ Yaraje araduhugura adusaba guhinga ibishyimbo bikungahaye ku butare aduha n’imbuto yabyo, iya soya, amasaka y’umweru n’ibindi byinshi twamara kweza akabitugurira ku giciro cyiza cyane, ubu inaha twaruhutse gupakiza imyaka tuyijyana i Kigali.”

Abakobwa babyariye mu rugo bahawe agaciro

Muri Panovita harimo abakobwa umunani b’abangavu batewe inda. Ubu bahawe akazi kugira ngo babone uko bita ku bana babo.

Mukabaranga Emelyne wabyaye afite imyaka 18, avuga ko yari abayeho mu buzima bubi nyuma aza kubona amahugurwa bigizwemo uruhare na Panovita.

Ati “ Nyuma yo guhugurwa nahise mpabwa akazi umwana wanjye ntabwo akibura umwenda wo kwambara cyangwa ngo abure amafaranga y’ishuri. Ikindi niteje imbere ngura ihene ebyiri nziza kuburyo nzitezemo umusaruro mu mezi make ari imbere.”

Bizimana avuga ko mu bikimugora bituma umusaruro utagenda neza nkuko bikwiye ngo harimo umuriro muke utabasha guhagurutse imashini zose.

Yavuze ko nibabona umuriro uhagije bazazamura umubare wa toni bakora ku munsi, bakarushaho kwagura isoko ryabo.

Kuri ubu uruganda rwa Panovita rufite agaciro ka miliyoni 109 harimo miliyoni 26 zatanzwe na USAID.

Rukoresha abakozi bahoraho 20 n’abahinzi batandukanye barugemurira umusaruro.

Rukora ifu zitandukanye zirimo kawunga, ifu y’igikoma ku bana n’ababyeyi n’izindi.

Bizimana Jean Bosco avuga ko imashini yahawe na USAID zamufashije kongera umusaruro cyane
Nizeyimana avuga ko kuva batangira gukorana na Panovita batakigira ikibazo cy'aho bagurisha umusaruro wabo
Uruganda Panovita rukoresha abakozi bahoraho 20 n’abahinzi batandukanye barugemurira umusaruro.
Uruganda rwa Bizimana rukora ifu zitandukanye zirimo kawunga, ifu y’igikoma ku bana n’ababyeyi n’izindi.

Ibitekerezo

  • Komeza utere imbere ubera n’abandi urugero.


Tanga igitekerezo


BIGEJEJEYO