00:00:00
IGIHE NETWORK

Uko ubushomeri bwatumye abakobwa b’i Karenge biga gukora imitako bayivanye mu migwegwe n’ubuhivu

Amezi atandatu arashize bamwe mu bakobwa bo mu murenge wa Karenge mu Karere ka Rwamagana, bihurije hamwe bagatangira kuboha imitako itandukanye bifashishije imigwege n’ibyatsi by’ubuhivu.

Ni nyuma y’amezi atandatu bari bamaze bahugurwa n’umushinga w’abanyamerika Indego Africa, wabahaye ubumenyi bw’uburyo bimwe mu bintu biboneka iwabo byakongererwa agaciro bikabyazwa umusaruro.

Abo bakobwa bihurije muri koperative Ubumwe-Karenge, batangirira ku mafaranga bari barakuye mu mitako bagurishije ubwo bigishwaga, bongeraho andi make batangira kubyaza umusaruro ibyo bigishijwe.

Ubwo IGIHE yasuraga abo bakobwa muri iki cyumweru, yasanze mu mezi make bamaze batangiye, bafite icyizere ko koperative yabo izagera kure kandi igafasha agace batuyemo.

Umuyobozi wa Koperative Ubumwe Karenge, Vuguziga Jeannette yavuze ko batangiye ari abakobwa 30 bagatangira bose babitewe n’ubushomeri , icyakora bamwe bagiye bacika intege ku buryo basigaye ari 12.

Nyuma yo kwigishwa kubyaza imigwegwe n’ubuhivu imitako itandukanye nk’uduseke, intango n’ibindi, Vuguziga avuga ko babonye kujyana ubwo bumenyi iwabo buri wese agakora ibye ntacyo bizabagezaho.

Ati “ Twabonye ko umuntu umwe najya iwabo akabikora ku giti cye nta kintu azabimaza. Twabonaga tutabona isoko ryo kubigurisha. Twabonye ko twihurije muri Koperative twabona umusaruro mwinshi kandi bikadufasha kubona isoko”.

Ku mafaranga make bari bamaze gukura mu mitako bagurishije biga, bongeyeho andi buri munyamuryango atanga ibihumbi 10, babona ayo kujya kugura ibikoresho.

Umushinga wari umaze kubaha ubumenyi, wahise unabashakira isoko muri Leta Zunze Ubumwe za Amerika ari naryo kugeza ubu bagifite.

Vuguziga avuga ko abanyarwanda benshi bataraha agaciro ibyo bakora, kuko batumva agaciro k’imitako cyangwa ngo bumve ubwiza bw’ikintu cyaturutse mu migwegwe n’ubuhivu.

Ati “Umunyarwanda uramuca ibihumbi bitatu akavuga ngo ndakimaza iki, ngo ninsukaho amazi azameneka, ati icyiza nafata ayo mafaranga nkajya kuyagura isahani naho iki nta cyo nakimaza.”

Kubera isoko ritagutse, aba bakobwa bafite impungenge ko habaye nk’ikibazo isoko ryo muri Amerika rigahagarara, nabo akazi kabo kahagarara.

Icyakora, bemeza ko bakomeje kumenyekanisha ibyo bakora ku buryo n’abanyarwanda bazagera aho bakabikunda.

Nubwo bimeze gutyo, aba bakobwa bemeza ko hari byinshi babashije kwikemurira, bitajyaga bishoboka mbere.

Kanda hano urebe video kuri Dailymotion

Vuguziga yavuze ko hari nk’ubwo batahana 3500 Frw ndetse ibiraka byaba byinshi hakaba n’uwatahana ibihumbi 20 Frw.

Muhoranimana Marie Solange ni umwe muri aba bakobwa watangiranye na Koperative.

Yabwiye IGIHE ko kuva yayinjiramo amaze kwiteza imbere ndetse n’umuryango we wabyungukiyemo.

Yagize ati “Amafaranga nakoreye hano nayajyanye mu matsinda, mbonye ndi kunguka ncuruza mitiyu, mfata umwana arancururiza nkajya mwishyura kandi mbona binyungura.”

Tuyishimire Chantal nubwo yari arangije amashuri yisumbuye, atarihuza na bagenzi be avuga ko no kwigurira amavuta byari ingorabahizi.

Icyakora kuri ubu yemeza ko umwuga akora umutunze. Ati “ Byarangoraga kuba nakwigurira amavuta cyangwa umwenda wo kwambara. Nagombaga kubibaza ababyeyi ariko ubu mbasha kubyigurira n’ibindi bibazo byo mu rugo byoroheje nkabasha kubafasha.”

Mu myaka itanu iri imbere, abagize Koperative Ubumwe –Karenge bifuza kuba bongereye ubwinshi bw’ibyo bakora, bakaba babasha gukora ibindi birimo nk’amaherena, imitako iriho amagambo n’ibindi.

Vuguziga asobanura ko baje gusanga kwihangira umurimo by’umwihariko ku bakobwa, ari ukwihesha agaciro.

Ati “Hari ubona tuje hano akavuga ngo njye ntabwo najya kwirirwa nicaye hariya. Nyamara twe tuhicaye tuzi icyo hatumariye. Hanze aha hari ibibazo byinshi ushobora guhura nabyo uri umwana w’umukobwa kuruta uko waza kwirirwa wicaye hano.”

Ubushakashatsi bwakozwe n’Ikigo cy’Igihugu cy’Ibarurishamibare mu 2017, bwagaragaje ko ubushomeri mu rubyiruko buri kuri 21 %.

Muri gahunda ya Guverinoma y’imyaka irindwi (2017-2024) hateganyijwe guhanga imirimo mishya miliyoni 1.5.

Ubuhivu bwifashishwa mu gukora imitako
Vuguziga asobanura ko baje gusanga kwihangira umurimo by’umwihariko ku bakobwa, ari ukwihesha agaciro
Imigwegwe ni imwe mu bikoresho byifashishwa n'abagize Koperative Ubumwe Karenge
Tuyishimire Chantal yavuze ko kwibumbira hamwe byagize akamaro
Aba bakobwa bakora imitako y'ubwoko butandukanye
Aba bakobwa bavuga ko bafite isoko ry'imitako yabo muri Leta Zunze Ubumwe za Amerika
Muhoranimana Marie Solange avuga ko kuva yakwihuriza hamwe na bagenzi be amaze kwiteza imbere ndetse n’umuryango we wabyungukiyemo

Ibitekerezo

  • fssfggs


Tanga igitekerezo


BIGEJEJEYO