Abantu 10 bahamijwe icyaha cyo kwiba Kim Kardashian i Paris

Yanditswe na Dusabimana Aimable
Kuya 15 Mutarama 2017 saa 10:49
Yasuwe :
0 0

Abantu icumi muri 17 bari bakurikiranyweho kwibira Kim Kardashian mu Bufaransa bahamijwe kugira uruhare muri icyo gikorwa cyabaye ubwo aheruka i Paris mu mpera za 2016.

Mu masaha ashyira igitondo cyo ku wa 3 Ukwakira 2016 nibwo Kim Kardashian yacucuwe n’abajura babiri bambaye imyenda nk’iya Polisi, bamufatiyeho imbunda ubwo bari bamusanze mu cyumba cya hoteli yitwa “No Adress” yari acumbitsemo mu Mujyi wa Paris.

AFP yatangaje ko ku wa Kane w’iki Cyumweru umucamanza wo mu Bufaransa ukurikirana ikirego cy’abibye uyu munyamideli uzwi cyane ku Isi aribwo yanzuye ko abantu bane muri 17 bahamwa n’ibyaha bari bakurikiranyweho.

Abandi batandatu nabo ku wa Gatanu w’iki Cyumweru urukiko rw’i Paris rwemeje ko bakomeza kuba bafunzwe kuko hari ibimenyetso simusiga byatanzwe n’ubushinjacyaha bigaragaza uruhare bagize muri ubwo bujura.

Umwe mu bafashwe wahawe izina rya “Omar the Old” ni we bivugwa ko yateguye umugambi wo kwiba Kim Kardashian, uyu ngo banasanze DNA ye ihura neza n’ibimenyetso byavuye mu perereza rya Polisi, byemezwa ko ari mu waziritse Kim Kardashian ubwo yibwaga.

Abahamijwe kugira uruhare mu bujura bwakorewe Kim Kardashian ni abagabo icyenda ndetse n’umugore umwe. Mu bafashwe harimo abafite imyaka 27 kugeza kuri 74.

Ntiharatangazwa ibijyanye n’ibihano aba bahamijwe kwiba Kim Kardashian bazahabwa, gusa amakuru atangazwa n’ikinyamakuru The Mirror cyo mu Bwongereza avuga ko bazakatirwa igihano cy’igifungo muri gereza.

Umushoferi watwaraga Kim Kardashian mu Bufaransa aho yibiwe we yararekuwe, murumuna we aba ari we ufatwa. Bivugwa ko abahamijwe kwiba Kim Kardashian basanzwe ari abajura ruharwa mu gatsiko k’abayogoje u Bufaransa n’u Bubiligi biba imitako y’agaciro.

Muri iki gihe Kim Kardashian ari mu Mujyi wa Dubai mu ruzinduko rwe rwa mbere kuva yafatirwaho imbunda mu Bufaransa.

Mu Ukwakira akimara kwibwa yahise ava mu Bufaransa igitaraganya, yohererejwe indege ye bwite imusubiza muri Amerika aho asanzwe atuye n’umuryango we. Yongeye kubivugaho haciyeho igihe.

Mu cyumba yari afitemo amafaranga yo kwifashisha n’imirimbo y’agaciro ifite agaciro ka miliyoni esheshatu z’amadolari, ibi byose abajura barabikukumbye barabyandurukana ntibamenyekana.

Kim Kardashian kandi bamwibye impeta ihenze yambitswe n’umugabo we Kanye West, iyi ifite agaciro ka miliyoni enye z’amadolari ya Amerika. Mu byo bamwibye harimo telefone ebyiri zihenze, ngo hari imwe yari irimo amabanga menshi ye.

Umuvandimwe w'Umushoferi wa Kim Kardashian ari mu bahamwe n'uruhare muri ubu bujura
Abantu benshi batawe muri yombi kubera ubujura bwakorewe Kim Kardashian
Akimara kwibwa, Kim Kardashian yahise asubizwa muri Amerika aho asanzwe atuye n’umuryango we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza