I Kigali hateguwe ibirori by’imideli bizakusanyirizwamo inkunga yo gufasha impunzi

Yanditswe na Dusabimana Aimable
Kuya 14 Ukuboza 2016 saa 09:04
Yasuwe :
0 0

Amahuriro atandukanye y’abakora ibijyanye n’imideli yaturutse hanze y’igihugu yihurije hamwe n’akorera i Kigali bategura igitaramo cyo gukusanya inkunga yo gufasha impunzi z’Abarundi ziri mu nkambi ya Mahama.

Ni ibirori byiswe ‘Refugees Matter Show’ cyateguwe n’ikigo cyitwa Abigaelle Closet gisanzwe gikorera i Portland muri Leta Zunze Ubumwe za Amerika. Iki kigo cyashinzwe n’urubyiruko rukomoka mu Rwanda no mu Burundi gikora kikanagurisha imyenda y’amoko atandukanye.

Mu kiganiro n’umuyobozi wa Abigaelle Closet, Abigaelle Judicaelle Irakoze yabwiye IGIHE ko yagize iki gitekerezo cyo gukora ibi birori nyuma y’iminsi yari amaze i Kigali, yiyambaza abandi bantu batandukanye bakora umwuga nk’uwe ngo bafatanye gutegura iki gikorwa kizakusanyiriza hamwe amafaranga azajya gufasha impunzi mu nkambi ya Mahama mu Karere ka Kirehe.

Yagize ati “Twifuje kubera ijwi abatarifite, kuba icyizere ku batagifite, ni muri urwo rwego twatekereje gukoresha kumurika imideli nka kimwe mu bikorwa byagira akamaro mu gufasha abatishoboye.”

“Twateguye iki gikorwa mu rwego rwo gufasha impunzi z’Abarundi ziri mu nkambi ya Mahama, amafaranga azavamo yose azakoreshwa mu bikorwa by’ubufasha birimo kubagezaho ibikoresho nkenerwa, imyambaro n’ibindi tuzasanga ari ngombwa kuri bo.”

Yongeyeho ko usibye amafaranga azakusanyirizwa muri iki gitaramo, abazitabira bashobora no kwitwaza imyambaro mizima itagikoreshwa mu rwego rwo kongera ingano y’imfashanyo izatangwa ku mpunzi ziri mu nkambi ya Mahama bifuje gufasha.

Ibi birori by’imideli biteganyijwe kuba ku wa Gatanu tariki 16 Ukuboza 2016 muri Hotel des Milles Collines i Kigali guhera saa kumi n’ebyiri kugeza saa yine z’ijoro. Kizasusurutswa n’abahanzi batandukanye barimo Eric 1Key n’abanyarwenya barimo na Michael Sengazi uzaba n’umushyushyarugamba w’iki gitaramo.

Abigaelle Closet yateguye iki gikorwa, izifatanya n’abandi bahanzi b’imideli barimo abo muri Uzuri K&Y ikora inkweto, abo muri ByAlpha Couture bakora ibijyanye n’imisatsi, Dokmai Rwanda n’abandi benshi.

Imwe mu mideli ihangwa na Abigaelle Closet


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza