Iserukiramuco ry’imideli yo mu bukwe rigiye kubera i Kigali

Yanditswe na Munyengabe Murungi Sabin
Kuya 6 Ukuboza 2016 saa 03:50
Yasuwe :
0 0

Hagamijwe guteza imbere ibikorerwa mu Rwanda no kumenyekanisha umuco, i Kigali hagiye kubera iserukiramuco ry’imideli Abanyarwanda barimbana mu bukwe guhera mu gihe cyo gufata irembo kugeza ku muhango wo gutwikurura.

Ibirori by’imideli yo mu bukwe [Wedding Fashion Show] bizabera i Kigali mu gihe cy’iminsi ibiri guhera ku itariki ya 9 Ukuboza kugeza kuwa 10 Ukuboza 2016.

Mu kiganiro na IGIHE, Rusanganwa Laurent uyobora ikompanyi The Wedding Plus Ltd ari nayo iri gutegura iki gikorwa yatangaje ko nyuma yo gutembera muri Uganda ,Kenya ndetse na Australia bakabona uburyo iserukiramuco ry’imideli yambarwa mu bukwe ihuruza abantu batagira ingano byabahaye imbaraga gufata bafata umwanzuro wo kubitegura mu Rwanda.

Ati” Twasanze twarasigaye inyuma ntabwo ibi bintu byo kumurika imideli yambarwa mu bukwe abantu babizi. Nyamara ni igikorwa gituma ibikorerwa mu Rwanda bimenyekana ndetse n’abanyamahanga baba mu gihugu cyacu bakabizamo dore ko abo dutumira mu bukwe bwacu baba ari bake.”

Rusanganwa yakomeje avuga ko iryo serukiramuco ry’imideli rizitabirwa n’inzu enye zikora imideli mu Rwanda ariko hakazibandwa ku yambarwa mu bukwe n’ibindi birori bisaba kurimba

Ati” Kugira ngo duteze imbere gahunda ya Leta yo kumenyekanisha ibikorerwa mu Rwanda ,twatumiye Amazing Fashion Shop, ALTA Fashion and Decoration,Rupari Designs,Yozata, Monial Glamoor, abo bose bazamurika imideli bikorera mu guteza imbere Made in Rwanda”

Iri serukiramuco ritamenyerewe mu Rwanda ni igikorwa kimwe mu bizaba bigize imurikagurisha ry’iminsi ibiri ryiswe Rwanda Wedding Expo rizahuriramo abafite ibikorwa bifite aho bihuriye no gutegura ubukwe.

Abazamurika ibikorwa byabo muri Rwanda Wedding Expo ni abambika abageni, abatanga serivisi za decoration, abasokoza abageni, abakora cakes, sonorisation, abafotora abageni, abakora impeta, abacuruza amavuta yo kwisiga, abacuruza indabo, abakodesha imodoka zifashisha mu bukwe n’ibindi bitandukanye.

Ibyo ngo bizafasha abafite ibirori bya vuba n’ababiteganya mu gihe kizaza kugira amakuru ahagije n’amahitamo menshi y’uwo bagomba guha akazi kabo.

Rusanganwa Laurent ati” Usanga nkiyo uzi umuntu umwe gusa ufotora ukamuhamagara afite akazi kenshi hari ubwo yanga kukwitaba cyangwa akakurangira adakora neza ariko ubaye uzi abantu benshi byari kugufasha.”

Iri serukiramuco rizamara iminsi ibiri, rizaba ku wa gatanu tariki ya 9 no ku wa gatandatu tariki ya 10 Ukuboza 2016, kwinjira bizaba ari ubuntu mu gusura abarimo kumurika ibikorwa byabo.

Naho ku mugoroba wo ku itariki ya 10 Ukuboza habe ibirori byo gusoza ari nabwo hazabaho igikorwa cy’iserukiramuco ry’imideli yambarwa mu bukwe kizatangira saa kumi n’imwe kugeza saa yine z’ijoro.

Rusanganwa Laurent , umuyobozi w'Ikompanyi Wedding Plus Ltd

Muri ibyo birori byo kwerekana imideli abazabyitabira bazasusurutswa n’abahanzi Charly na Nina ndetse na DJ Pius.

Iryo serukiramuco riteganyijwe ko rizitabirwa n’abantu bagera ku gihumbi buri munsi ,rizabera mu Mujyi wa Kigali rwagati mu nyubako ya Kigali City Tower ahasanzwe habera ibitaramo.

Ni igikorwa kigiye kujya kiba buri mwaka mu rwego rwo gufasha Abanyarwanda kudasigara inyuma mu kumenyekanisha ibyo bakora bijyanye n’imideli.

Muri ibi birori hazerekanwa imyambaro yo mu nzu enye zihanga imideli mu Rwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza