‘KGL’ umudeli mushya uje guhangana n’imyambaro ituruka mu mahanga

Yanditswe na Munyengabe Murungi Sabin
Kuya 13 Ukuboza 2016 saa 07:26
Yasuwe :
0 0

Urubyiruko rwibumbiye mu kigo cyitwa DCIB[Dawn Central Investiment Bureau] rwatangiye gusakaza imyambaro yanditseho amagambo ‘KGL’ , bihaye inteko ko bitarenze umwaka wa 2017 izaba yamamaye mu gihugu hose.

Inzu y’imideli ya DCIB[Dawn Central Investiment Bureau] icuruza imyenda ifite ibirango bya ‘KG’L[impine y’izina Kigali], ubuyobozi bwayo buvuga ko bazanye iyi myambaro mu rwego rwo gufasha leta mu rugendo rwo kugabanya ibiva mu mahanga bimika ibyakorewe mu Rwanda[Made in Rwanda].

Umuyobozi w’iyi nzu y’imideli, Habimana Felix yabwiye IGIHE ko iyi myenda iva mu mahanga itarangiye neza hanyuma yagezwa i Kigali bakayishyiraho ibirango bigaragaza ko yakozwe n’Abanyarwanda gusa ngo mu myaka iri imbere bizeye ko bazaba barabonye ubushobozi bagatangira kuyidoda kugeza isohotse yuzuye.

Yagize ati “Navuga ko ibari yarakozweho imirimo imwe n’abantu bo mu mahanga kuko ibyo tuyikoramo tubitumiza mu Bushinwa hanyuma yagera inaha tugakoraho utuntu duke no kwandikaho aya magambo ubundi ikajya ku isoko.”

Yongeyeho ko mu mpamvu nyamukuru zatumye bahitamo gusakaza imyenda yanditseho ‘KGL’ ngo ni uko babona abantu benshi mu Rwanda bambaye ibyanditseho amazina y’imijyi nka New York, Chicago n’ayandi.

Ati “Gahunda yacu ni ukwambika Abanyarwanda imyenda bibonamo, biracyatubabaza kubona abantu bambaye imyenda yanditseho amazina y’ibindi bihugu n’indi mijyi izwi nyamara kubona uwambaye Kigali ntibipfa gukunda, icyo nicyo tuje gukemura.”

Arongera ati “Ikituzanye ni ukwambika Abanyarwanda ibintu byiza, gahunda ya leta ihari ni uguteza imbere ibikorewe mu gihugu icyizere kirahari ko abakiriya bazaboneka kandi tuzakora ibishoboka bizanogere abazabyambara.”

Habimana afatanyije na mugenzi we witwa Tuyishimire Desire, aba bombi bavuga ko imideli yabo izakundwa ku isoko kubera umwihariko ifite ndetse ngo itandukanye cyane n’indi yagiye icaracara nayo ifite amagambo ajya gusa n’aya.

Ati “Ubu turi mu biganiro na bamwe mu bahanzi ndetse n’abanyamideli bazadufasha kwamamaza no kumenyekanisha imyenda yacu. Intego twihaye ni uko mu gihe kitarenze umwaka umwe imyenda dukora igomba kuzaba yamaze kumenyekana kandi ari icyitegererezo mu gihugu.”

Imideli batangiye gusakaza kugeza ubu harimo ingofero ndetse n’imipira yanditseho ‘KGL’. Ingofero bayigurisha amafaranga ibihumbi icumi[10,000frw] naho umupira ukagurishwa ibihumbi 30.


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza