Uburyo Jennifer Lopez yatumye hatangizwa Google Images

Yanditswe na Uwiduhaye Theos
Kuya 19 Gicurasi 2019 saa 12:19
Yasuwe :
0 0

Umuhanzikazi Jennifer Lopez uri mu banyabigwi mu muziki ku Isi, yavuze uko ikanzu ya Versace yambaye mu 2000 mu itangwa ry’ibihembo bya Grammy yatumye benshi bacika ururondogoro igatuma hajyaho Google Images.

Google Images ni uburyo bwo gushakisha amafoto kuri internet mu ishakiro rya Google. Yatangiye ku wa 12 Nyakanga 2001 kubera Jennifer Lopez.

Mu rukurikirane rw’ikiganiro gica ku rubuga rwa Youtube cyitwa Moments of Fashion, Jennifer Lopez, yavuze ku bigwi by’ikanzu ya Versace yambaye mu bihembo bya Grammy mu 2000.

Avuga ko icyo gihe imirabyo ya camera z’abafotozi batandukanye yatangiye kumwerekeraho, abantu bamushyiraho ijisho biramutungura.

Ati “Mu by’ukuri, ubwo nari nambaye ikanzu y’icyatsi ya Versace yo mu bwoko bwa Jungle Print, nibwo numva nagize ibihe byiza mu bijyanye no kurimba. Byari ibintu bidasanzwe, abafotozi batangiye kwerekeza camera zabo aho zitari zisanzwe zerekera. Hari hari imbaraga zidasanzwe. ”

Icyo gihe ngo Jennifer n’ubwo nta gihembo yegukanye yatunguwe no kubyuka yisanga ariwe ibinyamakuru byinshi biri kwibandaho ndetse ku bifuniko byinshi byabyo ariwe uriho.

Lopez muri aya mashusho amara iminota icyenda akomeza avuga ko iyi kanzu yari yambaye yahumuye benshi amaso bagatangira kuyishaka bayibura bigatuma Google ishyiraho Google Images.

Ati “Twirengagije uko abantu basigaye bavuga, iyi kanzu yagize ingaruka nziza mu Isi y’ikoranabuhanga ndetse ituma Google ifata umwanzuro wo guhanga Google Images. Nyuma y’imyaka yakurikiyeho naje kuvumbura ko kubera iryo joro ndetse n’iyo kanzu, Google Images aribwo yahise ihangwa.”

Icyo gihe abantu benshi batangiye kuyishakisha ariko nta buryo bwari buhari bwo gushakira ifoto kuri internet, Google ishaka uburyo bwo gukemura icyo kibazo yifashishije Google images.

Yahise avuga asa nk’uri gutebya ati “ahubwo mfite impungenge, sheki yanjye irihe ?”

Sergey Brin uri mu bashinze urubuga rwa Google nawe yigeze gushimangira ko ihangwa rya Google Images ryatewe na Jennifer mu nyandiko yasohowe na The Tinkerer’s Apprentice muri Mutarama 2015.

Brin yagize ati “Muri icyo gihe, mu ishakiro ryacu hagaragayemo umubare munini mu buryo butari busanzwe ariko ntabwo byari kudukundira ko icyo bashakaga bakibona. Jennifer yambaye iriya kanzu. Google Images iravuka.”

Lopez yakomeje ati “Ibi bikwereka imbaraga z’ibijyanye n’imideli ndetse n’imbaraga z’ibihe nk’ibyo. Ndabizi abantu bageragezaga kuyitesha agaciro muri ibyo bihe ariko icyo ibyo bintu bikora biha abantu umwuka wo guhanga. Ishyira ibihe byiza hanze mu Isi. Ikanzu imwe ishobora guhindura uburyo abantu barimbagamo mu myaka 10.”

Donatella Versace niwe wambaye iyi kanzu mbere y’uko Jennifer Lopez ayambara ariko ntibyigeze bivugwa cyane.

Reba amwe mu mafoto y’iyo kanzu Jennifer yambaye igatuma Google Images ibaho


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza