Umuhanzi Nkurunziza yamuritse ubugeni bwerekanwa hakoreshejwe imideli (Amafoto)

Yanditswe na IGIHE
Kuya 6 Gicurasi 2017 saa 05:16
Yasuwe :
2 0

Umuhanzi w’ubugeni bwo gushushanya no gukora ibibumbano, Innocent Nkurunziza, unakuriye inzu y’ubugeni yitwa ‘Inema Art Center’ iherereye ku Kacyiru, yamuritse ibikorwa by’ubugeni bwe akoresheje abanyamideli ibizwi nka ‘Illusion’.

Ku wa Kane tariki 4 Gicurasi 2017 abantu benshi biganjemo abanyamahanga n’abahanzi basanzwe basura Inema Art Center, bahuriye .....mu gikorwa cyari kigamije kwerekana ibikorwa by’ubugeni bitandukanye hakoreshejwe abanyamideli biyerekanaga babyambaye, ibimenyerewe nka ‘Fashion Show’ mu ndimi z’amahanga.

Mu gice cya mbere cy’iki gikorwa abanyamideli 10 barimo abazwi cyane nka Jay Rwanda, Kalisa Winnie, Neza Rachel, biyerekanye bambaye ibihangano bisanzwe bimanikwa ku nkuta, banambaye inkweto zikozwe mu ibihingwa n’ibimera bisanzwe (Vegan) zakozwe n’uruganda rwa Native Shoes.

Nkurunziza yatangarije IGIHE ko icyo yifuza ari uko ubugeni butera imbere cyane kuko azi ko buba ahantu hose no mu ruganda rw’imideli.

Yagize ati “Iki gikorwa si icy’ubugeni gusa cyangwa imideli gusa ahubwo byose birajyana kuko byose bisaba ko umuntu aba umuhanzi kugira ngo abikore.”

Yakomeje avuga ko iyi ari intangiriro kuko yifuza kuzageza no hanze y’u Rwanda ubu buryo budasanzwe bwo kwerekana ubugeni hakoreshejwe imideli.

Ashishikariza abantu kwerekana impano zabo kandi bakazirikana gukoresha ibintu bisanzwe bafite mu buzima bwabo bwa buri munsi batagendeye ku bituruka mu Isi y’ikoranabuhanga.

Iki gikorwa cyitabiriwe na bamwe mu bahanzi barimo, Jolie Claudine Murenzi uzwi cyane mu ruhando rwa sinema, washimye cyane ibikorwa bya Nkurunziza.

Yagize ati “Nkurunziza ni umuhanzi mu birebana n’imideli wuzuye [fashion designer], ntabwo ari umutayeri [tailleur] nka benshi mu bo tubona hano hanze bakunze kwiyita ko bahanga imideli.”

Asobanura ko impamvu amwemera nk’umuhanzi ari uko ibihangano bye ubisangana umwihariko udashobora kubona ahandi.

Inema Art Center ni itsinda ry’abahanzi 10 b’ubugeni b’abanyarwanda bishyize hamwe bagamije guhuza impano yabo yo gushushanya no kuyibyazamo umurimo wabatunga, cyane cyane ibijyanye n’ubugeni Nyafurika, ubukorikori, umuziki n’imbyino.

Abahanzi bo mu nzu Inema bakora ubugeni bwo gushushanya [Painting], gukora ibibumbano [Sculpture], n’ibihangano bimanikwa ku nkuta. Inema Art Center itanga n’amahugurwa n’ubumenyingiro mu bijyanye n’ubugeni.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza