Umunyamideli Alexia Mupende yunamiwe mu birori bya Rwanda Fashion Week 2019 (Amafoto)

Yanditswe na Muvunyi Arsène
Kuya 9 Kamena 2019 saa 09:34
Yasuwe :
0 0

Umunyamideli Alexia Mupende wishwe akaswe ijosi mu ntangiriro za 2019 yibutswe mu birori byo kumurika imideli bya Rwanda Fashion Week 2019.

Ibi birori byabereye muri Kaminuza y’u Rwanda, Ishami ry’Ikoranabuhanga muri School Of Architecture And Environment [SABE] ku mugoroba wo ku wa 8 Kamena 2019.

Ni ku nshuro ya kane byari bibaye by’umwihariko n’iya mbere bifashe izina rya Rwanda Fashion Week dore ko imyaka yindi yabanje byitwaga Collective Rwanda Fashion Week.

Ni ubwa mbere kandi byari bibereye ahantu hadatwikiriye [outdoor runway] ndetse abamurika imideli bakoraga urugendo rujya kuba rurerure baca imbere y’abantu babarirwa muri 500 bari baje kwihera ijisho.

Ahagana saa moya n’igice abantu benshi bari bamaze kugera mu myanya yabo, ubanyujijemo ijisho abenshi bari ab’igitsina gore kandi bambaye neza bigaragara ko ibyo kurimba babisobanukiwe.

Aba barimo abana ba Perezida wa Repubulika y’u Rwanda Paul Kagame barimo Ange Ingabire Kagame n’umukunzi we Bertrand Ndengeyingoma.

Uwari uyoboye ibi birori Kwizera Arnold, yatangiye avuga ko uyu munsi udasanzwe kuri we kuko itariki nk’iyi mu myaka itandatu ishize aribwo nyina yashyinguwe.

Igikorwa nyirizina cyo kumurika imideli cyatangijwe na Sonia Mugabo uri mu itsinda rya Collective Rwanda. Imideli ye yerekanye ni iyambarwa n’abagore igizwe n’amakanzu, amakabutura n’ibisurubeti [Jumpsuit].

Imideli yerekanwaga n’abakobwa bafite izina muri uyu mwuga nka Fiona Muthoni, Umutoni Georgette, Neza Rachel, Isheja Morella, Umutoniwase Belise na Belinda [impanga zahatanye muri Miss Rwanda 2018] n’abandi.

Inzu y’imideli imaze imyaka irindwi ikorera mu Rwanda, Rwanda Clothing niyo yakurikiyeho.

Mbere y’uko abanyamideli batambuka Kwizera wari uyoboye ibirori yasabye ababyitabiriye guhaguruka bagafata umwanya wo kwibuka Alexia Mupende, umunyamideli wubatse izina wishwe muri Mutarama 2019 n’abantu bataramenyekana.

Alexia Mupende yakoranaga bya hafi na Rwanda Clothing mu kwamamaza imideli yabo ndetse yafashije benshi mu banyamideli bigaragaje muri ibi birori.

Rwanda Clothing yerekanye imideli y’abagabo n’abagore yambarwa mu birori, igizwe n’amakote, amakanzu n’amashati y’ubwoko butandukanye

Umunya-Nigeria Emmanuel Okoro washinze inzu y’imideli ya Emmy Nesbit yanambitse Minisitiri w’Intebe w’u Bwongereza, Theresa May, yerekanye imideli ku mwanya wa gatatu. Imideli yari igizwe n’iy’abagabo n’abagore. Yari yanditseho amagambo yo mu rurimi rw’iwabo.

Maison Aline na Lisa B. Marler berekanye imideli y’abagore igizwe n’amakanzu magufi n’amaremare ari mu ibara ry’umweru n’umukara gusa. Abanyamideli babaga bafite amasakoshi yakorewe mu Rwanda.

House Tayo ya Mathew Rugamba yerekanye imyenda y’abagabo n’abagore, igitekerezo cyayo akaba yaragikomoye ku bashumba b’inka.

Inzu y’imideli ya K’tsobe yatangijwe Sarah Legrand yerekanye imideli igaragaza umuco wa Afurika aho abakobwa bari bambaye amakanzu akoze mu bigaragara nk’ibishura bakenyereye hejuru y’amabere n’abahungu bakenyereye ku gice cyo hasi hejuru bambaye ubusa. Bose nta nkweto bari bambaye.

Abahanzi b’imideli bane bakizamuka [Ingabire Claudine, Falon Rusamaza, Grace na Emmanuel] bahawe umwanya berekana imyenda yabo. Buri umwe yagendaga yerekana imideli ibiri ibiri.

Nyuma y’aba bahanzi b’imideli bakizamuka, hafashwe akaruhuko abantu bica icyaka babifashijwemo n’ikinyobwa gishya cya Mutzig Class, Bralirwa iheruka gushyirwa ku isoko, cyagenewe by’umwihariko abiganjemo urubyiruko n’abakuze bakunda ibirori.

Inzu y’imideli Moshions niyo yatangiye igice cya kabiri, aho Moses Turahirwa yerekanye imideli ye yise “Inkingi”.

Mu banyamideli berekanye imideli ya Moshions harimo Cedric Amizero usanzwe ari umuhanzi w’imideli wafatanyije n’umukinnyi w’Ikipe ya Mukura VS Iradukunda Bertrand.

Inzuki Designs yakurikiyeho yerekana imirimbo irimo amaherena, inigi, udukapu two mu ntoki ydukoze mu migwegwe n’inkweto zifunguye [sandals] ziriho imitako ikoze mu migwegwe.

Munezero Jean Vainqueur washinze inzu y’imideli ya Maison Munezero wari ugaragaye ku nshuro ya mbere muri Rwanda Fashion Week, yerekanye amakanzu y’abakobwa magufi.

Uzi Collection yinjiye mu ihuriro rya Collective Rwanda mu 2016 na yo yerekanye amakanzu maremare yagenewe kwambarwa mu birori bikomeye nk’ubukwe n’imyenda y’abagabo.

Inzu y’imideli ya Haute Baso yerekanye imideli itandukanye irimo amashati, amakoti, amapantalo, amasarubeti [jumpsuit] ku bagore n’abagabo.

Inzu y’imideli ya Orange Culture yo muri Nigeria niyo yasoje ibi birori yerekana imideli yiganjemo igaragaza imyambarire igezweho muri icyo gihugu.

Abanyamideli batandukanye bari baje kwihera ijisho
Ange Kagame yari yambaye umwenda wakozwe na Moshions
Imideli ya Orange Culture yo muri Nigeria yerekanywe i Kigali
Ukuriye inzu y'imideli ya Orange Culture yo muri Nigeria mu bitabiriye Rwanda Fashion Week 2019
Umuhanzi w'imideli Lisa B. Marler ni umwe berekanye imyenda

Amafoto: Serge Muhizi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza