Abaturiye Pariki ya Nyungwe biyemeje gucika ku ngeso yo gushimuta inyamaswa

Yanditswe na Sitio Ndoli
Kuya 14 Gashyantare 2018 saa 01:44
Yasuwe :
0 0

Bamwe mu bahoze mu bikorwa byo gushimuta inyamaswa muri Pariki ya Nyungwe, bavuga ko batazongera gufatirwa mu bikorwa byo kwangiza urusobe rw’ibinyabuzima byo muri iyo pariki kuko bibafitiye akamaro mu bikorwa by’iterambere.

Uturere twa Rusizi na Nyamasheke, ni tumwe muri dutanu dukora kuri Pariki ya Nyungwe, aho abayituriye muri utwo turere bavuga ko mbere bashimutaga inyamanswa ariko ntacyo bakuyemo akaba ari yo mpamvu barabiretse kubera ko icyo bajyaga gushakamo basigaye bakibona binyuze mu bikorwa n’imishinga bakora bagaterwa inkunga.

Ngendabanyika Ernest ati "Nigeze kujya ntega inyamaswa; ntacyo nakuyemo kuko ibyo umuntu ahiga agenda abirya nk’aho atabikoreye. Ibintu bikugirira akamaro ni ibyo wavunikiye, ukabicunga neza kuko byakuvunnye, icyatumye mbireka namaze kumenya agaciro ka Pariki ya Nyungwe, nsanga amafaranga ryinjiza ntayabona bituma ndeka ishyamba ry’abandi ariko kuri ubu mbona inyungu nk’amashuri abana banjye bigamo ndetse twatewe inkunga, turi abavumvu."

Nyirabagirishya Seraphine ati " Navuye mu ishyamba ngerageza kwiteza imbere, twateguye imishinga bagiye kuduha inkunga tugure amatungo magufi noneho mu gihe nifuza inyama sinzajya mu ishyamba kuko mfite ihene izaba yarungutse ubundi ngure akanyama."

Mbabazi Marie Louise ushinzwe guhuza Pariki z’Igihugu n’abaturage bazituriye mu Kigo cy’Igihugu gishinzwe iterambere, RDB, avuga ko imibare y’abangiza Pariki ya Nyungwe, yagabanutse ku kigereranyo cya 85%, kubera ko imyumvire y’abayituriye yahindutse bitewe n’inyungu babona mu mafaranga ava mu bukerarugendo akagaruka kubateza imbere mu bikorwa bitandukanye by’amakoperative bibumbiyemo.

Ati "Abangizaga pariki babaga ari abaturage baturiye hariya; kubera ko habayeho ubukangurambaga kugira ngo babakundishe ibirimo n’amafaranga avamo kuko na bo bagira uburenganzira bwo kugira ayo bafataho noneho aho kujya kwangiza pariki bakagenda babireka na bariya twahuguye barimo abangizaga pariki. Nkurikije uko mbibona hano muri Nyungwe 85% bateye imbere abasigaye turimo turabigisha."

Pariki ya Nyungwe isurwa n’abarenga gato ibihumbi 13 ku mwaka.

Abatuye mu Kagari ka Mutongo hafi ya Pariki ya Nyungwe mu Murenge wa Cyato bavuga ko batazasubira gushimuta inyamaswa kubera inkunga baterwa zivuye mu bukerarugendo
Ba rushimusi baragabanutse muri Pariki ya Nyungwe kubera imibereho myiza bafite
Mbabazi Marie Louise ushinzwe guhuza Pariki z'igihugu n'abaturage bazituriye mu Kigo cy'Iterambere, RDB

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza