Imyaka icumi irashize bamwe mu bimuwe muri Gishwati batarahabwa ingurane

Yanditswe na Ferdinand Maniraguha
Kuya 14 Kanama 2018 saa 09:16
Yasuwe :
0 0

Bamwe mu baturage ko mu turere twa Nyabihu na Rubavu barasaba Leta kubaha ingurane bamaze imyaka icumi bategereje nyuma yo gutanga amasambu yabo akagurirwaho ishyamba rya Gishwati.

Aba baturage bimuwe muri Gishwati mu 2008 hagamijwe kwagura no gusubiranya iri shyamba kimeza.

Mu 2015 Leta yagize ishyamba rya Gishwati-Mukura pariki, iza yiyongera kuri Pariki ya Nyungwe, Akagera n’Ibirunga.

Abaturage 60 nibo batarahabwa ingurane zabo nubwo bavuga ko ikibazo cyabo cyagejejwe ku nzego zitandukanye.

Bavuga ko ikibazo bakigejeje no ku kigo gishinzwe kubungabunga ibidukikije (REMA) nyamara bamwe bakabwirwa ko bishyuwe kandi batarishyuwe.

Habimana Jean Paul utuye mu Murenge wa Nyakiliba mu Karere ka Rubavu, aganira na The New Times yagize ati “Nagiye kuri REMA banyereka impapuro zanjye ziriho n’umukono wanjye bambwira ko ndi mu bahawe ingurane ariko naje gusanga izo mpapuro ari amasezerano y’uko nemeye kwimurwa, ntabwo ari ingurane.”

Habimana arasaba kwishyurwa miliyoni ebyiri n’igice ku isambu ye ingana n’igice cya hegitari yatanze ngo yagurirweho ishyamba rya Gishwati.

Guverinoma ivuga ko 99% by’abagombaga guhabwa ingurane bazibonye. Bivuze ko muri miliyari 1.7 yagombaga gutangwa nk’ingurane, miliyari 1.58 yamaze gutangwa.

Aba baturage bavuga ko baheze mu giharahiro kuko batabwirwa impamvu batahawe ingurane kandi bujuje ibisabwe.

Nzakamwita Samuel utuye mu Karere ka Nyabihu yagize ati “Iyo mbajije abayobozi b’akarere, bampa impapuro zo kuzuza bakambwira gutegereza. Bambwiye ko hari amakosa ari gukosorwa, ariko se bishoboka bite ko amakosa yakosorwa imyaka icumi yose?”

Umuyobozi w’Akarere ka Rubavu, Gilbert Habyarimana, yavuze ko ikibazo bakimenye kandi bashyizeho itsinda rigikurikirana ku buryo kizakemuka vuba.

Umuyobozi Mukuru w’Ikigo gishinzwe amazi n’amashyamba (RWFA) Prime Ngabonziza, yasabye abafite ikibazo kuzuza ibisabwa ubundi bakegera uturere twabo tukabaha amafaranga.

Ati “Hari abadafite indagamuntu, hari abakoresheje konti z’abavandimwe, hari n’ababuze ngo bahabwe ingurane zabo.”

RWFA ivuga ko impapuro abo baturage bazaherwaho ingurane zabo ziri ku turere twa Rubavu na Nyabihu.

Pariki y’Igihugu ya Gishwati-Mukura ifite ubuso bungana na hegitari 3558. Irimo urusobe rw’ibinyabuzima rugizwe n’ibimera gakondo, inyamaswa n’ibiguruka. Habonekamo kandi ubwoko busaga 60 bw’ibiti gakondo.

Barifuza ingurane y'ubutaka bwabo bwaguriweho ishyamba rya Gishwati

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza