Météo Rwanda yabonye uburyo buyifasha kumenya amakuru y’ikirere buri segonda

Yanditswe na Jean Pierre Tuyisenge
Kuya 23 Werurwe 2018 saa 09:00
Yasuwe :
0 0

Ikigo cy’Igihugu cy’Iteganyagihe, Météo Rwanda, cyatangaje ko kugeza ubu gifite uburyo bw’ikoranabuhanga buyifasha kubona amakuru ku bumenyi bw’ikirere mu gihe gito, Automatic Switching System (AMSS).

Ubwo ku wa 23 Werurwe 2018 hizihizwaga umunsi mpuzamahanga wahariwe iteganyagihe, Umuyobozi Mukuru wa Météo Rwanda, John Ntaganda Semafara, yavuze ko ubusanzwe amakuru y’iteganyagihe aturuka kuri sitasiyo zo hirya no hino mu turere yajyaga aza atinze bigatuma no kuyasangiza abandi bitinda.

Yagize ati “Ubu buryo buzatworohereza guhuza n’ibindi bigo by’iteganyagihe byo ku rwego mpuzamahanga ndetse natwe bidufashe kubona ayo makuru hifashishijwe ibyuma kabuhariwe.”

Yakomeje agira ati “ Mbere y’uko ubwo buryo buza, twabonaga amakuru aturuka kuri za sitasiyo zo hirya no hino mu Rwanda binyuze kuri email, none ubu tubasha kwakira no kohereza amakuru mu gihe gito kuko ni uburyo bwikoresha bidasabye umuntu.”

Ubwo buryo bufasha mu gutanga amakuru y’ukuri kandi yihuse, agasesengurwa, akoherezwa mu bindi bigo vuba.

Météo Rwanda ivuga ko yishimira kuba ifite imashini zigendanye n’igihe ku buryo bitakibatwara igihe bategereje amakuru; mbere byafataga ukwezi kose kugira ngo amakuru agere aho agomba kugera.

Usibye ubwo buryo, Météo Rwanda itangaza ko ifite radar ifata amakuru y’ikirere cyose cy’u Rwanda, ikabasha kubona amakuru yihuse, yizewe kandi bigakorwa mu gihe gito.

Gufata ibipimo by’imigwire y’imvura n’ubushyuhe mu Rwanda byatangiye ahayinga mu 1930, gusa ubupimiro bw’ibinyabihe (station) bwa mbere bwashyizweho n’abakoloni i Save mu 1906.

Météo Rwanda itangaza ko kimwe no mu zindi nzego zitandukanye, urushinzwe ubumenyi bw’ikirere rwahungabanyijwe cyane na Jenoside yakorewe Abatutsi mu 1994 bitewe n’uko ibikorwaremezo byarwo byasenywe ku kigero cya 80% hirya no hino mu gihugu.

Nyuma ya Jenoside, urwo rwego rwariyubatse ndetse hanashakwa n’uburyo bwo kuziba icyuho cy’ibinyabihe byari byaratakajwe kuva mu 1994 kugeza 2009, hahuzwa ibya mbere yaho byafashwe n’ibyogajuru muri icyo gihe ku buryo ubu amakuru aboneka kandi akaba yizewe.

Umuyobozi Mukuru wa Météo Rwanda, John Ntaganda Semafara
Abanyeshuri basuye ibyuma byifashishwa mu gupima ikirere
Ushinzwe ubupimiro muri Météo Rwanda, Umutoni Marie Adolatha asobanurira abanyeshuri imikorere y'ibyuma bikoreshwa mu gupima ikirere
Umuyobozi w'Ishami rishinzwe Iteganyagihe muri Meteo Rwanda, Twahirwa Anthony

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza