Kwamamaza

MOP28: Ibihugu bikennye byasabye guhabwa umwihariko mu gukuraho imyuka yangiza ikirere

Yanditswe kuya 13-10-2016 saa 22:44' na Rabbi Malo Umucunguzi


Guverinoma y’u Buhinde yavuze ko hari ubushake mu gukuraho imyuka yangiza akayunguruzo k’imirasire y’izuba, ariko ibihugu bikiri mu nzira y’amajyambere byahabwa igihe gihagije kuruta ibihugu bikize, mu kugenzura uko bigabanya ikoreshwa ry’imyuka iri kugenda ivanwaho.

Kuva kuwa Mbere w’iki cyumweru, intumwa zigera ku 1000 zaturutse mu bihugu 197, zakoraniye i Kigali ziga ku ivugururwa ry’amasezerano ya Montreal, aratuma hakumirwa ikoreshwa ry’imyuka yangiza ikirere icyifashishwa cyane mu byuma bikonjesha, hydrofluorocarbons (HFCs).

Abahanga mu bya siyansi bavuga ko ikurwaho rya HFCs rishobora kugabanya cyane ihindagurika ry’ibihe, hakavaho dogere Celsius 0.5 ku izamuka ry’ubushyuhe kugeza mu 2100.

U Buhinde buvuga ko kimwe n’ibindi bihugu bikennye, byahabwa igihe cyigiye imbere bigasuzumwa uko byagabanyije iyo myuka hagati ya 2024 na 2026, mu gihe ku bihugu bikize nka Leta Zunze Ubumwe za Amerika byahabwa hagati ya 2020 na 2022, kuko bifite ubushobozi bwanatuma mu 2027 byaba byagabanyijeho 70%.

U Buhinde bwagabanyije imyaka yagenerwa ibihugu bikiri mu nzira y’amajyambere, mu gihe mbere bwavugaga ko byasuzumwa nibura mu 2031.

Umunyamabanga Muri Minisiteri Ishinzwe Ibidukikije, Amashyamba n’Ihindagurika ry’Ibihe, Ajay Narayan Jha, yavuze ko bagabanyije igihe bagendeye ku iterambere ibihugu bifite, ariko ntibyirengagiza n’izindi nshingano zibategereje.

Ati “Imibare yacu yagendeye kuri ibyo, ariko mu gushimangira ibyo twiyemeje bigamije ku kurwanya ihindagurika ry’ibihe, twarasuzumye hazamo ukoroshya tugabanya ku myaka twagenderaho mu kugabanya iyo myuka hagati ya 2024, 2025 na 2026, ku bihugu nk’u Buhinde n’ibindi bike.’’

Abahinde bakoze inama basuzuma uruhande bahagararaho

“Ibi bishingiye ku koroherana kwagaragazwa n’ibindi bihugu by’umwihariko ibikize, kugira ngo habeho nk’inzibacyuho yo guhererekanya ikoranabuhanga rizakoreshwa mu myaka iri imbere, by’umwihariko nk’ibihugu biri mu nzira y’amajyambere bizagira akazi kikubye kabiri mu gukuraho imyuka ya nka HCFC na HFC.’’

Abaterankunga ku rwego mpuzamahanga biyemeje gutanga miliyoni $53 ndetse na leta Zunze Ubumwe za Amerika ziyemeza gutanga miliyoni $27, u Buhinde busaba ko hasuzumwa uburyo bwiza iyo nkunga izakoreshwa mu korohereza ibihugu bikennye mu kubona ingufu zifashishwa zitangiza ikirere.

Amavugurura ku masezerano ya Montreal azatangazwa kuri uyu wa Gatanu tariki 14, amasezerano nyir’izina akaba yaremejwe kuwa 16 Nzeri 1987, agatangira gukoreshwa kuwa 01 Mutarama 1989.

Kuva ubwo hari imyuka itandukanye yagiye ikumirwa, icyo gihe imirasire y’izuba ikaba yari itangiye kuzana ingaruka zikomeye zirimo kanseri y’uruhu, ayo masezerano akaba yararengeye ubuzima bw’abasaga miliyoni ebyiri.

Abahinde bavuze ko ibihugu bikennye byahabwa umwihariko
Umunyamabanga Muri Minisiteri Ishinzwe Ibidukikije, Amashyamba n’Ihindagurika ry’Ibihe, Ajay Narayan Jha

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved