TI Rwanda igiye gushora asaga miliyoni 90Frw mu mushinga wo guhangana n’ihindagurika ry’ibihe

Yanditswe na Evariste Nsengimana
Kuya 16 Kanama 2017 saa 01:14
Yasuwe :
0 0

Umuryango wita ku kurwanya ruswa n’akarengane, Transparency International Rwanda (TIR), ugiye gushora ibihumbi 91 297 by’amayero, asaga miliyoni 90 z’amafaranga y’u Rwanda mu mushinga wo guhangana n’imihindagurikire y’ibihe.

Uyu mushinga TIR yatangije kuri uyu wa Gatatu, tariki ya 16 Kanama 2017, yawutewemo inkunga na Minisiteri ishinzwe kwita ku bidukikije mu Budage.

Ambasaderi w’u Budage mu Rwanda, Dr Peter Woeste, yatangaje ko ihindagurika ry’ibihe ari ikibazo gihangayikishije isi.

Yagize ati “Ndakeka u Rwanda rushyize imbere guhangana n’imihindagurikire y’ibihe, icy’ingenzi cyane cyatumye twagura uyu mushinga hanze y’umugabane, ni uguhangana n’ihindahurika ry’ibihe.”

Ku bijyanye no kugenzura uko u Rwanda ruzakoresha aya mafaranga, yavuze ko kubikora bitavuze ko hari igikuba cyacitse, anashima u Rwanda kuba inzego zishyira hamwe mu bintu bitandukanye.

Yagize ati “Kugenzura uko aya mafaranga azakoreshwa ntibivuze ko ari ikintu kitagenda neza ariko iyo utagenzuye hashobora gukorwa ibitari byiza. Uyu munsi nishimiye kubona imikoranire y’inzego za Leta, imiryango itari iya Leta, polisi, urwego rw’umuvunyi, Ikigo cy’Igihugu cy’Imiyoborere bashyira hamwe. Birerekena ko ari inzego zidahigana.”

Umuyobozi wa TI Rwanda, Ingabire Immaculée yavuze ko uretse kuba irwanya Ruswa n’akarengane, inakora ku bijyanye n’imiyoborere myiza, ko imihindagurikire y’ibihe ari kimwe mu bihangayikishije isi kandi byashyizwemo amafaranga menshi bityo akwiye gukurikiranwa uko akoreshwa.

Yagize ati “Imihindagurikire y’ikirere ni kimwe mu bintu bihangayikishije isi kandi byashyizwemo amafaranga menshi cyane. Iyo uvuze amafaranga ugomba kumvamo na ruswa. Ariya mafaranga tugomba gukurikirana nibura uburyo mu gihugu iwacu akoreshwa mu guhangana n’iki kibazo. Ikindi, guhangana na cyo haba mu mategeko no mu byemezo bifatwa n’uburyo bishyirwa mu bikorwa, na byo ni ikibazo cy’imiyoborere kandi na yo tuyikoraho. Ubwo rero tugomba kureba niba akoreshwa ibyo agomba, niba no mu bijyanye n’imihindagurikire y’ibihe u Rwanda rubihagazemo neza.”

Yavuze ko nta bushakashatsi burakorwa ngo bugaragaze niba hari amafaranga yo guhangana n’imihindagurikire y’ibihe yakoreshejwe nabi.

Ingabire yakomeje avuga ko aya mafaranga ashobora kuziyongera mu gihe kiri imbere, asaba ko minisiteri zishinzwe kurengera ibidukikije zikwiye gushyira hamwe n’abaturage ndetse na Sosiyete Sivile.

Uyu mushinga wo kurengera ibidukikije, u Budage bwawutangije mu 2016, ukorera muri Bangladesh, Kenya, Koreya y’Epfo, Maldives, Mexique na Peru, ushorwamo asaga miliyoni ebyiri n’ibihumbi 400 by’amayero. Muri Werurwe uyu mwaka hiyongereyeho u Rwanda na Nepal.

Abayobozi b'inzego zitandukanye zirimo Polisi, Fonerwa, Rema n'izindi
Umuyobozi wa TI Rwanda, Ingabire M. Immaculee, aganira n'itangazamakuru
Ambasade w'u Budage mu Rwanda, Peter Woeste

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza