TIR ivuga ko Leta yubakiye ‘biogaz’ abaturage itababajije zibapfira ubusa

Yanditswe na Ndayishimye Jean Claude
Kuya 9 Werurwe 2018 saa 01:47
Yasuwe :
0 0

Umuryango Transperancy International, Ishami ry’u Rwanda, watangaje ko Leta yahaye abaturage ibikorwaremezo birimo za biogaz igamije ko bacika ku muco wo gukoresha inkwi ariko ubu ntizigikora kuko batigeze bagira uruhare muri uwo mushinga.

Ibi byatangarijwe mu ishyirwa hanze ry’icyegeranyo uyu muryango wakoreye mu turere tune ari two Karongi, Musanze, Nyanza na Rwamagana, kivuga ku mishinga yashyizwemo amafaranga menshi igamije guhangana n’imihindagurikire y’ibihe.

Muri iyo mishinga harimo iyo kubakira abaturage za Biogaz, za rondereza, kubaha amashanyarazi akomoka ku mirasire y’izuba n’ibindi.

TIR ivuga ko hari abaturage benshi baganiriye na yo bayigaragarije ko za biogaz bahawe ntacyo zibamariye, aho ngo mbere yo kuzubakirwa batigeze bigishwa uburyo zikoreshwa ndetse n’ibyo zigamije gukemura.

Nubwo hatatangajwe mu mibare abaturage bubakiwe ibyo bikorwaremezo, icyegeranyo kivuga ko ababajijwe bagera ku 1600 mu turere, 63,4% basubije ko batigeze babazwa mbere y’uko bashyirwa muri iyo mishinga. Na ho abagera kuri 70.8% bakavuga ko batazi uwo babaza amakuru igihe bahuye n’ikibazo.

Umuyobozi wa TIR, Ingabire Marie Immaculée, yavuze ko biba bikwiye ko abaturage bagira uruhare mu bibakorerwa, cyane ko iyi mishinga irimo amafaranga menshi.

Yagize ati “N’inzego z’ibanze zikwiye kubigiramo uruhare, gufasha abaturage kubumvisha ko biriya bintu ari ibyabo mbere y’uko biba iby’undi wese, kuko buriya bagiye kububakira nk’ariya maziko ya rondereza cyangwa biogaz haba hakwiye kubaho abantu bahatuye bahugurwa ku buryo bwo gufata neza biriya bikoresho n’uburyo bashobora kubisana byangiritse. Kuko ntabwo byumvikana ko iziko ryameneka ngo bavuge ngo bategereje umutekinisiye warishyizeho ngo ni we uzagaruka kubikora.”

Ashimangira ko igitekerezo cyo gushyiraho iyi mishinga ubwacyo ari cyiza, gusa ngo kugishyira mu bikorwa kwayo haracyarimo ibibazo by’ingutu birimo no kuba abagerwabikorwa badakurikiranwa ngo harebwe niba ibyo bahawe bikora uko bikwiye.

Abaturage bahawe biogaz ngo banahawe n’inka kugira ngo bazajye babona amase abasha gutuma biogaz bahawe zikora, ariko ngo ntizigikora.

Iyi mishinga inyura mu kigega FONERWA gishinzwe kurengera ibidukikije no guhangana n’imihindagurikire y’ibihe.

Minisitiri w’Ibidukikije, Dr Biruta Vincent, avuga ko ubundi umushinga wose ugenewe abaturage baba bakwiye kuwugiramo uruhare, bakagaragaza icyo bakeneye n’ikibazo bashaka ko cyakemuka.

Ati “Iyo haje raporo nk’iyi ngiyi, iba ikubwira ngo n’ubwo bikorwa bwose ntabwo bihagije, hagomba kurebwa uburyo ubutaha byazakorwa kurushaho. Ni inkunga ikomeye iturutse muri raporo nk’iyi.”

Mu mishinga itandukanye yo kubungabunga imihindagurikire y’ibihe, mu mwaka wa 2009 u Rwanda rwakoresheje miliyoni 15$, muri 2013 rukoresha miliyoni 279$ na ho muri 2016 rukoresha miliyoni 415$.

Umuyobozi wa TI Rwanda, Ingabire Marie Immaculée na Minisitiri w'Ibidukikije, Dr Biruta Vincent
Minisitiri w'Ibidukikije, Dr Biruta Vincent avuga ko bagiye gushyira ingufu mu kuganiriza abaturage mu bibakorwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza