Umuyobozi muri Ambasade y’u Budage yavuze ingorane yahuye nazo ubwo Nyabarongo yafungaga umuhanda

Yanditswe na Ndayishimye Jean Claude
Kuya 10 Werurwe 2018 saa 08:03
Yasuwe :
3
Warning: fread(): Length parameter must be greater than 0 in /home/lex94/public_html/ecrire/public/evaluer_page.php(51) : eval()'d code on line 14

Umuyobozi wungirije ushinzwe iterambere ry’ubutwererane muri Ambasade y’u Budage mu Rwanda, Mandy Hupfer, yagaragaje ko yahuye n’ibibazo ubwo umugezi wa Nyabarongo wuzuraga ugafunga umuhanda Kigali – Muhanga mu 2016.

Mandy Hupfer yitabiriye inama yahuje Transparency International Rwanda n’izindi nzego zitandukanye ziga ku mihindagurikire y’ibihe.

Muri Gicurasi 2016, imvura nyinshi yaguye mu Ntara y’Amajyaruguru, yatumye imihanda ihuza intara zitandukanye ifungwa by’agateganyo kubera amazi menshi n’inkangu byuzuye muri kaburimbo.

Ibi byatumye abagenzi baturukaga mu Ntara y’Amajyepfo batabasha kugera mu Mujyi wa Kigali.

Mandy avuga ko icyo gihe umugezi wa Nyabarongo wuzuraga yari mu Ntara y’Amajyepfo na bagenzi be. Mu gihe bari mu nzira bataha i Kigali, abapolisi bacunga umutekano wo mu muhanda ngo barabahagaritse, bababwira ko bidashoka kuko Nyabarongo yari yuzuye.

Babagiriye inama yo kunyura mu muhanda uhuza Intara y’Amajyepfo n’Akarere ka Bugesera; gusa ngo kuko batari bazi uko uwo muhanda umeze, byabaye ngombwa ko bigira inama yo gukoresha uwa Muhanga-Ngororero-Mukamira-Musanze.

Uyu muyobozi avuga ko bageze i Musanze saa munani z’igicuku, bitegura kugana i Kigali, na none abapolisi bongeye kubahagarika, bababwira ko uwo muhanda utari nyabagerwa bitewe n’uko hari inkangu yari yafunze umuhanda mu Karere ka Gakenke.

Abapolisi babagiriye inama yo guca mu Karere ka Burera ku buryo bari kunyura i Rulindo bakagera i Kigali.

Mandy na bagenzi be baraye i Musanze kuko basanze muri bose uwo muhanda batawuzi kandi batari bizeye ko waba umeze neza.

Bukeye bigira inama yo kwambukira ku mupaka wa Cyanika uhuza u Rwanda na Uganda, banyura Kisoro na Kabale barazenguruka bagera ku mupaka wa Gatuna, bafata inzira iberekeza i Kigali.

Uyu muyobozi yabwiye abitabiriye inama ko izo ari ingaruka z’imihindagurikire y’ibihe, avuga ko bikwiye ko abantu bumva ko guhangana na yo ari ingenzi.

Yashimiye Guverinoma y’u Rwanda kuko mu bihugu byo mu karere iza imbere mu gushyiraho ingamba ndetse no guhangana n’icyo kibazo.

Minisitiri w’Ibidukikije, Dr Biruta Vincent, avuga ko guhangana n’iki kibazo bigomba guhoraho mu buzima bwa buri munsi.

Yagize ati “Guhangana n’ingaruka z’imihindagurikire y’ibihe ntabwo ari ikintu tuzavuga ngo tugeze kuri 80% cyangwa 100% kuko ni imihindagurikire y’ibihe nyine, bihoraho buri munsi bigenda bihinduka buri munsi ariko kubaka ubudahangarwa ku mihindagurikire y’ibihe navuga ko hari byinshi bimaze gukorwa. Dufite ingamba, amategeko ndetse n’ikigega nka FONERWA gitera inkunga imishinga igamije guhangana n’imihindagurikire y’ibihe.”

Ashimangira ko guhagana na byo bigomba no kujya mu bindi bikorwa birimo ibikorwaremezo byujuje ibyangombwa.

Umuyobozi wungirije ushinzwe iterambere ry’ubutwererane muri Ambasade y’u Budage mu Rwanda, Mandy Hupfer
Ubwo Nyabarongo yuzuraga igafunga umuhanda, abava mu Majyefo bakabura uko bagera i Kigali

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza