U Rwanda ntirurabasha kubona umuti w’’inda’ zibasiye amashyamba

Yanditswe na Kanamugire Emmanuel
Kuya 2 Gicurasi 2017 saa 09:38
Yasuwe :
0 0

Kuva mu 2013 mu Rwanda hagararaye udusimba twitwa inda z’ishyamba, turya amababi y’inturusu bigatuma igiti kidakomeza gukura nk’uko bisanzwe, ntiharaboneka umuti ubasha guhangana n’iyi ndwara.

Inda z’ishyamba zizwi nka ‘Thaumastocoris Peregrinus’ zikunze gufata ibiti byo mu bwoko bw’inturusu ariko ngo hari amoko amwe n’amwe yazo zidapfa gufata harimo ayitwa Maidenii n’andi akunda ahantu haba ubukonje bwinshi.

Utu dusimba ngo dufite inkomoko mu bihugu inturusu zaturutsemo birimo Australia n’ahandi higanje amashyamba menshi yazo.

Inda zivuka mu magi mato cyane agenda mu muyaga ndetse abakora ubushakashatsi mu mashyamba bashobora kugira uruhare mu ikwirakwizwa ryazo.

Ikwirakwira ryazo rinafitanye isano n’imihindagurikire y’ikirere kuko uko ubushyuhe bwiyongera ni ko igiti kigira ubudahangarwa bucye bwo kurwanya indwara.

Kugeza ubu tumaze kugaragara hafi mu turere twose tugize igihugu, tukagira ubukana mu dukunze kuvamo izuba ryinshi nko mu Ntara y’Iburasirazuba.

Abaturage baganiriye na IGIHE bafite amashyamba mu Ntara y’Amajyepfo, bavuze ko bafite impungenge z’uburyo utu dusimba twangiza inturusu tukazibuza gukura.

Umwe wo mu Karere ka Nyaruguru yagize ati “Ni ikibazo gikomeye kiruhije gukemuka, ibiti byafashwe usanga nta mababi bifite, bigera aho biba bitagifite imitwe ku buryo byakomeza gukura. Iyo ubitemye nyuma yo gushibuka ntumenya aho za nda ziturutse zigahita zongera zigafata ibyatoshyeho.”

“Kurandura amashyamba yose biragoye, inda zimaze gukwira hose. Ibiti bisa n’ibyumye, imisozi yose yaratukuye. Ubusanzwe amashyamba ni yo ubukungu bwo mu giturage bwari bushingiyeho, none ntituzi aho tuzerekera.”

Uyu muturage yavuze ko mu mezi ashize ubwo havaga izuba ryinshi zari zitangiye kwadukira ibishyimbo nubwo zitabiryaga ariko ngo nta wabashaga kurya umushogoro.

“Inda ntiziragera aho zihungabanya umusaruro dukura mu mashyamba”

Umuyobozi w’Ikigo gishinzwe kubungabunga amazi n’amashyamba, Ngabonziza Prime, mu kiganiro yagiranye na IGIHE, yatangaje ko inda zitaregera aho zihungabanya umusaruro w’amashyamba.

Yagize ati “Ntaho wasanga hegitari yose yibasiwe n’udukoko, tugenda dufata ibiti bimwe cyane cyane mu turere tudakunze kubonekamo imvura nyinshi. Nta mpungenge nyinshi dufite ko dushobora gufata igihugu cyose ngo amashyamba y’inturusu arangire mu Rwanda.”

Umuyobozi w’Ikigo gishinzwe kubungabunga amazi n’amashyamba, Ngabonziza Prime, yatangaje ko inda zitaregera aho zihungabanya umusaruro w’amashyamba

Ngabonziza yakomeje avuga ko kuva inda zigaragaye mu Rwanda, hakozwe ubushakashatsi ku bufatanye n’Ikigo gishinzwe ubuhinzi mu Rwanda, RAB zoherezwa mu Bwongereza ngo harebwe ubwoko bwazo n’uburyo zarwanywa.

Bimwe mu byavuye muri ubu bushakashatsi harimo ko akenshi inda zifata amashyamba adafite ubudahangarwa, adakoreye neza ndetse ari ahantu hadafite amazi ahagije.

Ibi byatumye mu gihe hataraboneka umuti uhangana na zo, Ikigo gishinzwe amazi n’amashyamba ubu cyaratangiye kwigisha abaturage gufata neza amashyamba, bayakorera, bacamo imiringoti ifata amazi no kugabanyamo ibihuru byangiza ibyari gutunga amashyamba, bigatuma n’utu dusimba tubona aho twororokera.

Umuti wica utu dukoko nturaboneka

Ngabonziza yasobanuye ko inda atari kimwe na nkongwa iherutse kugaragara mu bihingwa birimo ibigori ahabonetse nibura imiti ibasha kwifashishwa mu kuyirwanya, kuko imiti ikoreshwa mu mashyamba itabasha kuzica ndetse igira ingaruka ku buzima bw’umuntu.

Yagize ati “ Ntabwo ari nka twa dukoko dutera mu mirima y’ibigori cyangwa mu yindi myaka, uba ushobora gutera umuti bigahita bigenda ntihagire icyo byangiza ku buzima bwa muntu. Umuti uhari iyo ukoreshejwe ushobora kugira ingaruka zitari nziza ku buzima bw’abantu. Ushobora kuwutera ukamanuka ukajya mu mazi ukayangiza cyangwa ukica udukoko ariko ukangiza igiti cyose.”

Uyu muyobozi yakomeje avuga ko igikorwa cyo gushaka imiti ya nyayo gikomeje ariko hashyizweho gahunda y’uko amashyamba agomba guterwa, kwitabwaho no gusarurwa hirya no hino mu gihugu nka bumwe mu buryo bwo kurwanya inda.
Hari kandi gahunda yo gushaka ibiti bidakunda gufatwa n’iyi ndwara bigasimbura ibyarwaye no kongera ibiti bitari inturusu mu gihugu.

U Rwanda rufite amashyamba ari kuri 29% by’ubuso bwarwo. Amashyamba y’abaturage yihariye 68%. Ubuso buriho amashyamba arwaye inda ntibuzwi kuko ngo ntaho wasanga ishyamba ryose ryarangiritse ahubwo harwara igiti kimwe kimwe.

Igiti cyafashwe n'inda ntikiba kikibasha gukura neza
Amwe mu mashyamba yo mu Murenge wa Buruhukiro mu Karere ka Nyamagabe yafashwe n'inda agenda yuma amababi gahoro gahoro
Abafite amashyamba abakangurirwa kuyakorera mu gihe hataraboneka umuti w'inda
Uko inda yo mu nturusu imeze(Thaumastocoris Peregrinus)/Ifoto yakuwe kuri internet

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza