Umuryango ARCOS wahawe igihembo gihambaye cyo kwita ku bidukikije

Umuryango ARCOS wahawe igihembo gihambaye cyo kwita ku bidukikije


Yanditswe kuya 24-02-2012 - Saa 08:01'

Umuryango utegamiye kuri leta ubungabunga ibidukikije ARCOS ( Albertine Rift Conservation Society) mu cyumweru gishize wahawe igihembo n’ikigega MacArthur Fondation igihembo cyitwa MACEI ( MacArthur Award for Creative and Effective Institutions), kikaba ari igihembo gihabwa imiryango yagaragaje ubwitange mu byo ikorera abenegihugu.

Igihembo MacArthur Award for Creative and Effective Institutions gihwanye n’amafaranga ibihumbi 350 by’amadolari, ahwanye na miliyoni 210 z’amafaranga y’u Rwanda ; ARCOS ikazayakoresha yubaka ibiro byayo bikuru mu Rwanda, ibi biro ubusanzwe byabaga mu gihugu cy’u Bwongereza bikaba bigiye kuzubakwa mu Rwanda ari naho ubunyamabanga bwa ARCOS buzimukira bwose.

Nk’uko Dr Sam Kanyamibwa, umunyamabanga nshingwabikorwa wa ARCOS ku rwego rw’Isi abitangaza, iki gihembo gihabwa imiryango itegamiye kuri Leta 15 ku rwego rw’isi iba yarashyize mu bikorwa ibyo ishinzwe, ARCOS ikaba yaragihawe nk’umuryango wubahirije ukanakora ibijyanye no kubungabunga ibidukikije ku buryo bunoze.

Yakomeje avuga ko uko ibidukikije birushaho kubungwabungwa ariko n’Abanyarwanda barushaho kubaho neza. Avuga ko ibyo ARCOS ishyira imbere mu migambi yayo ari ugushyigikira imigambi ya Leta mu kubungabunga ibidukikije no guteza imbere abaturage. Aha Dr Kanyamibwa yavuze ko kuva mu mwaka ushize bari gukora ibintu byinshi bitandukanye birimo nk’ubuvugizi ku ishyamba rya Mukura riherereye mu Karere ka Rutsiro na Ngororero ho mu Ntara y’Iburengerazuba, no gukora ubuvugizi ku gishanga cya Rugezi giherereye mu Karere ka Gicumbi na Burera ho mu ntara y’Amajyaruguru.

Uko igihe kigenda gihita n’ibidukikije bigenda bihungabanywa, ubutaka buragenda bushira, amazi aragenda akama, ibibazo dufite bigomba gushakirwa ibisubizo kandi ibisubizo ni ibya buri wese. Niyo mpamvu ARCOS ikora ibishoboka mu buryo bwo gukorera hamwe dukemura ibibazo dufite. Dr Kanyamibwa yagize ati ’’Umuryango wacu ukorana n’impande zose, baba abategetsi n’abaturage ubwabo’’.

Dr Sam Kanyamibwa avuga ko ugereranyije n’ibindi bihugu u Rwanda rukwiye kwishimira ibikorwa byiza byo kwita ku bidukikije Guverinoma igenda igaragaza kuko mu bihugu bakoreramo byose ruza ku isonga mu kubungabunga no kurengera urusobe rw’ibinyabuzima.

Dr Sam Kanyamibwa, umunyamabanga nshingwabikorwa wa ARCOS

Claudien Nsabagasani ushinzwe ibikorwa by’iterambere ( monitoring and development manager) muri ARCOS, atangaza ko ibidukikije n’abantu kuva kera isi yaremwa babaye hamwe, ati " birakwiye ko umuntu abyiyumvamo akanabisigasira".

Yikubije ko The Albertine Rift Conservation Society yashinzwe mu mwaka w’1995 ikaba ifite icyicaro mu Bwongereza, icyo mu Karere kikaba i Kampala. Yita ku micungire y’amashyamba n’amazi hitabwa cyane ku rusobe rw’ibinyabuzima n’imibereho myiza ya muntu ; gufasha mu buryo bwo kwirinda no kugabanya ingaruka z’imihindagurikire y’ikirere, no gufasha abaturage kugira ubushobozi bwo gufata ibyemezo ku bijyanye n’imicungire y’ibidukikije.

Claudien Nsabagasani

Mu karere, The Albertine Rift Conservation Society ikorera mu bihugu bya Uganda, u Burundi, Rwanda, Uburasirazuba bwa RDC na Zambia.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO