Arboretum ya Kaminuza yashyizwe mu mushinga wa Commonwealth ugamije kubungabunga amashyamba

Yanditswe na IGIHE
Kuya 16 Gashyantare 2018 saa 12:43
Yasuwe :
0 0

Guverinoma y’u Rwanda yemeje ko ishyamba rya Arboretum riherereye ku musozi wa Ruhande mu Karere ka Huye, rishyirwa mu mushinga w’Umwamikazi w’u Bwongereza n’ibihugu bikoresha ururimi ry’Icyongereza, ugamije kubungabunga amashyamba hirya no hino ku isi (Queen’s Commonwealth Canopy Projet).

Inama y’abaminisitiri yo ku wa 14 Gashyantare 2018,ni yo yafashe iki cyemezo.

Uyu mushinga watangijwe ku mugaragaro mu nama y’abakuru b’ibihugu na za guverinoma zihuriye mu muryango w’ibihugu bikoresha ururimi rw’Icyongereza (Commonwealth),yabereye muri Malta mu 2015.

Ni urubuga rwo guhuza imbaraga n’ubumenyi mu byo kubungabunga amashyamba, ibihugu byose bigize uyu muryango uko ari 53 bihuriyeho nk’uko bisobanurwa ku rubuga rwa internet rw’uyu mushinga.

Arboretum ikikije Kaminuza y’u Rwanda, ishami rya Huye, igizwe n’ibimera, ibiti by’ishyamba n’ibindi byo mu bwoko butandukanye byatewe ahagana mu 1933 ndetse icumbikiye inyamaswa zirimo inkende, ingeragere, inyoni n’utundi dusimba.

Umuyobozi ushinze amashyamba no kubungabunga urusobe rw’ibinyabuzima mu Kigo cy’Igihugu Gishinzwe Umutungokamere, Jean Pierre Mugabo, yabwiye KT Press ko iyo ishyamba ryinjijwe muri uyu mushinga rirushaho kumenyekana kimwe n’amashyamba yose yo mu gihugu riherereyemo.

Yagize ati “ Twatoranyije Arboretum kubera ko ikorerwamo ubushakashatsi ku bijyanye n’amashyamba mu gihugu.”

Mugabo yavuze ko Arboretum nimara kwinjizwa muri uyu mushinga u Rwanda ruzungukiramo ibirimo no kujya rubona imbuto nziza z’ibiti.

Yagize ati “ Bizadufasha kubungabunga amashyamba bijyanye n’ibyo Commonwealth igenderaho no kubona imbuto nziza.”

U Rwanda kandi ruzaba ruhawe ububasha bwo gukoresha urubuga rwa Commonwealth mu gusangira ubumenyi n’ibindi bihugu mu bijyanye n’uburyo bwiza bwo kwita ku mashyamba no guhanga ibishya muri urwo rwego n’ibindi.

Kugira ngo ishyamba ryemererwe kwinjira mu mushinga ‘Queen’s Commonwealth Canopy Projet’bisaba ko urwego rwa leta rufite mu nshingano amashyamba rugaragaza gahunda yo kuyabungabunga mu buryo burambye ndetse ko abaturage bazinjizwa mu micungire yawo.

Arboretum ifite ibice biteyeho imigano
Arboretum icumbikiye inyamaswa, inyoni n'udusimba dutandukanye
Ishyamba rya Arboretum rimaze igihe ari igicumbi cy'ubushakashatsi bushingiye ku mashyamba

Amafoto: KT Press


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza