Byacura iki ibihugu binaniwe kumvikanira i Kigali ku ivugurwa ry’amasezerano ya Montreal?

Yanditswe na Kanamugire Emmanuel
Kuya 14 Ukwakira 2016 saa 02:11
Yasuwe :
0 0

Umuryango w’Abibumbye ukomeje gusaba ibihugu bitandukanye koroherana bigashyira umukono ku ivugururwa ry’amasezerano ya Montreal agena igenzurwa ry’ikoreshwa ry’ibinyabutabire biteza imyuka yangiza akayunguruzo k’izuba, abasaga 1000 bakaba bateraniye i Kigali biga kuri iri vugururwa kuva kuwa Mbere w’iki cyumweru.

Iyi nama ihuje ibihugu bigera ku 197, kuri uyu wa Gatanu yabanjirijwe n’umunota wafashwe abayitabiriye bunamira Umwami wa Thailand, Bhumibol Adulyadej, witabye Imana kuri uyu wa Kane tariki 14 ageze ku myaka 88.

Ibihugu byinshi bishyigikiye ko aya masezerano yatangiye gukoreshwa kuwa 01 Mutarama 1989, yavugururwa hagacibwa ibyuka byangiza ikirere bituruka mu byuma bikonjesha, ‘hydrofluorocarbon (HFCs)’.

Gusa hari n’ibihugu bigisaba ko hari ibikwiye kwitabwaho mbere y’uko ayo masezerano asinywa.

Minisitiri Mattlan Zackhras, waturutse mu Birwa bya Marshall, yavuze ko kwemeza ivugururwa ry’aya masezerano byatuma ibihugu byita ku gukemura imbogamizi Isi ifite uyu munsi.

Ati “Iki cyumweru haramutse habuze amasezerano yemeranyijweho, byaba ari icyasha mu maso y’Isi yose, kuko dukeneye cyane amasezerano yatuma dukuraho HFCs, kubera ko mu kubikora yaba ari intambwe ikomeye mu gukumira ishyuha ry’Isi, tukabasha nibura kugabanyaho dogere Celsius 0.5’’

Minisitiri Hakima El Haite ushinzwe ibidukikije muri Maroc, yavuze ko kuvugurura amasezerano ya Montreal bizazana impinduka mu buzima rusange bw’Isi, ndetse bukanayigeza ku iterambere rirambye.

Umuyobozi w'Itsinda rya Canada, Lucie Deforges

Mu gihe igihugu cye cyitegura kwakira inama mpuzamahanga ku ihindagurika ry’ibihe mu Ugushyingo 2016, yavuze ko byaba igihe cyo kwishimira ibyakozwe ubwo bazaba bari i Marakech, hubakiwe ku masezerano ya Paris ku ihindagurika ry’ibihe yemerejwe mu 2015.

Ati “Twagiye tugira ibiganiro, mu muryango w’Abibumbye, hagiye hubakwa inkuta hagati y’abari mu biganiro, ariko amasezerano ya Paris yagaragaje ko tugomba gusenya izo nkuta ahubwo tukubaka ibiraro.”

“Inama ya Paris yatweretse ko dukeneye guhindura uburyo dukoresha inganda zacu, uko dukora ibintu binyuranye, guhindura uko turi kubaka iterambere ryacu, tukubaka impinduka zizira “Carbone”, tugakuraho imyuka yose ishobora kongera ubushyuhe bw’iyi Si.’’

“Inkuru mbi ni uko nitutagera kuri aya mavugurura, duca intege amasezerano ya Paris. Uko amasezerno ya Paris yaba igikorwa cy’amateka kose, ni impapuro. Agaciro kayo kazagirwa no kuyashyira mu bikorwa. Uyu munsi mufite ayo mahirwe, mwiyitesha.’’

Umuyobozi w’Itsinda rya Canada, Lucie Desforges yavuze ko uyu munsi ari amateka atari ku masezerano ya Montreal gusa, ahubwo no ku bidukikije ku Isi yose, kwemeza ivugururwa ry’amasezerano ya Montreal bikaba byaba ikimenyetso cy’ubufatanye bw’Isi mu kurwanya ihindagurika ry’ibihe.

Ati ‘‘Twagaragaje neza ko twiteguye gutanga inkunga y’amafaranga binyuze mu kigega gihuriweho kizafasha ibihugu bikizamuka kugendana n’ibisabwa. Byongeye, Canada kimwe n’itsinda ry’ibihugu nterankunga n’abagiraneza, muri Nzeri batangarije i New York ko bazatanga miliyoni 80 z’amadolari, mu guteza imbere urwego rw’ingufu, niba izi mpinduka zemejwe muri iki cyumweru, i Kigali.’’

Umuyobozi muri Minisiteri y’Ububanyi n’Amahanga y’u Buyapani, NISHIURA Hiroyuki, we yavuze ko gukuraho ikoreshwa rya HFCs bishoboka hifashishijwe ikoranabuhanga rigenda rivumburwa, cyangwa bikaba byanagabanywa aho gucibwa burundu, ayo masezerano akagena ingano ya HFCs ibihugu bishobora gukomeza gukoresha.

Umuyobozi muri Minisiteri y'Ububanyi n'Amahanga y'u Buyapani, Nishiura Hiroyuki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244