‘Gatsibo Rice Company’ yatangiye gukora ibicanwa mu bishishwa by’umuceri byashoboraga kwangiza ibidukikije

Yanditswe na Kanamugire Emmanuel
Kuya 21 Werurwe 2018 saa 08:31
Yasuwe :
3 3

Uruganda rutonora umuceri rukorera mu Karere ka Gatsibo (Gatsibo Rice Company), rwiyemeje kubyaza umusaruro ibishishwa by’umuceri rubikoramo ibicanwa (briquette) mu gihe imicungire yabyo mu buryo butabangamiye ibidukikije yasaga n’aho igoye.

Ubusanzwe ibishishwa byarundwaga hanze y’uruganda aho byari bimaze gukora ikimeze nk’umusozi bigatwara ubutaka bunini ndetse bikaba byazamo udukoko dushobora kubangamira abaturiye uruganda.

Mu rwego rwo gukemura iki kibazo no gushaka amafaranga yunganira uruganda, ubuyobozi bwashoye imari mu gukora ibicanwa hubakwa uruganda rutunganya briquette mu mpera z’umwaka ushize.

Umucungamutungo wa Gatsibo Rice Company, Mugisha Delphin, yagize ati “Dufite imisozi y’ibishishwa by’umuceri bidafite icyo byakoraga kandi hari uburyo bwo kubibyaza umusaruro. Ubuyobozi bw’uruganda bwatekereje kubaka uruganda mu mpera z’umwaka ushize, briquette za mbere zatangiye gukorwa muri Mutarama 2018.”

Yakomeje agira ati “ Uko ibisigazwa by’umuceri bitinda bishobora kubora bikanuka hakaba hazamo udusimba tubangamiye abaruturiye, iyo bivuyeho bikajya gukoreshwa nk’ibicanwa, ibiti byatemwaga n’amakara byose bikagabanuka. Bifite umumaro ku ruganda no ku bidukikije muri rusange.”

Mugisha yavuze ko hari inyigo yakozwe kugira ngo uruganda rwubakwe bikagaragara neza ko briquette zizacuruzwa bikinjiriza uruganda amafaranga.

Kugeza ubu uruganda ntiruratangira kugurisha briquette n’abaturage kuko ruziranguza n’ibigo bifite ubushobozi burenze ubwabo icyakora mu minsi iri imbere na bo bazajya bazibona aho ngo ibiciro bizaba biciriritse ugereranyije n’uko amakara agura.

Ubushakashatsi ku mibereho y’ingo bwakozwe ku nshuro ya kane mu Rwanda, bwagaragaje ko Abanyarwanda bagera kuri 83.3% bakoresha ibikomoka ku biti, ni ukuvuga inkwi n’amakara, nk’uburyo bw’ibanze bwo kubona ibicanwa; ibifatwa nk’icyonnyi gihangayikishije urwego rw’ibidukikije mu gihugu.

Intara iza ku isonga ni iy’Amajyaruguru ifite abakoresha inkwi bagera kuri 94.4%, igakurikirwa n’iy’Amajyepfo ifite 92.6%, Intara y’Uburasirazuba ifite 89.9%, Intara y’Uburengerazuba ifite 88.3% naho Umujyi wa Kigali ukagira 25.6%.

Abanyarwanda bakangurirwa gukoresha imbabura zirondereza ibicanwa, gas, biogas n’ibindi mu rwego rwo kurengera amashyamba kugeza ubu ari ku buso bugera kuri 29.6% mu gihugu hose.

Uruganda ‘Gatsibo Rice Company’ rwakira hafi toni 4000 z’umuceri udatonoye mu gihe cy’umwero zivuye muri koperative ebyiri zikorana na rwo.

Umuceri rwakira ni muke ugereranyije n’ubushobozi bwarwo kuko rimwe na rimwe ruhagarika ibikorwa iyo washize mu bubiko.

Mu rwego rwo kongera ubuso buhingwaho umuceri ibishanga bitahingwaga bigenda bitunganywa dore ko hataraboneka ubushobozi bwo kuwuhinga imusozi.

Inyubako y'Uruganda rutonora umuceri 'Gatsibo Rice Company'
Ibirundo by'ibishishwa by'umuceri bishobora kubangamira ababituriye
Ibishishwa by'umuceri byatangiye gukorwabo ibicanwa bizunganira abaturage bo muri aka gace kabamo amashyamba make
Imashini yifashishwa mu ikorwa rya Briquette
Briquette zikorwa n'uru ruganda mu minsi iri imbere zizatangira gucuruzwa mu baturage
Briquette zikorwa n'uruganda rwa 'Gatsibo Rice Company' ngo zizaba zihendutse kurusha amakara
Umucungamutungo wa Gatsibo Rice Company, Mugisha Delphin yavuze ko kubyaza ibishishwa by'umuceri mo ibicanwa bizunganira uruganda binafashe mu kurengera ibidukikije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza