Ingaruka ziri kugaragara ku isi zitewe n’ihindagurika ry’ibihe

Yanditswe na Ferdinand Maniraguha
Kuya 16 Nzeri 2017 saa 08:56
Yasuwe :
0 0

Uko bukeye n’uko bwije, isi ikomeza kugerwaho n’ingaruka z’imihdindagurikire y’ibihe. Ahatari amapfa uhumva imyuzure, ahatari inkangu ukahumva umuyaga udasanzwe.

Ibikorwa bya muntu nibyo biri ku isonga mu gukurura ibyo byago ndetse nihatagira igikorwa, bimwe mu bikorwa bya muntu bitangaje bizazimira ba nyirabyo bareba ari nabo babigizemo uruhare.

Nubwo bitewe n’ubukonje n’imiterere yaho, kuri Antarctic hadatuwe n’abantu, ingaruka z’ibikorwa bya muntu zikomeje gutuma hangirika bikomeye. Kuri ubu urubura rwatangiye gushonga, ndetse mu duce tumwe na tumwe tw’aho hatangiye kumera ibyatsi.

Ibi biteye impungenge abahanga muri Siyansi, bavuga ko bishobora gutuma imwe mu mijyi ikomeye iri hafi y’inyanja nka Miami, New York, Mumbai na Shanghai irengerwa n’amazi ashonga muri urwo rubura .

Mu myaka 100 ishize, ibikorwa bya muntu byongereye ubushyuhe ku isi ho dogere selisiyusi 2.5. Uko kwiyongera k’ubushyuhe ku isi kwagiye gutera ibibazo bitandukanye birimo ihindagurika ry’ibihe, imyuzure ya hato na hato, kuzimira kw’inyamaswa n’ibimera bitandukanye n’ibindi.

Mu myaka myinshi ishize, ibikorwa bya muntu byakomeje kugira uruhare mu iyangirika ry’urusobe rw’ibinyabuzima ndetse n’ihindagurika ry’imiterere y’isi.

Ahari ubutayu bwa Sahara hahoze ibyatsi, amazi ndetse n’amashyamba nkuko byatangajwe n’umushakashatsi Dr Curt Stager muri Kaminuza ya Smith College, nyamara byaje guhindurwa n’imyuzure, agace gasigara kambaye ubusa.

Kubera ubushyuhe kandi , ibikorwa bya muntu n’ibindi, amoko 1000 y’inyamswa yarimutse ajya gushaka handi aba, andi menshi yarazimiye.

Inyamasa nka Pryenian Ibex, Inuma zo mu bwoko bwa Passenger, inkima zo mu Nyanja n’izindi ntaho wakongera kuzibona ku isi, zarishwe, zarahizwe izindi zinanirwa n’imiterere y’ikirere gishya zirapfa.

Inyamaswa nk’amadubu yo mu bice bikonja, inyoni n’ibikuruzanda nabyo bishobora kuzacika kubera imihindagurikire y’ibihe, kuko ubukonje izi nyamaswa zakundaga kubamo bugenda bugabanuka.

Ibihugu nka Costa Rica no mu bindi bihugu byo hagati ku mugabane wa Amerika biri mu bibazo byo kugabanyuka gukomeye kw’ibikeri.

Imiyaga ivanze n’imvura nka Irma, imyuzure nka Harvey imaze iminsi izunguza Leta Zunze Ubumwe za Amerika.Ubushakashatsi bwakozwe mu mwaka wa 2013, bwagaragaje ko mu myaka iri imbere isi ishobora kujya ihura n’imyuzure n’imiyaga ikaze inshuro zisaga 20 kubera ubwiyongere bw’ubushyuhe ku isi.

Mu burengerazuba bwa Amerika, mu myaka mike ishize hakunze kugaragara inkongi z’umuriro mu mashyamba. CNN yatangaje biterwa n’izuba ryinshi ryumisha amashyamba bikorohera ikwirakwizwa ry’umuriro mu gihe cy’inkongi.

Mu myaka 15 iri imbere, isunzu ry’umusozi wa Kilimanjaro rizwiho urubura rizaba ryambaye ubusa. Ubushakashatsi bwagaragaje ko ubushyuhe bw’isi buri gutuma urubura kuri uwo musozi rushonga bidasanzwe.

Ibiciro ku masoko

Imyaka irashize ibiciro by’ibiribwa ku masoko bizamuka ubutitsa. Leta zikora ibyo zishoboye ngo ibiciro bigabanyuke ariko bikaba iby’ubusa.

Inzobere mu buhinzi zatangaje ko ihindagurika ry’ibihe nk’amapfa, ryagiye rigira ingaruka ku musaruro, ibiribwa bikaba bike. Biteganyijwe ko mu mwaka wa 2050, ibiciro by’ibinyampeke bizaba byarikubye kabiri kubera kurumba cyangwa kudahingira igihe kubera izuba.

Akanama ka Loni gashinzwe imihindagurikire y’ikirere gaherutse gushyira hanze ubushakashatsi buvuga ko ibikorwa bya muntu bigira ingaruka ku bidukikije byiyongereye ku rugero rwo hejuru.

Ubuturo n’isoko y’ibiribwa by’inyamaswa zo mu Nyanja (coral reef) nabwo buri kwangirika bikomeye.The Guardian umwaka ushize yatangaje ko mu duce nka Mexico, Florida na Bahamas ubwo buturo uhereye mu mwaka wa 1980 bumaze kwangirika ku kigero cya 98 %.

Kuva mu mwaka wa 2005, ubwo buturo mu bihugu byegereye ibirwa bya Caraїbes bwagabanyutse ku kigero cya 50 % kubera ubwiyongere bukabije bw’ubushyuhe bwo mu Nyanja.

Umushakashatsi Paul Watson yavuze ko mu gihe cya vuba ubwoko bw’inyamaswa n’ibimera busaga ibihumbi bibiri buzaba bwazimiye nihatagira igikorwa ngo ibikorwa bya muntu byangiza ibidukikije bihagarikwe.

Amadubu yo mu rubura ari gukendera
Ubu bwoko bw'ibikeri bwarazimye mu bihugu byinshi byo ku mugabane wa Amerika
Umuyaga uvanze n'imvura ikaze wiswe Irma umaze kwangiza byinshi muri Amerika
Urubura ku musozi wa Kilimanjaro ruri gushonga ku kigero kidasanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza