Kigali: Igishanga cya Nyandugu cyatangijwemo umushinga wo gushyiramo ubusitani buhebuje

Yanditswe na Bukuru JC
Kuya 29 Gicurasi 2017 saa 08:55
Yasuwe :
0 0

Minisiteri y’Umutungo Kamere (MINIRENA) yatangije umushinga wo gutunganya igishanga cya Nyandungu kikaba ubusitani bureshya ba mukerugendo.

Biteganyijwe ko iki gishanga kigiye kirimo amazi kizatunganywa, hakorwemo utuyaga duto, hanaterwemo ibiti ku buryo bubungabunga ibidukikije, bikanatanga umwuka mwiza nk’uko Minisitiri w’Umutungo Kamere, Dr Vincent Biruta, yabitangaje mu mpera z’icyumweru gishize mu itangizwa ry’icyumweru cyahariwe ibidukikije.

Nk’uko tubikesha KT Press, uyu mushinga uzarangira utwaye miliyari 2.4 z’amafanga y’u Rwanda, uzakorerwa kuri hegitari zibarirwa kuri hegitari 134 ziherereye mu Murenge wa Ndera, Akarere ka Gasabo.

Inkeragutabara zatsindiye isoko ryo gukora ubwo busitani zatangaje ko icyiciro cya mbere kizaba kirangiye mu gihe cy’amezi atandatu.

Uretse mu gishanga cya Nyandungu, hanateganyijwe ko hazanatunganywa igishanga cya Gikondo kiri kwimurwamo inganda zerekezwa mu cyanya cyazo , Special Economic Zone.

Minisiteri ishinzwe ubucuruzi n’inganda yatangaje ko inganda nini icyenda ari zo zamaze kurangiza kwimuka mu gishanga cya Gikondo. Iyi minisiteri ivuga ko hari izindi eshanu ziri hafi na zo kurangiza kwimuka ariko hakaba hari n’izibarirwa muri 30 zigifitemo ibikorwa. Leta ikaba ikeneye miliyari 25 Frw mu kuzimura.

Ibikorwa nyaburanga bizashyirwa mu gishanga cya Nyandungu biri mu bya mbere byo ku rwego rwisumbuye bigiye kubakwa mu gihugu habungwabungwa urusobe rw’ibinyabuzima.

Uyu mushinga biteganyijwe ko uzuzura mu gihe cy’imyaka itanu uzarangira mu 2020, ushobora kuzinjiza miliyari y’amafaranga y’u Rwanda y’inyungu mu myaka 12, angana na miliyoni zisaga 83 buri mwaka nk’uko Ikigo cy’Igihugu cyo Kubungabunga Ibidukikije (REMA) cyagiye kibitangaza.

Ibishushanyombonera byerekana uko igishanga cya Nyadungu kizatunganywa

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza