Nyaruguru:Bibukijwe uko bahangana n’ingaruka zo gutsemba amashyamba

Yanditswe na Kwizera Emmanuel
Kuya 26 Ukuboza 2016 saa 09:14
Yasuwe : XX
0

Abaturage bo mu Karere ka Nyaruguru bibukijwe ko nubwo igice batuyemo ari icy’imisozi miremire kandi gifite ibiti byinshi, biraye ntibakomeze gutera ibindi no kubibungabunga, mu myaka iri imbere bazisanga iwabo harabaye ubutayu.

Akarere ka Nyaruguru kazwiho kugemura amakara n’imbaho byinshi mu bice by’imijyi irimo Huye na Kigali umunsi ku wundi, biba byakomotse ku biti byatemwe.

Mu rwego rwo gufasha abaturage gukomeza kubungabunga amashyamba, ubuyobozi bw’umurenge wa Cyahinda, bwatangiye ibikorwa byo guha abaturage ingemwe zo gutera ibiti mu mirima yabo no ku misozi, mu gikorwa bafatanyije na Croix Rouge.

Jean Felix Rutaganda, Perezida wa Croix-Rouge mu murenge wa Cyahinda yavuze ko basanzwe bakora ibikorwa by’ubutabazi ahibasiwe n’ibiza, kuri ubu bakaba bari gufatanya na Leta kubyirinda bitaraba.

Yagize ati «Intego yacu ni ugufasha abaturage kwirinda ibiza bitaraba, kuko inaha hamaze kugaragara ko imisozi igenda itemwaho ibiti igasigara yambaye ubusa. Ubwo rero turi kubigisha kurwanya ubutayu, kuko nubwo batuye mu gice gifite ibiti byinshi, bakomeje kubitera gusa, bashobora kuzisanga mu butayu mu myaka iri imbere».

Bamwe mu batuye mu murenge wa Cyahinda bavuga ko bamaze gusobanukirwa akamaro k’ibiti no kwita ku bidukikije muri rusange bityo bakaba bariyemeje gukora ibishoboka byose bakirinda kuzahura n’ubutayu.

Augustin Ruhungika ati « Ibiti bifite akamaro kandi bituma ubutaka butuma, nibyo kandi bikurura imvura tukabasha guhinga. Ni ukuvuga ko njyewe niyemeje kubibungabunga kandi nyuma yaho abayobozi bacu batwigishije uko tugomba kwita ku mashyamba, niyemeje ko ishyamba ryanjye ntagomba kuryobona ».

Muri iki gikorwa hamaze guterwa ibiti by’inturusu bigera kuri 2500 ku buso bwa hegitari eshatu.

Abaturage bakanguriwe no gutekesha ibindi bitari ibikomoka ku nkwi nka gaz na biogaz ndetse n’amakara ya Bruquettes.

Ubuyobozi bw’Akarere ka Nyaruguru buvuga ko bwihaye intego yuko buri murima w‘umuturage ugomba guterwamo ibiti bivangwa n’imyaka, kandi nta musozi n’umwe ugomba kugaragara wambaye ubusa utagira ibiti biwuteyeho.

Mu gihe ibiti bitemwa bitasimbuzwa, Nyaruguru yari izwiho kugira amashyamba menshi ishobora guhinduka ubutayu
Abaturage bahabwa ingemwe zo gusimbuza ibiti biba byatemwe

prudence@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza