Perezida Kagame yashyikirijwe igihembo cy’u Rwanda mu kubungabunga ibidukikije

Yanditswe na Philbert Hagengimana
Kuya 20 Ukuboza 2016 saa 05:37
Yasuwe :
0 0

Mu nama y’Umuryango w’Abibumbye yiga ku ihindagurika ry’ibihe, COP 22 yateraniye i Marrakech muri Maroc mu kwezi gushize, ni bwo hatangajwe ko u Rwanda ruza ku isonga mu bihugu byose bya Afurika mu kubungabunga ibidukikije.

Icyo gihembo Perezida Kagame yashyikirijwe na Perezida w’Inteko Nyafurika Ishinga Amategeko, Roger Nkodo Dang, kiri mu rwego rwo gushimira ibihugu bya Afurika, umuhate wabyo mu kubungabunga ibidukikije, ibyo bikagaragazwa ahanini n’amasezerano yashyiriweho umukono i Kigali, yo kugabanya ibyuka bihumanya ikirere.

Ayo masezerano yavugururiwe i Kigali mu nama ya 28 ihuza ibihugu byashyize umukono ku masezerano ya Montreal, azatuma hihutishwa guhagarika ikoreshwa ry’imyuka yangiza ikirere izwi nka “Hydrofluorocarbons (HFCs)” , ikoreshwa mu byuma bikonjesha, ikangiza akayunguruzo kagabanya ubukana bw’imirasire y’izuba iza ku Isi (Ozone), bikazagabanyaho 0.5 ° C ku bushyuhe bwo ku Isi kugeza mu mpera z’iki kinyejana cya 21.

Roger Nkodo Dang yashyikirije icyo gihembo Perezida Kagame ubwo yamwakiraga mu Rwanda mu ruzinduko yahagiriye mu cyumweru gishize.

U Rwanda rwashyizeho gahunda zitandukanye zo kurengera ibidukikije zirimo kurwanya iyangizwa ry’amashyamba, kubungabunga ibishanga, kubungabunga icyanya gituwe n’ingagi,guca burundu ikoreshwa ry’amashashi n’ibindi.

Perezida Kagame ashyikirizwa igihembo u Rwanda rwegukanye mu kubungabunga ibidukikije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza