Polisi igiye kwifashishwa mu gutera no kubungabunga amashyamba

Yanditswe na Jean Pierre Tuyisenge
Kuya 7 Ugushyingo 2017 saa 12:49
Yasuwe :
0 0

Minisiteri y’Ubutaka n’Amashyamba yasinyanye amasezerano y’ubufatanye na Polisi y’Igihugu hagamijwe kwita ku mashyamba no kunoza imicungurire yayo hirya no hino mu gihugu.

Ayo masezerano akubiyemo uruhare rwa Polisi mu gutera ibiti no gutanga ubufasha mu kwita ku bihari no gukumira ko hari uwabyangiza; Polisi yiyemeje kuzatera ibiti bivangwa n’imyaka kuri hegitari ibihumbi 22 n’ibindi by’amashyamba kuri hegitari 5000 mu gihe cy’imyaka itanu.

Minisitiri w’Ubutabera, Johnston Busingye, yavuze ko ayo masezerano akwiriye kuko ngo u Rwanda rukeneye ibiti ndetse n’ibihari bikaba bikenewe kwitabwaho.

Yagize ati “Iki gikorwa kirebana no gutera amashyamba no kuyabungabunga gifashweho icyerekezo gikomeye, iki ndatekereza ko abanyarwanda ari ko babibona, ngira ngo iyo ugenda hirya no hino mu gihugu ukareba uko hasa ku misozi ubona ko ari ikintu kibura mu gihugu cyacu. Igihugu cyacu gifite ibyiza byinshi, gifite imisozi nyaburanga ariko iyo witegereje urabona ko hari ikibura, ntabwo igihugu cyacu gifite ibiti bihagije.”

Minisitiri w’Ubutaka n’Amashyamba, Tumushime Francine, yavuze ko ubwo bufatanye buziye igihe kuko u Rwanda n’Isi muri rusange rukeneye ibiti n’amashyamba.

Yagize ati “Iyi ni intambwe ikomeye cyane navuga ko yatewe, cyane cyane ko ari ugushyira mu bikorwa inama duhora tugirwa na Perezida wa Repubulika y’imikoranire y’inzego.”

Yongeyeho ati “Kurinda ubutaka no gutera amashyamba ni kimwe mu bidufasha guhangana n’ikibazo cyugarije Isi ya none cy’imihindagurikire y’ibihe. By’umwihariko u Rwanda rukeneye gutera amashyamba nka bumwe mu buryo bwo kubungabunga ibidukikije ariko tunazirikana ko ibiti bikenewe mu buzima bwa buri munsi bw’Abanyarwanda.”

Minisiteri y’Ubutaka n’Amashyamba igaragaza ko u Rwanda rukenera umubare munini w’ibiti bikoreshwa mu bikorwa bitandukanye; Muri uyu mwaka, u Rwanda rukeneye ibiti toni esheshatu z’ibikomoka ku mashyamba nyamara rufite ibiti miliyoni 1.2 gusa.

Guverinoma y’u Rwanda ifite umuhigo ko mu 2020, ku buso bungana na 30% bwarwo buzaba buteyeho ibiti; ikaba isaba ubufatanye bwa buri wese.

Minisitiri w'Ubutaka n'Amashyamba, Tumushime Francine
Minisitiri w'Ubutabera, Johnston Busingye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza